السلام عليكم
سامحوني منعرفش نكتب باللغة العربية الفصحى
المهم انا القصة نتاعي بدات كي دخلت للجامعة سنة 2011 وعرفت بلي راني نضيع في وقتي فيها
قلت نروح نحوس خدمة على روحي
المهم الدوسي اللي ندفعو يطلبو بطاقة الاعفاء
سنة 2013 قررت باش منجددش السورسي
في فيفري 2014 رحت عند الدرك الوطني نشوف الوضعية تاعي لقيت لوردابال تاع مارس 2014 خرجتلي
طرت مالفرحة حتا هوما تخلعو فيا هههه الكوراج يا محاينك
الغدوة بديت نوجد في ملف طبي لنقص النظر ومعندي حتى معلومة عليه وعلى المدرسة اللي راني رايحلها
بدين نحوس فالحاج قوقل حتى اكتشفت هذا المنتدى الذي افادني كثيرا صراحة
بديت نسقسي ونعمر في راسي ونوجد في روحي
قبل 15 يوم من الموعد اللي كان 22 مارس كان الملف واجد والكابة واجدة ههههه
قالولي الجماعة متلتاحقش بالترونزيت ودير الروتار كاش سمانة
درت عليهم لانهم عندهم خبرة
27 مارس صليت الفجر ودعت الوالدين وانطلقت الى ولاية سيدي بلعباس علما اني من تلمسان ثم الى تيارت ومن تيارت الى الاغواط
لحقت قبل ما يغلقو ب 20 دقيقة اي 15: 40
عند الباب اعطيتلهم الدعوة هههه وسجادة التعريف الوطني هههه فتشولي الكابة وقالولي كاش مرافد لام قلتلهم لالا
وانا ديجا عندي جوتابل تاع حلاقة محبيتش نعطيهالهم وقالي تيليفون فيه كميرا قتلو لالا شافو ورجعهولي
انا كنت رقم 401 ضابط صف يعني سارجان وهوما يسحقوا 255
كي دخلت عجبتني المدرسة مليحة بصخ غاشي كبير يا خاوتي واش نقولكم النهار الاول اعطاوني زاوة و بت على الارض
والغدوة نوضونا على 5 تاع الصباح وحد البرد فالاسكا ومكاش يا الهي ماهاذا الجحيم ههههه
المهم تقهوينا وكركرونا فالفوايي بينا بالظباط يعني حوالي 1200 شخص في 80 متر مربع معندكش حتا وين تتنفس
تلاقيت واحد ولد بلادي فرشنا السجادات ورقدنا عليهم تحت الطوابل
العشية تفكرت بلي المباتة فالارض كيما البارح رحت للفوايي وقررت نسكرها بالمشروبات الغازية ههههه
فجأة جا واحد ولد بلاد ثاني كان يقرى معايا راو يخدم تما ايا سلمت عليه وحكيتلو الميزيرية ههه
ايا داني للشومبرا تاهم عرفني على صحابو اعطاوني بلاصة وقلشوني مساكن ربي يكثر خيرهم
وليت نبات معاهم وصباح نراسومبلي مع صحابي
بعد 5 ايام لحق الدور نتاعي باش نجوز عند الطبيب
وصاو عليا ولاد لبلاد اللي يخدمو تما
شافلي الدوسي ودارلي تاست ايا وكتبلي inapte
في اليوم الموالي جاو عيطولي مالفوايي وداونا للادارة اعطاونا ورقة قالونا ادوها للناحية العسكرية نتاعكم وخلصونا حق الطريق على حساب البعد
كي لحقت لتلمسان ريحت يامات ومبعد رحت دفعت هذيك الورقة ومازال لحد الان نستنى فالكارطة
بعض النصائح نقولهالكم
- لازم تروح مع واحد ماتروحش وحدك خاطرش يشوفوك وحدك يحقروك ولاد الحرام
- لازم تفتش على ولاد بلادك اللي خداميين تما خاطرش يعاونوك بزاف
- ما تروحش انتا الاول ومتروحش نتا التالي خاطرش الاوائل يلبسوهم ديراكت يعاود ينحولهم ويلبسوا التوالى
- العبها مريض ودي معاك دوسي مترافيكي
- متديش دراهم بزاف خاطرش متسحقهمش
- البس مليح البرد بزاف
- متجيبش الماكة ميخلوكش دخلها والمصاحف والكتب
- جيب معاك سجادة ودرا تسحقهم بزاف
- جيب معاك ملعقة كاس باش تشرب
- التيليفون اللي فيه الكاميرا ممنوع
- متلعبهاش مارق مع العسكر تفكر بلي راك سيفيل
- ماكلة ماش مليحة بصح كاين جنود يدخلولك اي حاجة تبغيها ويربحو معاك شوية
- الكابة تاعك اغلقها بكادنة صغيرة
- فليكسي كاش 1000دج قبل ما تدخل باش تهدر مع داركم
خاوتي هذا اللي شفيت عليه اي استفسار سقسوني ونجاوبكم
راني تعبت وانا نكتب اللي استفاد بحاجة يفيدنا بدعوة في الغيب
( تقرير عن مشاركة سيئة )، و الموجودة أسفل كل مشاركة .
2015-01-23, 12:15
تجربتي في e.a.d.c.a الاغواط
العرض العادي
