هيا لبنات درس الخياطة درك جيبو قماشكم لمفصل و ارواحوا يا الفحلات

takwaaa · 2014-05-16, 14:29

جيبو القماش اللي فصلتوه

حطي السجاف تاع الرقبة الوجه مع الوجه في الظهر و الصدر و خيطي ديما لخياطة تكون موازية للحاشية تاع لقماش

بعد ما تخيطي السجاف قصي الرقبة من داخل شلطيها يعني ما توصليش للخياطة كيما هك

و تقلبي السجاف لداخل و تخيطي الصدر برك الظهر خليه

بعد ما تقلبي السجاف و تخيطيه جيبي الظهر حطي عليه الصدر وجه الكتان على بعضاه و دخلي الصدر الي راكي خادماتو بين الظه و السجاف تاع الظهر كيما هك

و امبعد اقفلي الكتف عادي و عاودي لخياطة و ميلي شوية كيما هك

كاين اللي يخدمو الصدر وحدو و الظهر وحدو و يلصقو الكتاف مي ما تجيش الخدمة نظيفة مي الطريقة هادي تجي الخدمة نظيفة خاطر نخبو لخياطة

بعد ما تخيطي اقلبي السجاف لداخل و خيطيه

وبعد ما كملنا خدمة الرقبة نقفلوا الجناب و نكفوا الدفار على حساب قياسنا

بعد ما كملنا الخدمة في القندورة نروحو لليدين نكفوهم و نخيطوهم و في لكتف نديرو تكماش

هك نكونو كملنا لخياطة انحو لخيوط و و انظفوها و نحدوها بش تبان خدمة مليحة الحدادة تزيد النص في القندورة
و هاهي قندورتنا

هادي مثال على طريقة لخياطة انا عذبتني شوية خاطر صغيرة تاع طفلة مولاة نهار ههههههههه تعذب شوية لحوايج صغيرة خاطر صعيبة تتحكمي فيها مي انتم تجيكم ساهلة و الماشينة تاني تقطعلي في الخيط
ان شاء الله فهمتوني وجاكم درس ممتع و كنت خفيفة ظل عليكم
هادي مبادئ خياطة قندورة و لازم تشلطو الرقبة سيرتو الرقبة لمدورة و كتن الرقبة v ولا كاري قصو الزوايا تاعها و الا ما تتقلبش معاكم
يا الله ورولي شطارتكم

ثلوج الشتاء · 2014-05-16, 14:56

ماشاء الله عليك يا الفحلة وربي يعطيك على حساب نيتك التطبيق تاعي نحطهولك في نهاية الأسبو ع بسبب ارتباطاتي وراني متحمسة باه نبدى نتعلم الخياطة على يديك

اسم مرا · 2014-05-16, 15:08

خيطته استاذ.

اسم مرا · 2014-05-16, 15:09

بقاتلي غير هذك القطع الصغيرة

loudjeine2000 · 2014-05-16, 15:15

بارك الله فيكي عمل متقن و نضيف
يعطيك الصحة

لينة المتفائلة · 2014-05-16, 15:19

شكرا ليك اختي انا فصلتها او ماجاتنيش مليحة من جيهة الليمونش مفهمتش وعلاش

ياسمين1990 · 2014-05-16, 15:20

بارك الله فيك
شكرا على التطبيق

أم ياسين الزهراء · 2014-05-16, 15:31

الله يكملك ويعطيك على قد نيتك

mari mita · 2014-05-16, 15:49

استاذة تقوة وين تسكني في الواد

takwaaa · 2014-05-16, 16:12

و فيكم براكة هانا نتعلمو من بعضانا ربي يقدرني و نساعدكم بالشي اللي نقدر عليه
اسم مرا وينو تطبيقك نشوف غير فالهدرة و ما شفتش الخدمة؟
اختي لينا حطيلي نشوف الصورة و نقلك على الديفو كان قدرت
اختي mari تعرفي الواد؟

mari mita · 2014-05-16, 16:49

ايه نعرفهاا مليييح

takwaaa · 2014-05-16, 16:57

قوليلي لبلايس اللي تعرفيهم

fatma1977 · 2014-05-16, 17:36

يعطيك الصحة يا الفحلة

mari mita · 2014-05-16, 18:32

البياضة والرباح وقمار وكوينين ولييزيرق وواد العلندة ومهونسا وورماس الطرفاوي الشط تكسبت القارة حي النور الاصنام ... نعرفها الكل

kaouka · 2014-05-16, 19:09

Ya3tik saha oustada rani m3aha aki ta3arfi dar wouhwalha zidi rani mrida man dahri hadawin jit man 3and lkini rani nhoutlak choufi wa3tini nikat hhhhhhh ana tama3a