كاين ناس قاسية كيما هاك

[ادرة مكنونة]

السلام عليكم اعزائي


اليوم قعدت مع عجوزتي نتحدثو وهي معي في البيت والحمد لله حكتلي حكاية عجيبة عن امراة جارتنا انا بدات بالسؤال قلتلها جارتنا تحب اولادها الاثنين كثيرا قاتلي يا بنتي كون تعرفي قداش قاصت عليهم تحيري قلتلها احكيلي حكايتها بدات تحكي قاتلي


كانت هاذ المراة اجمل جميلات المدينة تزوجها رجل ونجبت ولد ولما حملت بالثاني طلقها زوجها لمشاكل بينهما اخذ الولد واخرجها وهي حامل وقال لها انسي ان لكي ابن ولما راحت لبيت اهلها قال لها ابوها ولدو منحبش يجيني لداري انسي ولدك وحتى الي في بطنك باش نعطيهولو كي يزيد بكت المسكينة وبدا الجمال يذبل ولكنها مصدقتش اباها قالت غير متقلق برك ميديرهاش المهم لما ولدت اليوم الثالث وهي نائمة اخذ ولدها وراح في الليل لبيت زوجبنتو واعطاه الطفل استيقضت المسكينة لم تجد ه بجانبها قالت لامها اين ابني ردت الام راو راقد في حجري باقي يبكي هزيتو باش ترقدي شوي قالتلها اي امالا نزلد نرقد تقطع قلب امها الي معندها واش تعمل زوجها واعر متقدرش عليه وكي عرفت الام الحقيقة جن جنونها وعيطت وجتها صدمة نفسية داخت وراحت في غيبوبة

يتبع

[ادرة مكنونة]

اين الردود نكمل ولا لاا

[مسلمة بالفطرة]

كملي أختي من فضلك راكي شوقتيني وثاني انا نتعلم الدروس من تجاربي او تجارب الآخرين

[s english]

ومبعد واش صرا كملي رانا نستناو

[شوشو 11]

شكرا على الطرح
يابنتي علاش تقطعيلنا قلوبنا اسرعي كملي
ربي يستر من القلوب القاسية

[AyOuB0587]

الله المستعان
في انتظار باقي القصة

[ادرة مكنونة]

اسمحولي كان عندي ما عطلني عليكم والان نكمللكم لحكاية بعدما جتها المسكينة صدمة قعدت هاكاك سنين وهما يداواو فيها معلبلهمش بلي دواها اولادها استسلمت لما اراد الله لها وكملت حياتها تزوجها رجل اخر وعدها بان يرجعلها اولادها غمرها بالحب لبسها الذهب والحرير لكن السعادة هربت من قلبها مرت السنين والمسكينة حابة غير تشوف اولادها برك كيفاش صارو وكبروا

[ادرة مكنونة]

وسمعت بلي ولدها الكبير يقرا في السنة الاولى في المدرسة الي بجانب منزلها صرت كي المهبولة كل يوم تعس واقفة على الباب تشوف الاطفال وتقول لعل هذا ابني تمدلهم في الحلوى باش يجو حتان حبوها وقالتلهم على اسم ابنها جابوهولها وطاحت اعليه تبكي مسكينة وتقولو انا امك بدا يرجعلها الامل وقاتلو ديما ارواح لداري

[فاطمة الزهراء.]

كملي اختي

[ادرة مكنونة]

راح الطفل حكا لزوجة ابيه واش صرا وهي حكات لباباه حكمو ربطو بالحبل ودرباه في البير عاد يعيط مسكين وقالو منزيدش اروح وقالو مزلت اتروحلها نرميك في البير عيات مسكلنة واقفة قدام الباب تتسنى

[الصديق قروف]

ربي يهدي ماخلق
كملي

[ادرة مكنونة]

شافاتو من بعيد وهو شافها وراح صارت ديما هكا لكن حمدت ربي المهم تشوفو كل يوم وبدا يكبر هو وخوه وعرفو الحقيقة وديما الحق هو الي ينتصر رجعو لامهم كي كبرو والان رام ساكنين معاها هما وازواجهم تغمرهم السعادة يحبوها ياسر وهي كذلك واحفادها دايرين بيها والكل يتمشو بشورتها هذا الكل نتيجة الصبر والتضحية وان القلوب القاسية تخاف غير على نفسها والسلام عليكم

[mina1333]

هيا كملي رجاءا راكي شوقتينا للنهاية

[راضية بقدر الله]

والله امر قاسي ربي يهدينا ويصلح امورنا وامور المسلمين اجمعين

[أم شروفة]

امي قاتلي قديما كانت المرأة لما تتطلق الاولاد يديهم باباهم .وممنوع على الأم رؤيتهم .على حساب العرف في العرش .لذا كانت المراة تصبر وتتحمل لأجل شوفة أولادها فقط .ربي عوض امهاتنا في الدنيا والاخرة