تقدم لخطبتي

[مشكلتي]

السلام عليكم :

انا انسانة محافظة .جامعية .موظفة و الحمد لله . عمري 25 سنة

تقدم لخطبتي شخص لم اكن اعرفه . بعت اهله الرجال و تكلمو مع ابي . وبعت النساء و جاو و مدينا الكلمة

هاد الشخص ليس لديه مستوى دراسي ماعدا السنة السابعة ... عمله غير مستقر ..مرة يعمل ومرة والو ولكن لاباس لاباس لأن الرزق من عند ربي ..

كان له ماضي اسود .........فهو يتيم الابوين وطبعا كان المسكين ضايع و كامل الناس تعرف انو كان ضايع وكانت فيه كل رذائل الدنيا ...من شراب ...كيف ...وسرقة ...وزنا ...

لكن في الوقت الحالي راهم يقولو لاباس بيه ......طبعا اهلي لم يكن عندهم علم لما مدينا الكلمة بقصة الرذائل ....وكي جاهم علم بالامر راهم متحيرين بزاااااااااااف .


في الجهة المقابلة ..... الحمد لله صراحة صراحة صراحة لأني اتكلم معه بالهاتف ....واعلم ان الامر لا يشجع عليه الكثيرون ....ولكن هو امر كان بعلم والدتي طبعا و دلك لفترات متباعدة و بغية التعارف الامثل لا غير ..........

ما اكتشفته في هاد الشخص هو انو الحق الحق ناس ملاح و اللي في قلبو على لسانو ..... وقد صارحني بماضيه الاسود خاصة بخصوص انو كان يعرف عاهرات و هن الللاتي كن يعرضن انفسهن وطبعا هو كان على حد تعبيره يعيش في حياتو وكان الامر عادي لأنها فترة صغر وكل الشباب مر بها وانه كان ضايع لدلك مشى في دلك الطريق ولكن الآن راه تااااايب .....ومحال يعاود يرجع لهداك الامر بالرغم من انو يجاهد نفسه حق الجهاد في هاد الموضوع لأنو صعيب عليه على حد قوله .

انا والله نيتي صافية و ناوية الزينة ....قلت ادا كان ربي غفور رحيم ...علاش نشوف لماضيه ؟؟؟؟

نشوف ليه في المستقبل .... ونقولكم الصح : قائمة وعود حطهالي وصرح بكامل العبارة انو مكانش داير الزواج في بالو ولكن راه الآن معول عليه وراه تغير على جالي 180 درجة وراه عندو ربي ومن بعد انا ......وقال اني انا الآن امو واختو وزوجتو المستقبلية .......

سؤالي هو : ..........ياترى كيف اتاكد من انو يقول في الحقيقة ومراحش يعاود يجيه موال النسوة ؟؟؟؟

............................كيفاش نتاكد انو تاب فعلا او لا لا ؟؟؟
............................نقولكم الصح خايفة نتعب معاه مرة اخرى سيرتو راه شايف و عارف اشكال و انواع ....

واحد مكانش داير الزواج في بالو ومن بعد قرر انو يتوب ويبنب حياتو ....... مع انو مرات يغير من صحابو اللي يفعلو الحرام ---- بين قوسين لأنهم مزالو يستمتعو بحياته ---- في نظرو هو ........... إلى اي حد ممكن يقدر يقعد كتحكم في روحو ؟؟؟؟؟؟؟ أم ممكن يعاود يرجع لطريقو الاول نتاع الحرام و الا والو ؟؟؟؟؟؟

اشيرو عليا جازاكم الله

[amel03l]

allah koun m3ak lazem sa7 ykoun teb l rabi sab7anou et pour mou li tab ma yab9ach yghir o ya7ssed f s7abou li ydirou la7rem normalement ychouf bali rahom fi dalel o howa raho f tri9 el sa7i7 o wach n9olek akhti diri salet el istikhara

[SKYALGERIA]

أختي الكريمة باب التوبة مفتوح إلى يوم الدين و ربما جعلك الله عز و جل سبب لتوبته و هدايته فأبشرك بأن لك الأجر الجزيل لأنك ستخرجيه من وحل الذنوب و المعاصي و لكن بخالص النية طبعا . حاولي التقرب منه أكثر و بأن تذكريه بأمور الدين مثل الصلاة التي هي عمادها . أنا هنا لا أشجعك على الكلام معه في الهاتف دائما لأنه منافي للشرع و لكن بطريقة ذكية حاولي أن تقفي معه و ربي يكمل بالخير إن شاء الله .

[أم عبد الكريم]

اختي واش رايحين نقولك حنا اتسخير الله و زيدو سقسوا عليه مليح و راكي تعرفي شباب اليوم فيهم غير الهدرة

[anissa90]

و الله امرك حيرة اختي اصبري ربي يرزقك برجل صالح هذا ما راهو فيه حتى حاجة تفرح ني قراية ني خدمة فوق هذا ماضيه اسود خمر و و و على كل حال ربي غفور رحيم اولا قومي بصلاة الاستخارة امتلعبيش بوليد الناس مهما كان ماضيه لازم اجابة نهائية
في راي ارفيضه بدون تردد الان خير من بعد الزواج ترجعي لدركم و البكاء و الندم اسمحلي على هذا الكلام هذا الرجل راه فات قمة الانحراف مثلا لو اي رجل تقدم ليك و اكتشف عندك ماضي او حاجة صغيرة برك يفصخ الخطوبة ربي يهدينا

[~أمة الله~]

وعليكم السلا م ورحمة الله وبركاته
الله المستعان ،، الأمر صعب جدّا أختي ،، ننصحك تتريثي ، وتكثري من الدعاء والاستخارة
التوبة النصوح أمر طيب ، لكن لها علامات أختي ... من المحافظة على الصلاة والاستقامة على أمر الله وغيره من المظاهر التي تدلّ أنّو هذا الإنسان صح تاب
لكن المُخيف في أمره أنّه مازال يحنّ إلى تلك الحياة كما قلتِ ومازال يغير من صحابو أنّهم مازالو على الحرام والعياذ بالله ، بل ومازال مع هذه الصُحبة السيئة الفاسدة والله المستعان ، يمشي معاهم ويعرف أخبارهم !!!
لذلك، حاولي تعرفي هل هو محافظ على صلاته من محيطه وخصوصا سؤال الأهل عنه، وحاولي تتوقفي من الكلام معه في الهاتف ، لأنّه شرعا لا يجوز وأيضا يأثر على مشاعرك ، يعني أنتِ إنسانة طيّبة وممكن يغيضك ، لكن في هذه الأمور حكّمي عقلك مليح..
والله أعلى وأعلم
وفقك الله وفتح عليكِ

[el majrouha]

اختي ابتعدي عن هذا الشخص الذي كان اخلاق سيئة ، لي فيه طبع مايتغير وكذلك المستوى الثقافي مختلف اختي ستتعبي معه كثيرا
تزوجت من شخص كان ماضيه اسود ووعدي انه يتغير وانني كل اهله وبالفعل تغير الاعوام الاولى وبعدها رجعت ريما لعدتها القديمة ولم استطع التحمل وتطلقت
في الحقيقة ان الله يهدي من يشاءوممكن انه تاب ولكن من الاحسن
صلي صلاة الاستخارة وربي يكون معك

[سجود نور الايمان]

السلام عليكم
اختي استخيري الله و اسمعي راي والديك هذا الشخص مازال يحن الى ماضيه و يحسد رفقائه على الرذيلة و الحرام و هذا الامر لا يطمن انا لو مكانك نرفض مباشرة
ربي يجيبلك لي فيه الخير

[ولد حمد الباتني]

اذا تسمعي للهدرة اخطاكي

[dahmane42]

السلام عليكم أختاه
المهم لا يهم مستواه . أما بالنسبة للماضي لماذا نحكم عليه انه كان و كان .....
باب التوبة مفتوحة المهم يكون رجل صادق مسلم يؤدي الفرائض الخمس
و الراي يبقى لك ان شاء الله

[إكليل]

أختي صلي صلاة الإستخارة و أكثري من الدعاء .

و أضيف لكي شيئا اختي إذا كان هذا الإنسان تاب قبل أن يخطبك او أن ينوي الزواج لربما.
لكن أنه يقولك أنوا تاب بعدما أراد أن يقترن بك فهذا أمر يدعو للريبة لأن معظم هؤلاء الشباب الضائع لما ينوي الزواج يقول أني تبت فقط لكي تقبل به أسرة البنت و بعد الزواج لا شيئ يتغير.
ربي يكون في عونك و يسرلك أمرك و يسهلها عليك إن شاء الله.

[samar alil]

walahi ya okhti wach ngolak sali giyam lil abgay sali nfaraj 3lik rabi wsali salat istikhara rabi yrzagak wa iyana bwlad lahlal anchalah osbri ina lah ma3a sabirin

[samira135]

مش رايحة نكون مثالية ونقولك وافقي عليه وان الله غقور رحيم ووووووو

إذا قبلتي تكوني مجنونة و تكوني دمرتي حياتك خمي مليــــــــــــح مليـــح أختي

لانو هذا باين ماهو مندم ماهو ناوي يتوب توبة نصوحة يعني عرف ربي غير كي عاد راح يتزوج وحب يتوب وهو عازب لا يعيش حياتو !!!

++++ مش يخدم و ماعندو حتى مستوى و صحابو ضايعيين وهو شارب الخمر و زنى ووووووو مافيه حتى صفة مليحة غيـــــر وعود رايح نتوب و رايح نخدم وووو
في ميزك اصدقاء السوء راح يخلوه يتسقم ؟؟؟

[سجل أنا جزائري]

ما عجبنيش كي قال كل شباب يكون صغير يعيش حياتو ؟ شكون هو حتان يحكم على ناس اذا غلط ما يبررش غلطة بالتعميم

كل شباب يعرف حدو و يخاف ربي صغير و لا كبير جامي يدني لطريق هذيك

لازم تسقسو عليه مليح شافو اذا راه يصحلي في جماع شوفو اذا مزال يصاحب في صحابو لقدام لأنو من شروط التوبة هجران أصدقاء السوء اما اذا كان معهم حتى تاب صح يولي

يولي و زيد صلي الاستخارة و ربي يسهل ان شاء الله

[meriemtlemcen]

أختي ، الزاني لا ينكح الا زانية ... بالنسبة لي اخطييييييك واش راه دايك لهاد الزوااج
نتمنالك الخير بصح الزواج مش ساهل ومش بين ليلة وضحاها الانسان يتوب وميرجعش
أختي اخطيييييييييك
وفالاول والاخير القرار قرارك وزيدي استخيري
أنا مين نخطبت شهر وأنا نسقسي على خطيبي
وكان أنا كيفك مستحيل نوافق مستحيل ندي حتى واحد يدخن مش عاد زنا وكيف وخمر !!!!!!
وهادي باينة بلي فالتيليفون يبان مليح .. العشرة حااااااجة أخرى تماماااااا
وربي يقدرلك لي فيه الخير