عصبان برايجي ولا اروع بمناسبة عيد الاضحى

اينا · 2013-10-12, 11:07

بالسم الله الرحمان الرحيم

احبائي هذي اول مشاركة ليا معاكم نتمنى تعجبكم ونكون وحدة من عايلتكم جبتلكم اليوم وصفة العصبان بطريقة ناس المنصورة في ولاية البرج وهي طريقة مختلفة على المعتاد المهم اليكم الوصفة

اولا المقادير : دشيشة كيما لي نديروها في المقروط كمية غير محددة. نعناع متكثروش بزاف معدنوس.و كسبر خظورة حوالي 9-10 بيضات تعطي طراوة - نص كاس زيت المائدة - بصلة -7 سنينات ثوم - 3-4 حبات طماطم متوسطة الحجم - راس ولا زوج فلفل حار على حساب الرغبة بصح يعطيلها بنة هايلة مغرفة اكل ملح -مغرفة اكل زبدة او مرغرين او سمن حسب الرغبة - سبانخ مقطعة رقيقة ومنقوعة في الماء الساخن كذلك اختياري -قليل من الشحمة مقطعة قطع صغيرة كذلك اختياري كاين ناس ميحبوهاش . مغرف مرق ( نكونو حضرناه من قبل ببصل ثوم طماطم اعشاب توابل قطعة لحم مرقة حمرا عادية او كاين ناس يديرو من مرقة الطعام ) وكذلك نحتاج ابرة وخيط
اليكم الخطوات بالصور :

التحضير :نرحي في الروبو البصلة الثوم الفلفل النعناع المعدنوش والكسبر الطماطم الشحمة نفرغم في انا كبير نزيدلو الملح الزيت الزبدة السبانخ نزيد البيض ومغرف المرق نخلط جيدا ثم نضيف الدشيشة تدريجيا حتى نحصل على خليط متماسك لكن سائل يعني منجمدوهش من بعد نجيبو المصران الكبير ( يكون منظف مليييييح )او الكرشة ونحشيوهم ونخلو فراغ خاطر يزيد الحجم كي تطيب الدشيشة نربطوه بالخيط ونثقبوه بالبرة نحطوه داخل المرق الساخن لي كنا حضرناه ولا مع نرقة الطعام فوق النار حتى يطيب وحد 2 ساعة لوحي الموس تلقاي الخليط جمد من بعد تنحيه من المرق وتقطيه دوائر كاين لي يقدمو وحدو وكاين لي يقدمو مع الكسكسي واذا درتي في المصران نحيه خاطر ميتكلش نتمنى تجربوها خاطر روووووووووووووووووعة :19

نحطوه في المرق لي كنا حضرناه من قبل او مرقة الكسكسي حتي يطيب

وهاهي كي طابت :

المهم شهية طيبة وعيدكم مبارك ملاحظة تقدرو نتقصو الكمية وديرو غير ب 4 بيضات

nourtazmalt · 2013-10-12, 11:45

شكرا على الوصفة

هذا اللي نديروه نهار العيد في الليل

وهدا هو العصبان بارك الله فيك

كيما قلت يجي هايل

سَـآجدة · 2013-10-12, 12:15

شكرا على الوصفة

احنا نديروه اليوم التاني

اينا · 2013-10-13, 10:48

صباح الخير اختي ساجدة .الله يبارك فيك محترفة ارجو منك تفيديني في طريقة وضع صور مع الموضوع لاني معرفتش

ام نظال · 2013-10-13, 12:46

اتمنى تكون فيه الصورشكرا لك

اينا · 2013-10-13, 13:27

شكرا لك ام نضال

nounoudjs · 2013-10-13, 14:25

شكرا على الوصفة

غزة في عيوني · 2013-10-13, 14:34

اممممممممممم والله غير هااااااااااايل عجبني بزااااف شهتيني

خربشة ناعمة · 2013-10-13, 15:29

يعطيك الصحة اختي
بصح هادا المصران المحشي..
و العصبان كيما راهوا معروف هو انتاع الكرشة..

SABRINE44 · 2013-10-13, 15:40

شكرا على الوصفة

أم يونس01 · 2013-10-13, 15:51

يعطيك الصحة يا بنت بلادي

اينا · 2013-10-13, 16:30

شكرا لكي اختي حربشة ناعمة لكن نحن في منطقتنا هذا هو العصبان التقليدي الذي ورثناه ابا عن جد حنا منديروش نتاع الكرشة خاطر هي نديرها بكبوكة وهذا هو تنوع بلادنا الكبيرة لي نفتخرو بيه

اينا · 2013-10-13, 16:31

امين اختي ام انس بارك الله فيك وصح عيدك

اينا · 2013-10-13, 16:33

بصحتك اختي غزة في عيوني جربيه في هذا العيد وان شاء الله يعجبكم

اينا · 2013-10-13, 16:37

بارك الله في الجميع على الردود منكم نفيد ونستفيد