لكل عروس تحب طريقة تزيين البقلاوة

[ام حمزة22]

السلام عليكم ورحمة الله تعالى وبركاته
حبيت نقدملكم هاد البقلاوة علا بالي ما رانيش الاولى لي نقدمها بالاك كاين لي سبقني بصح انا حبيت نقدملكم بقلاوتي لي حضرتها لبنت حبيبتي
حبيت نقللكم انا اول مرة نقطع البقلاوة بهاد الطريقة وعجبتني بزاف
اولا نقدملكم الوصفة علابالي معضمكم يعرفها بص نكمل مزيتي ونحطهالكم
4كيلات فارينة
كيلة مشي معمرة نتاع ليدام
ماء الزهر حتى تنطم العجينة
بعد ما نطم العجينة نقسمها على قسمين القسم الاول لالطبقات السفلى والقسم الثاني لطبقات العلية نخليها ترتاح بضعت ساعات
نبدا نحل العجينة بالمشينة ب3 ارقام اي المرة الاولى بالرقم لي يخرج لعجينة خشينة نرش الطابلة مليح بالفرينة ونحط العجينة لي حلينها ثم نعاود نحل لعجينة برقم اخر اقل خشونة بلا ما ننسا نرش الفرينة على الطاولة ونزيد نكرر العمل 3 رقم
وفي الاخير نحل العجينة بالرقم الاخير لي يخلي لعجينة رقيقة بزاف ندهن السنيوة ونحط الطبقة الاولى وندهنها ثم الطبقة 2 وندهنها حتى نتحصل على 7 طبقات وفي كل طبقة ندهنها
بعد ما نكمل الطبقات نضيف طبقة اللوز انا درتو ماشي مقشر غسلتو ونشفتو في الشمس ورحيتو زدتلو السكر والقرفة ورشيتو بشوية ماء الزهر
بعد ما نضيف اللوز نرشو بشوية دهان ونبدا نضيفلو الطبقات العلية طبقة طبقة وطبعا ندهن كل طبقة بالدهان
بعد ما نكمل كل الطبقات ننزع الزوائد وما نارميش الزوائد نضيفلهم شوية ماء الزهر ونحضر بيهم حلوة الصامصة تخرجنا روعة من بعد نوريلكم الشكل ديالها
نقطع البقلوة نزينها بوردات بنفس العجينة ونرشقها بحبات اللوز ندهنها ونخليها ترتاح لبعض الوقت تقدري تخليها يوم كامل قد ما تخليها ترتاح جيك احسن
نطيبها نسقيها بالعسل الدافي حتى نغطيها مليح بالعسل نرجعها فالكوشة طافيا وسخونة باش تشرب مليح
نخليها تبرد نزينها بلدراجي ونغلفها بورق الشفاف
نخليكم مع الصور انتضر ردودكم المشجعة
وشكرا مسبقا
دمتم في رعاية الله وحفضه








[]