اريد حلا لخطيبي و الهاتف

[مشكلتي]

السلام عليكم و رحمة الله تعالى و بركاته

ان شاء الله نلقى عندكم الحل او لفاتت عليه حكاية كيما حكايتي يقلي و خاصة فئة الشباب

اولا انا فتاة 25 سنة من عائلة محافظة و الحمد لله فتاة مثقفة و لدي مستوى جامعي تقدم لخطبتي شاب فاعجب به والدبا على انه دو خلق فتمت الخطبة و الحمد لله و لكن ان الشاب ما جاش في الرؤية الشرعية و معليهش بعني معندي حتى اتصال بيه و لا نعرف عليه حتى حاجة تاريخ ميلادو صدقوني منعرفوش فاتت و بقيت استنيت و قلت بلاك مازال حتى نديره الفيونصاي و الفاتحة و نتعرف عليه فاتت شهر و نص على الخطبة و عملنا الفيونصاي و اول مرة نشوف خطيبي كي جا باش يلبلسي الخاتم و تصورو كي جا محكاش معايا هو ساكت و انا ساكتة قلت معلبهش يلاك حشم برك قدام النسا فات الفيونصاي و الفاتحة على خير و الحمد لله كل يوم نستنى نقول بلاك يبعتلي مع اختو باش يحكي معايا والو دوك فاتت علينا قريب 5 شهر و خطيبي مشفتوش من نهار لبسلي الخاتم و دوك انا عرسي الى كتب ربي في مارس

يعني هدا نورمال ميحكيش معايا؟؟؟
انا قلت بلاك ماهوش قابل واش رايكم يا اخواتي في الله
انا حبيت نحكي معاه اوموا نعرف عقليتو و خاصة كي قرب عرسنا و لا نسقسيه على كاش حاجة يقلي واش لازم ندير واش ملازمش
واش رايكم هادي حاجة عادية و لا كيفاش


انتظر ردودكم
سلااااااااام

[محمد جديدي التبسي]

وعليكم السلام ورحمة الله وبركاته
عائلة محافظة ويلبسلك الخاتم ما دخلتش راسي اسمحيلي اختي شخصيا انا ما نرضهاش لاختي وما نديرهاش بإذن الله
المهم تكونو متأكدين أنه ذو خلق وسمعته طيبة بين الناس
أما الهاتف فهو يخرب العلاقات فقط خاصة اذا كانت خطبة فقط
لو كان درتو العقد ربما من حقك تتسائلي لكن ربما هذا الشاب واعي ومسؤول ومادم الزواج قريب عادي ما تقلقيش روحك وزيدي استفسري من اختو بطريقة ذكية..ربي يسهل

[nadjet boumaraf]

من حقك تعرفيه أنتي شخصيا قبل الزواج ومن حقك تحكي معاه في الهاتف في حدود ديننا الحنيف ...نصيحتي ليك لازم تتعرفي وتشوفي افكاروا طموحاتوا شروطوا عقليتوا وبزاف صوالح ...الزواج في وقتنا مش ساهل...

[مراد سابقا]

اسالي عنه جيدا لربما هو مجنون او مريض نفسي او به عقدة من النساء

الكثير من العائلات تتسر على ابنائها الحذار

[mrmilano1984]

ربما الانسان جد خجول انا ايضا نخجل وطبيعتي حشام بزاف المهم حاولي تعرفي ليه امور وشوفي اوك ان اء الله فيها خير ماتتقلقيش كل عطلة فيها خير بلاك هدا الانسان ناس ملاح وترتاحيلو مع الوقت كي تعرفيه ويعرفك المهم ماتسمعيش للناس بلاكي يخربو الديار 25 سنة سن جد مناسب للمرا باه تتزوج وتدر دار بلاكي تتشرطي تلقاي روحك 35 سنة مش مزوجة وتعرفي الالسنة

[jamaltahar]

ربما هو خجول كما قالت الاخت الهاتف مايجيب غير المشاكل لكن ادا حبيتي تعرفي عليه سقسي خوتاتو او احد م معارفو على اشيا ونصيحة من اختك الراجل ماتعرفيش طباعو الا مابعد ماتعاشريه انتي تعرفي بلي مليح وعندو اخلاق عالية والباقي تكتشفيه بعد الزواج وش حب وش يكره المهم انسان خاطيه وعاقل ومتدين ربي يهنيك و يسعدكم ببعضاكم

[مريم الصابرة]

السلام عليكم أختي الكريمة
الف مبروك والله يكمل إن شاء الله يا رب
الحقيقة وبكل صراحة هذا ماراهش عادي يعني راكي مفتحة مرتو معناها شرعا مافيها والو لما تتفاهمو يعني كيفاه تروحي تتزوجي براجل حتى ما تعرفيش كيفاه يخمم او واش ناوي ديرو فالدار او كل الامور اجمل فترات الحياة هي الخطوبة صح ما راكيش رايحة تخرجي معاه او شي لكن الهاتف عادي تتفاهمو ومش لازم كل يوم يحكي يكن على الأقل يتصل مرة كل اسبوع او مرتين وتتفاهمو لازم تعرفي عقليتو
الاخ جديدي مع كل إحترامي ليك ولشخصك وتفكيرك وين المشكل لما دخل فالفيونصاي امام اهلها واهلو وفتحو وداور خاتم راه زوجها هذا ماجابتش راجل من الشارع ومحرم عليها وفحضور اهلها واهلو دار الخاتم وراح علاه كاين مشكل كاين امور البعض يضخم فيها هذا حلال زواج مش يعني لاقاتو في مكان غيرهي وياه عاءلات محافظين جدا ونعرفهم ودارو نفس الحفلات الخطوبة وفحضور الاهل وعادي جدا هذي راجعة لكل واحد وتفكيرو
والله مش قصد نشوش تفكيرك لكن ممكن مش حاب الزواج هذا لانو غير معقول واحد خاطب وحدة وما يحوسش عليها الوقت هذا كلو
موفقة

[loulou88]

السلام عليكم
انا لدي معلومة والله اعلم ان كنت خاطئة :
استاذي في الشريعة لاسلامية ان يجوز للرجل ان ينظر الى وجه خطيبته وهي في بيت اهلها وكان محرم معها ويجوز لهما مناقشة امور الزواج واعطى لنا مثالا كأن يطرح الخطيب على خطيبته موضوع الإنجاب وماذا يريد ان يأكل وغيرها من المواضيع التي يفرضها الزواج (الخطيبة هنا بمعنى انه تمت قراءة الفاتحة بينهما بحضور ولي الفتاة وشهود |)
كما انه قال لنا ان الخطيب يمكن له ان يلمس يد الخطيبة ...هنا الله اعلم ليس لدي دليل
من لديه معلومة صحيحة ينر لنا بصيرتنا
وبالنسبة لخطيبك ربما خجول جدا من الافضل ان تتصلي بأحد اقاربه
شكرا

[دموع الثلج]

السلام عليكم
اولا بارك الله لكما وجمع بينكما في خير,لا داعي للقلق اختي فهدا شيئ طبيعي و عادي بادن الله.بخصوص الهاتف فانا لا احبده لانه يجلب المشاكل عموما و الكدب على الطرف الاخر اما عقلية الرجل لا تعرفينها الابالمعاشرة وهده عن تجربة و انا لم اكلم خطيبي في الهاتف في ايلم الخطوبة و الان الحمد لله جعل الله بيننا المودة و الرحمة.لا تستعجلي و دع الامر حتى يقع وقديما قيل:من استعجل الامر قبل اوانه عوقب بحرمانه.

[magister]

السلام عليكم
الف مبروك يا اختي وربي يتمم بالخير عليك ويرزقكم الذرية الصالحة والسعادة ان شاء الله
انا عندي صديقة حصل معها تقريبا نفس الشيئ.لكنها كانت عادية جدا ومتقبلة للوضع .........واكثر من دلك كانت مسرورة من الوضع ...................هي كان بنظرها احسن لاجتناب الكلام دون فائدة والمشاكل التي تحصل من وراءه............اضافة الى الرجل الدي كان بنظره انه حرام رغم انه متعلم لكن اعتقاده الكلام بالهاتف حرام الى غاية حصول الزواج.لانه عندما كلمته اخته بالموضوع قال لها انا لا احب ذلك وعندما تبقى زوجتي امام الله والناس سنتكلم كتيرا............
ربي يسعدك

[محمد جديدي التبسي]

المشاركة الأصلية كتبت بواسطة مريم الصابرة

الاخ جديدي مع كل إحترامي ليك ولشخصك وتفكيرك وين المشكل لما دخل فالفيونصاي امام اهلها واهلو وفتحو وداور خاتم راه زوجها هذا ماجابتش راجل من الشارع ومحرم عليها وفحضور اهلها واهلو دار الخاتم وراح علاه كاين مشكل كاين امور البعض يضخم فيها هذا حلال زواج مش يعني لاقاتو في مكان غيرهي وياه عاءلات محافظين جدا ونعرفهم ودارو نفس الحفلات الخطوبة وفحضور الاهل وعادي جدا هذي راجعة لكل واحد وتفكيرو
والله مش قصد نشوش تفكيرك لكن ممكن مش حاب الزواج هذا لانو غير معقول واحد خاطب وحدة وما يحوسش عليها الوقت هذا كلو

بارك الله فيك اختي مريم مع احترامي ليك
العائلات المحافظة عندنا أمّ الشاب هي اللي تلبس الخاتم
مع إنو هذا الخانم ليس من عادات المسلمين المفروض مكانش أساسا
وللأسف اللي تلبس خاتم واللي يلبسها خاتم عايشين كي المتزوجين في مجتمعنا وهذا خطأ كبير
انا نقولك عادي ما يحوسش عليها لأنها ماهيش زوجتو
لانو المفروض المخطوبين راهم غرباء على بعض حتى يديرو العقد
وكاين اللي عاقد وما يحكيش مع زوجتو عادي لأنو يرفض فكرة الهاتف ويعرف انو كثرة الحديث تجيب الدصارة والمشاكل وممكن يعود في فسخ خطبة ولا طلاق قبل الدخول...والله اعلم انا نقولها ما توسوسش روحها والسلام

[نسائم الهدى]

نقولك اختي؟

لوكان انا ما نديرش فيه ولا في اهلو كونفيونس

لانو خالتي مسكينة صراتلها من قبل و صابت روحها متزوجة واحد بسيكات يشرب لي كاشي

كان ما يعيطلها في التلفون ما يجي لدار جدي يشوفها ما تعرف عليه والو

فينالمو شربها المر قريب هبلها مسكينة

هكداك انت ما تآمنيش الناس

الزمان راه واعر و الناس كتر

و لوكان انا ما نسكتش

سوووووووور تو كي عاد راكم مفتحين لانو العقد الشرعي هو الاهم

انا هدا رايي و انت شوفي اللي يليق عليك

و ربي يكتبلك الخير ياااااااااااا رب

سلام

[naamane3]

قبل كل هته التساؤلات
هل استخرت الله ؟؟؟؟؟
اكيد لا ولو كنت استخرت
لذهبتت معظم هده التساؤلات
استخيري فما خاب من استخار
كما قال رسول الله صلى الله عليه وسلم

[heureuse05]

من حقك تسمع صوتي وتعرفي لوكان ايكون عقون و لا لسلوس ولا يخنشش لازم تحط النقاط علي الحروف

[سفير الأيام]

انتي حابة راجل بكلمته ولا واحد تاع حكايات

هدا عرفي مدام ما حكاش معاك في التيليفون يعني خايف ادا تشوب علاقتكم مشاكل وحرومات

الهاتف واعر بزاف وخرب بزاف بين المخطوبين صبري ومدام كاتبه لك ربي غادي يجي نهار وين تعرفيه مليح

وهو ادا شاف حاجة تستاهل غادي يتصل بيك