طلب مساعدة

[مشكلتي]

السلام عليكم
مشكلتي قد تبدوا للبعض سخيفة ولكن بصدق انا احتاج نصيحتكم
واجركم على الله
انا فتاة عمري 28 سنة واعمل طبيبة ولان كل صديقات تزوجن وبقيت انا رغم اخلاقي وجمالي
فتقدم لخطبتي شاب ذو اخلاق رائعة و سيرة حسنة ويحبه كل الناس ولكن عيبه الوحيد ان ليس له عمل
دائم وقد توقف عن الدراسة في الثانوي
فقبلت به صراحة هروبا من شبح العنوسة
ولكن بعد خطبتنا بايام ندمت وقلت في نفسي بنت مثلي كان لابد ان تتزوج بشخص له مهنة دائمة
وسيارة وغيرها من الاشياء

انا بين نارين هل اقبل هذا الشخص الطيب النبيل الحسن السيرة والمصلي وغيرها من الصفات الحسنة
ام افسخ خطوبتي بحثا عن المال والجاه فقد تقدم لخطبتي بعده اشخاص كما اتمنى .

ساعدوني انا مشوشة هل العمل غير الدائم عيب ام انه شيء عادي

[MaX32Dz]

الخدمة و الماديات عمرها لا بنات دار

الدين هو الذي يبنيها و الأخلاق الحسنة و حسن المعاشرة

احذري أن تندمي لتضييعه ، هذا ما لدي .

[منار40]

يا اختي العزيزة ياخي متربي وعاقل واخلاقو مليحة واحمدي ربي عليو وتاني كي وافقو داركم وهو خدام عادي واله ال جال ما يتعابش على خدمتو قد ما يتعاب على دينو واخلاقو راه فيةى جانب ايجابي مليح احمدي ربي وتاني حاجة ياخي انتي خدامة الحمد لله

[محمد جديدي التبسي]

راك طبيبة لاباس بيك ما شاء الله وخطبك باه ديريلو التاويل كامل وبعض الظن إثم
العمل غير الدائم ليس عيب في الرجل الحقيقي
المهم يسعى للقمة عيشه بالحلال ولا يتزوج من أجل راتب زوجته
اذا شفتي روحك تحبي الماديات والتحواس والبيت الواسع والسيارة وخدمتك ما توفرلكش هاذي الأشياء
خلي ولد الناس يروح يشوف وحدة في مستواه وخلي يجيك اللي في مستواك انت!!
ربي يسهل

[أم شروفة]

أنتي عاملة .تقدري ديري السيارة والمال.تزوجيه لكن المهم اشترطي عليه العمل

[امينة النايلية]

لا هاذي مش حاجة سخيفة كيماراكي تقولي هذا مستقبل تاعك

تباني مش مقتنعة بيه على خاطر مايخدمش وهذا من حقك

انا نشوف اذا تزوجتي بيه.. ونتي مش مقتنعة كيما هاك رايحة تندمي اكيد

خاصة اذا نتي من النوع الي يهمك كلام الناس كيبداو يسقسو على خطيبك وشيخدم

_شوفي اخلاقه بصح متقدريش تعرفي الشخص الا بالعشرة

اما المستوى تقدري تعرفي روحك اذا تقدري تتنازلي او لا

وربي يسهلك

[adillo]

السلام عليكم
يا الاخت الفاظلة هنا انتي والنظرة ديالك تجاه الزواج كما قالو الاخوة الكرام يلى تحوسي على الماديات خلي يروح يشوف لي على قد حالو ويلى تحوسي باش تتهناي راكي متلقاش خير من الاخ الكريم كما راكي تقولي الماديات عمرها مابنات ديار الفايدة في الدين والخلاق وحسن المعاشرة
ربي يووفقك ويوفق الجميع

[saddam02]

* قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " قالها ثلاث مرات
رواه الترمذي وغيره

[رمزي فارس]

الراجل عيبو جيبو، وهذا جاء بعيبو ماهوش خدام وحاب يتزوج، بواش تعيشو بالحب والأخلاق، الأخلاق لا تشتري خبزا وحسن السيرة لا يدفع فواتير الكهرباء والماء، لماذا عليك أن تصارعي الحياة المرة والجري وراء لقمة العيش في حين ان الدنيا نفسها فتحت لك ذراعيها ، اختاري من يضمن لك حياة كريمة كل صيف تحواس والسيارة آخر موديل ويعيشك أحلى أيام عمرك وهذا لا يعني أن كل ذو مال ليس ذو دين ، بالعكس يقدر يديك للحج مرات، اختاري الأفضل بينهم ولا تترددي واعلمي أنه لديك عمر واحد أعرفي كيف تعيشينه. الاخوة أصحاب شعار الفقر والسعادة الله يهنيكم ويدوم عشرتكم

[mrmilano1984]

اختي ان كان صراحة انسان عاقل بزاف ومتخلق ووليد فاميليا صح ومضهره لائق جدا علي حسبك وبصحتو وعقلو وخاطيه دعاوي الشر صدقني راح تندمي لو تفسخي الخطبة مع هدا الشخص رغم اني لااعرفه اطلاقا لكن مادامتي كبيرة 28 سنة راكي عرفتي بعض خصالو ماتسمعيش للناس انا نصيحتي ليك اقبلي بيه ومش عيب المرا كي تعاون الراجل صدقني بلاك نتي مربوحة عليه ويلقا ولو عمل بسيط ان امكن
نقلك حاجة عندي بنت خالتي تزوجت شخص ماعندو ني خدمة ستابل ني هم يحزنون الدار ماعندوش ساكن مع والديه بانيين ومع خوه خياتو مزوجات مزية بصح وليد فاميليا صراحة خاطيه المشاكل وعاقل بزاف يسكن في الشراقة حتي هه مرتو توكلو وتشربو وتصرف عليه تقريبا وهي لي عاوناتو باه بنا فوق دار باباه ودارتلو موبل وكل شيء وراهو عايش ومرتو خدامة عند روحها
يعني عادي جدا خمي علي مستقبلك الا تسمعي للناس ولعرب تهبلي كما كنت نسمع انا ليهم من قبل اوك
اتكلي علي ربي وماتفسخيش الخطبة معاه راح تدي اجر كي تتزوجي بواحد مليحة لك وليه ورب يعطلكم علي حساب قلبكم للزوج والحب بلاك يجي مع الوقت مع هدا الراجل
التشراط هو لي خلا نسانا بايراتتتتتتتتتتتتتتتتتتتتتتت
ليس عيبا انك تتزوجي واحد اقل منك مستوي تعليمي ممكن تلقاي واحد طيار بصح عقليتو عيانة معاك واش تقولي من بعد

[nilly]

وهادا وراش راني نكره فيكم يا جزائريات تحوسوا غير على زوخ ونفوخ الحمد الله ماشي كامل طبيبات كيفك انا واحدة منهم لميخلعنيش المظاهر
الكبير كبيره باخلاقه وتصرفاته ماشي بماله وشهاداته وطونبيلاته وبيوته


لن اجد بنت مثلي لو فتشت الجزائر شبر شبر

[داعي الله ياسين]

في اختصار :
هل تكبّرتي عليه لأنه بلا عمل ...؟
أَم تواضعتي له لأنه متديِّن وخَلوق .. ؟

تأمّليها جيِّداً ستجِدين الإجابة في ضميرك !


سلام الله

[مسك القعدة]

رايحة نحكيلك حكاية قريبتي

قريبتي تعرفت على شخص وهو ثان قريبي قبل ما تفوت الباكالوريا وهو كان بطال تحصلت هي على البا ودرست طب وكي قربت تتخرج بداو الناس يفتولها نتي طبيبة وهو مش خدام قالتلهم عرفتو قبل ما نفوت الباك مش رح ندور عليه ولا نتكبر عليه كي وليت طبيبة تزوجت بيه وراهي خدامة وحفزاتو باه كمل القرابة ودار ستاج وراه خدام في المجال نتاعها وعايشين ولاباس عليهم والناس لي كانت تهدر ربحت غير العيب

عمرو المال لكان هو كلش

[no name rix]

اختاره لدينه
...
من كلامك أعتقد أنك تشبيهن ماريا تع لانجليز ؟؟
فكرتني لما أكون سيراا على الاقدام لا أحد ينظر لي
ولما أقوم بقيادة السياراة أرى كل البناة ينظرون لي في الطريق حتى هناك من تود أن تركب معي
هههههه و أنا فايق للعقلية هذي و لا أحد يستطيع أن يلعب والحمد لله قبل كل شيئ أخاف الله
لكن عند جاري هداه الله لما قامو بشراء السياراة كل يوم أراه مع وحدة في السياراة هههههه
الله يهديكم

[بصمة قلم]

تاخدي رايي خلي ولد الناس يروح يشوف باب اخر خير ليك وليه على خاطر باينة رح تكرهيلو حياته بعد الزواج
مشكلتك ماهيش انه ماعندوش عمل مستقر مشكلتك انك حتى لو كان عنده عمل مستقر وعلى قد حاله ما يعجبكش
راكي تحوسي على اللي يدخل 40 مليون فالشهر او اكثر و عايش الحياة الحلوة
امالا اقعدي اسناي حتى يجيك واذا جاك غير اقبلي باه تهني على روحك

بالصح نفكرك بالي الزواج باب رزق وياما ناس كانوا على قد حالهم وفتح عليهم ربي

اسفي على مثقفي مجتمعنا والمستوى الذي وصلوا اليه