انهرت

[مشكلتي]

اخواني قلبي تعمر غاضتني عمري بزاف عندي 9 سنين زواج ومازال ماعنديش الذراري المشكل في راجلي وانا حاليا حالتي تعقدت من كثرة المنشطات دارولي تكيسات واورام جربت التلقيح شحال من مرة وربي مازال ماكتبش كاين ناس يتعاملو معايا على اساس راني ميكروب ايه بصريح العبارة اللي حامل تخبي حملها عليا اللي شرات تروسو انتاع البيبي لازم مانشوفوش نعينو وانا ربي عالم حدي حد روحي مانحبش ندخل في خصوصيات الناس يعني منيش من المتطفلات عايشة حياتي حتى يفرج ربي اعتزلت المناسبات الاجتماعية و لعراس على جال هاذ السبة ينساو المزيود والمطهر و العروسة والمريض ويتلهاو غير بيا تقول انا اول وحدة ماولدتش و الحاجة اللي بكاتني بزاف انا نسكن بعيدة على دارنا يما جاية عندي تلعب مع بنت خويا صغيرة عندها عام ونص قالتلها نروحو لعمتك تخرج يماها وتقوللها غير هاذي اللي ماتصراش يما قالتلها لوكان نحب نديها نديها بلا مانشاورك (يما هي اللي مربيتلها بنتها هي تخدم )تقوللهانتبعك حتى لدار بنتك ونجيب بنتي لهاذ الدرجة راهم يشوفو فيا وحش ولا عاقرة ناكل ولاد الناس يارب فرج عليا كرشي هي اللي دارتها بيا لوكان راني بولادي مانيش هكا محل شفقة تعقدت بزاف من هاذ الناحية حتى اخواتاتي اللي نعزهم مرات يغلطو معايا الا عيطو على ولادهم ولا ضربوهم مانحبش عليهم يقولولي ولادنا واش دخلك ايه صح واش دخلني نولد كي النسا ومنبعد نهدر على ولاد الناس ربي يفرج كرهت وخلي وخلي صراولي مواقف كي نتفكرهم راسي يدور سلفتي لحقت نحاتلي بنتها من حجري عجوزتي حطتهالي في حجري وهي جات نحاتهالي مزية لحقت على بنتها لوكان راني كليتهالها الحاجة اللي مصبرتني زوجي انسان حنين ربي يخليهولي ادعولي ربي يفرج عليا وعلى كل محروم

[الحزين المبتسم]

السلام عليكم ورحمة الله

أختي الفاضلة

للأسف السخرية والستهزاء سمة الكثيرين منا سواء كانت حول الشكل أو المال أو الولد ...

يقول تعالى : " لله ملك السماوات والأرض يخلق ما يشاء يهب لمن يشاء إناثا ويهب لمن يشاء الذكور .أو يزوجهم ذكرانا وإناثا ويجعل من يشاء عقيما إنه عليم قدير "

هي مشيئة الله أختي الانسان يتسبب ويسعى للعلاج والخيرة فيما اختاره الله

اذا كنت متأكدة أن من حولك يسيئون اليك لأنك عاقر وفقط فلا تلتفتي اليهم

ثابري على الدعاء والاستغفار

نسأل الله أن يرزقك الذرية الصالحة

[.ام زكرياء.]

اختي كاين تجمع وسمو نعمة الامومة قسم دردشة البنات ادخلي ونتوانسوا كاين بزاف كيفنا ارواحي فرغي قلبك معانا

[تائبة لله تعالى]

السلام عليكم
اخبرك وانصحك بشيء واحد فقط وهو الاستغفار والدعاء وقيام الليل
اعانك الله ورزقك الذرية الصالحة ان شاء الله

[زبدة ذايبة]

ارجعي لرب العالمين

هذا واش نقولك

رب سبحانه وتعالى حتى حاجة ماتعجزو لافي الأرض ولا في السماء

شوفي لهذ الملايير من البشر كامل خلقها هو سبحانه وتعالى

ماتيئسيش من رحمة الله

هذا اليأس حرام يكون في قلب المؤمن

ماراناش كفار نجريو مرو الطبيب برك

ماشي الطبيب هو اللي يعطيك الأولاد

اللي خلقك وخلق راجلك هو اللي يعطيكم

عاودي ولي صححي إيمانك بيه

قاعدة تشوفي وتعسي في الناس واش يقولو عليك واش يتهموك

ونسيتي بلي راكي بعدت على أكبر وأعظم مصدر للسعادة وراحة البال

سبحان الله

كيفاش كاين واحد على كل شيء قدير

ينزل للسماء الدنيا في الثلث الأخير من الليل نزولا يليق بجلاله سبحانه وتعالى تقدست أسماؤه وتعالت صفاته

ويقول : سبحانه وتعالى وهو مالك الملك ،العزيز ،الجبار ،المتكبر، له الأسماء الحسنى والصفات العلى:

هل من سائل فأعطيه

إذا تباتي تشخري في الليل

إذا صلاتك ناقصة

إذا حجابك ناقص : حجاب السروال وجيب والماكياج

إذا دارك فيها المنكرات أغاني وتصاور ووووو إلخ نحيهم

سقمي حالك مع رب العالمين يسقملك الدنيا والآخرة

أرفدي يديك ليه ورايح يعطيك

أعظم العبادة انتظار الفرج ماشي اليأس

عاودي ولي ليه وحطي جبهتك على زربية الصلاة وابكي وادعيه

والله الذي لاإله غيره معجزات راه تصرا من شدة اليقين بالله

رانا نتعاملو مع كبير ومتعال وقادر على كل شيئ

افهمي مليح هذ العبارة قااااااااااااااااااااااااااااااااااااااااادر على كل شيء سبحانه وتعالى

خلق آدم من طين

وخلق عيسى بلا أب

راح يعجز فيك انت واللي كيما انت ؟؟؟؟؟؟؟؟؟؟؟؟؟؟؟؟؟؟؟؟؟؟؟

[nawel26]

لازم تعرفي بلي ماشي الاولاد هوما كلشي في هده الدنيا عيشي حياتك نورمال ماديريش في قلبك و خطيك من الادوية اذا المشكل راهو في راجلك انت داوي و لاماداويش كيف كيف.
الله يسهل على كل واحد المهم تكوني متفاهمة مع راجلك ماتقيميش الناس

[first first]

ياااختي ربي يرزقك الذرية الصالحة ......................ماتخليش الشيطان يلعب بيك
نقولك ................جميع التصرفات التي ذكرتها عادية .......او يمكن رؤيتها كذلك......ولكن نفسيتك تعبانة جدا ..............اصبح كل شيء يؤثر فيك بقوة
لاانكر ان الناس لهم تصرفاتهم .............وكل واحد يقيسوه في الوتر الحساس .......هاذي مانكذبكش فيها ....ربي يعطيك قوة من قوتو.................كي تعود نفسية مليحة ماتعبري حتى جاست من لي جاست تاعهم
ربي يفرحك ويسعدك يارب بالذرية الصالحة والمعافاة عاجلا غير اجل ...................اهتمي بالدعاء والاستغفار .........لعل الفرج قريب.
ليس ذنبك ولاذنب زوجك تاخر الانجاب .................ربي وحكمتو......................وليس الانجاب مقدار لقياس البشر ..................حتى البقرة تنجب .............بفضل من ؟؟؟بفضل من الله ليس لشطارتها وليس لانها بقرة ؟؟...............فهناك بقرات لاينجبن؟؟؟لاتلومي نفسك ولازوجك.
تقبلي ابتلاء الله بنفس راضية اختي الغالية حتى وان نزلت دموعك بغزارة................فبعد العسر يسر .......ربنا قادر على كل شيء فلما الاستسلام ؟؟؟هناك من حالتهم لاامل فيها حسب ماقيل لهم وفرج ربي.
لك نصيب من دعائي ان شاء الله ...........فدعاء المرء لاخيه مستجاب باذن الله. ولاتنسي ................كرمه سبحانه وتعالى يفوق كل الامل

[نور الرحمة]

يا اختى غير راني حاسة بيك ان شاء الله ربي يوعظك خير وتلقاي هد ا الصبر في الجنة

[eBusiness]

حسبي الله ونعم الوكيل... أختي راكي مليحة كي راجلك راهو حنين معاك أما الاخرين ما ديريش على كلامهم خلاص ورب يهنيك.

[aminazy]

الصبر ثم الصبر ربي يفرج عليك اميييين

[mounia 85]

قطعتيلي قلبي اختي...............ربي يفرج عليك ان شاء الله ويرزقك بالدرية الصالحة

[ibtihal18]

ربي يفرج همك و كربتك اختي اصبري و احتسبي الاجر عند الله
.....ربي يرزقك الذرية الصالحة عاجلا ليس اجلا انت و كل من تنتظر هذه النعمة

[assia88]

rabi yfaraj 3lik, w ywafilak wach raki matmanya inchallah

[- بصمة خير -]

مانعرفش اذا جربتو هذا العلاج او لا و لكن نقولك عليه
و هو عشبة الجرجير
مديها لزوجك يشربها او ياكلها
و من الاحسن ما تقوليش السبب لاه باش ما يكونش في ضغط نفسي
لان الضعط النفسي يأثر على الانجاب للرجل او المرأة
شوفي سبب و قوليلو عليه
و ايضا دعاء
ربي لا تذرني فردا و انت خير الوارثين
ربي اني لما انزلت الي من خير فقير
الله يرزقك و يرزق كل وحدة محرومة من الذرية

[NIGHTINGALE]

أضم صوتي إلى صوت الأخت التي قالت لك أنك تعبانة نفسيا
فتعبك هو الذي يزيد من وقع تلك التصرفات غير اللائقة الصادرة عن قريباتك على نفسيتك
فلو كنت في حال أفضل ما آلمك كلامهم وأفعالهم كما يؤلمك الآن وما كنت لتعاني ما تعانينه الآن
ثم إذا كنت تأخذين دواء على شكل هرمونات فمن المحتمل جدا أن يؤثر على معنوياتك ويجعلك أكثر حساسية للمؤثرات الخارجية من المعتاد
حاولي أختي الكريمة أن تريحي نفسك قليلا من عناء التفكير في أمور هي بيد الله جل وعلا
واصرفي جل اهتمامك نحو ما يريحك ويدخل بعض البهجة إلى قلبك ( كزوجك على سبيل المثال)
واعلمي أنك أنت من يسمح لتلك الإساءات التي ذكرت أن تعشش في عقلك وتنخر لبك بكل ما ينغص عليك جو حياتك
فإذا أردت الراحة انسيها ولا تعيريها أدنى اهتمام تنمحي من ذاكرتك وتصفو أمامك حياتك وتزدهر بالآمال
فتلك الإساءات لن تؤلمك إلا إذا سمحت لها بذلك وجعلت لها سلطانا على نفسك
فكري جيدا ما الفائدة من تذكر الإساءة تلو الأخرى وتعدادها وذكر صواحبها ؟ ماذا تجنيه منها ؟
لا شيء فهي ضرب من ضروب وساوس الشيطان الرجيم
صدقيني أنت تعذبين نفسك وتهدرين صحتك من أجل لا شيء
حتى أن الواحد يعتقد من كلامك أنك لا تريدين طفلا لنفسك بل تريدين طفلا لأولئك الذين أساؤوا إليك
فما الجدوى من ذلك
أما إذا كنت تودين فعلا إشباع غريزة الأمومة فيك فعليك بدور الأيتام
ولك في ذلك أجر عظيم إلى حين يرزقك الله بطفل من صلبك إن شاء الله