هل هذا هو حق الجار على الجار ؟؟

life is life · 2014-10-22, 12:30

السلام عليكم
انا اتحدث و باستغراب شديد من موقف حصل الآن
انا الان وحدي بالبيت و اهليغائبون و هذا هو الوقت الذي تمر فيه شاحنة النفايات "" حشاكم

فقلت ارتدي حجابي و اخرجه

فأتفاجأ بكومة كبيـــــــــــــرة من الساشيات تاع الزبل حاشاكم و هادو غي درك شغل خاطرش قبل ما يروحو اهلي ماكانوش هاك

المهم تشوكيـــــــــت
ما صبت ما نقول المهم انا خرجت ساشيات و دخلت بسرعة و بقيت نترقّب من لويْ دو بوف حتى فاتو رجال التنظيف
و هم بدورهم مندهشين من الامر
المهم و الله ما عرفت ما ندير و القضية موش قضية نفايات برك درك راهي كاين اوساخ منتشرة على العتبة و ما نقدرش حتى نخرج نظف حدا لباب لانو يتجسسو و انا غير باه خرج الساشية حشمت
و زيد هذا يشوه منظر البيت راكم عارفين وو

درك قولولي واش هاد الشي هذا وين راهي التربية وين الاخلاق

كل واحد عندو طروطواره علاه كلش انجمع حدانا

راني مشوكيا تاع الصح

life is life · 2014-10-22, 12:36

جاوبوني يا خاوتي !!

loubnasari3a · 2014-10-22, 12:41

هدا هو الشعب الجزائري يا اختاه تحبي و لا تكرهي العقلية مش راح تتبدل و لوكان اتبعي راح تتقابضي مع قاع الناس امالا غير بالعقل برك و ربي يجيبها فالصواب

life is life · 2014-10-22, 12:47

اقتباس:

المشاركة الأصلية كتبت بواسطة loubnasari3a

هدا هو الشعب الجزائري يا اختاه تحبي و لا تكرهي العقلية مش راح تتبدل و لوكان اتبعي راح تتقابضي مع قاع الناس امالا غير بالعقل برك و ربي يجيبها فالصواب

اللهم آميــــــن يا اختي مي هذا كأنو عمل مقصود لانو صرا غير بعد ما بقيت وحدي
لوكان جا كاش واحد فالدار ما يديروهاش

الله يهديهم و لا يديهم

اللهم ثبت علينا العقل و الدين

ام ملاك. · 2014-10-22, 13:18

هههه فكرتيني في قصة صراتلي درك نحكيهالك
انا ساكنة في عمارة من 3 سنين تقريباوعندي بنتي صغيرة كي نخدم الشغل لازم هي ثاني تخدم واذا سيقت بالتعفار معاها خاطرش تدخل روحها هي ثاني وتشمخلي لحالة بعدمانشفت المهم وليت كي نحب نسيق سورتو حتى ترقد باش نسيق يالوكان في الليل
المهم النسا نتاع الباطيمة كي يحبو يسيقو عادتهم يدقدقو على كل الجيران باش يتعاونو وانا والله لوكان مش بنتي نخرج نعاونهم بصح علابالكم بالما واللي يصير في الدروج نخاف كاش مايصرالها بعيد الشر واصلا ماتقعدش طرونكيل بنتي تجري يعني مانفرى نسيق ولا نعسها
المهم دقدقولي بزاف فهمتهم عندي طفلة صغيرة مانقدرش ماشي مرة ماشي زوج وهوما يدقدقو مافهمتش علاش الاصرار والالحاح مع انهم نفس النسا
ومرة جاتني عجوز قاتلي اخرجي تسيقي معانا فهمتها عندي طفلة مانقدرش قاتلي خليهاا لباباها( يعني في ميزها باباها قاعد في الدار مايخدمش ) هههه
قلتلها ماكانشو راني وحدي بدات تهدر ولازم ولازم انا غلقت بابي وقلتلها اسمحيلي ماحبيتش ندخل معاها في نقاش بحكم انها عجوز
امباعد ولاو يديرولي الزكارة كل مايلحقو قدار دار يبداو يخبطو في باب الحدي بالقوة بالباليات والفروطوار الميت ينوضوه
نبقى منيرفية وساكتة نغلي غير من الداخل
يامات واش ولات تديرلي واحدة من النساء خاطرش تسيق بالتويو ولا ت تدخلي التويو من ثقبة عندي بين باب الحديد والحيط ونبقى الدار معمرة بالما مرة خرجتلها قلتلها والمشكل كنت غير كيما سيقت اغتمنت فرصة بنتي رقدت انا كملت حاشاك كنت في الدوش نسيق فيها كملت خرجت نلقى الكولوار يعوم قريب يوصلي الما لزربية الصالون وشمبرتي خاطرش قدام الباب دخل لنصها قلقت بزاف خرجت قلتلها علاش تدير يهكذا قاتلي راني نسيق وقلتلها كي تسيقي تدخلي الما لديار الناس ؟
قاتلي نغسل في الحيوط ؟؟؟ كيفاش تغسل يالحيوط والباطيمة قع حيوطها مسخين يعني جاتك غير قدام داري وليت نغلي مع انو عندي درجة طالعة باش مايدخلش الما بصح باين بللي بلعاني
رميتلها الما كامل بالفروطوار وليت نغلي
قلت لراجلي قالي واش ندير اهدري معاها بينكم نتوم النسا
روح روح ولات كل ماتسيق نفس القصة تدخلي الما للدار ماخافت يكون تريسيتي في الارص ماخافت تقول بالاك ماكانشها كاش ماتصرى ماص تريسيتي يعني وجهها صحيح وزيد قبيحة
اخر مرة فاض بي الكيل خرجتلها قلتلها علاش هاذ المنكر
قاتلي ايه لازم تخرجي تسيقي معانا قلتلها مانسيقش
وياللي قلتلها هكذا نسمع فيها مور الباب اللي يجي تعاودلو هدرتي زعما راني ظالمتها ونسمع هدرة النسا كل واحدة واش تحكي قلت والله مايهموني
بصح دعيت لربي تغششت بزاف
من بعد يوم او يومين والله العظيم انا هابطة نشري في الحانوت تحت الباطيمة نلاها واقفة هاذ المراة هي وراجلها التحت منيرفيين مع الاول مافهمتش من عادتي مانحبش ننقرعج على ناس مانعرفهمش ومايهمونيش كي جيت مولية شفت بللي طاحت حاجة على سيارتهم وتكسرالباربريز نتاعهم تدقدق
وهي تخزر في واحد الخزرة
المهم طلعت كي جاراجلي حكيتلو قالي مانعرف واش رماو عليهم وتكسر
ايعني المفيد من هذاك اليوم ولات كي تسيق مانسمعش صوتها نهائيا حتان كي نخرج كاش مانشري ولا مع راجلي نلقى الباطيمة تشعل ههههه
القصاص هذا واش صرالها فهمت بللي من عند ربي كيما كانت مش عاملة حساب للجيرة وظلمتني وتعدات على حدود بيتي ربي جازاها واعطاها لليوم يسيقو بلا مانسمع حسهم
كل مانتفكر نضحك على هاذ القصة تقول فيلم
العبرة يااختي ولاو الجيران درك قليل وين تلقايهم يفهمو ولايديرو حساب للجار ولا يقادروه الكل ماعلابالوش وكل واحد يدير اللي تخرج عليه
وكلي امرك لربي ورايح يجي نهار يديرولهم كثر مادارولك
وماتخرجيش مادام والديك ماكانشهم في الدار كي يرجعو هوما يهدرو معاهم
ربي معاكم ع جيران اليوم

loufa · 2014-10-22, 13:32

بنتي اتفكري قصة الرسول صلى الله عليه وسلم مع اليهودي اللي كان يرميلو الوسخ قدام بابو والرسول يرميه وينظف ومرة ملقاش الوسخ سال على الجار قالولو مريض راح زارو
انا نقولك هكذا حتى يتنحا عليك
وكلي ربي وخلي لما يجيو اهلك يتصرفو

موسى عبد الله · 2014-10-28, 09:04

السلام عليكم أختاه اصبري و فوضي امرك لله

سآجدْ للهْ · 2014-10-28, 11:33

اقتباس:

المشاركة الأصلية كتبت بواسطة loufa

بنتي اتفكري قصة الرسول صلى الله عليه وسلم مع اليهودي اللي كان يرميلو الوسخ قدام بابو والرسول يرميه وينظف ومرة ملقاش الوسخ سال على الجار قالولو مريض راح زارو
انا نقولك هكذا حتى يتنحا عليك
وكلي ربي وخلي لما يجيو اهلك يتصرفو

الحكاية هاذي مكانش منها....

سآجدْ للهْ · 2014-10-28, 11:35

مع الجار تع اليوم
مرة دير روحك ما شفتش ومرة دير روحك ما سمعتش ومرة دير روحك ما علابالك بوالو وهكذا
المهم نتفادى تشعل النار برك خخ
وربي وصّى على الجآر ,, يعني الخلآصة انك تتفاداي الصدام

ولد حمد الباتني · 2014-10-28, 12:48

نفهم من موضوعك أن جيرانكم كي كانو داركم كانو يخافو يرميو النفايات قدام داركم، وكي عرفو داركم ماكانوش ولاو يرميوها قدام داركم ؟؟؟
عيب كبير شعب مازلنا حاصلين في الزبالة أكرمكم الله وين نحطوها وكيفاه نتعاملو معاها
قلة الحشمة قلة التربية بل إنعدامها، عيب كبيير
بصح حنا شعب تاع قوة هاذو جيرانكم مليحتلهم ترخيسة كبيرة على تصرفاتهم وترجع الزبالة اكرمكم الله قدام ديارهم ويديو الرخس كاشما يترباو

life is life · 2014-10-28, 13:00

شكرا اخواتي على ردودكم

واش عندي ندير داك نهار كنت وحدي في الدار مقابلة ولد خويا رضيع
كي جاو اهلي هوما نظفو قدام البيت كأنو مكان والو

قليل وين يصراو هاد امور يعني فقط كي نكون غي انا او امي في البيت

ايا ديما واحد يقعد في الدار كي يكون واحد من خاوتي واحد ما يتجرأ

يعني دركا لعب دراري تخرج يديرولك لبلاوي

واحد صابر و خلاص لا حول لا قوة الا بالله