سلفتي مقدرتش عليها خلاص

[امينة مناد]

السلام عليكم راني رايح نطول اعليكم اشويا
انا وسلفتي ساكنين كيفكيف في طابق واحد احنا ماشي متفاهمين ماشي تع طابلة وحدا وقهوة يعني هذا القيناه من عجوزتي متحبش كي نكونوا متفاهمين
المشكلا ان سلفتي في وجها ايبان السم اديالها نحب انكون امليحا امعاها بصح هي ستوت مقدرتش اعليها بناتها متخليهمش يلعبوا مع بنتي الوغ انا اجبدت بنتي اعليهم وزيد كي انا كنت بلحمل دخلت بنتي تقرا في الجامع مع بنتها الوغ كي شافتني دخلتها خرجت بنتها وبدلتلها الجامع .......انتوما اتقولوا وعلاش .باش اومبعد كي نزيد مترحمنيش ومتديش بنتي في طريقها مع بنتها
انا في الجوف اديالي مرحمتنيش حتى التسياق يعني عندنا كولواغ واحد ودروج على برا كنت انسيقهم انا وهي مديرش دالتها ...........الي كارثة انها الان بلحمل غر زيدت انا رفدت الجوف هيا ودوك مراهيش تخدم انا راني نربي انحط اوليدي في لبوسات برا ونسيق ادروج هيا متخدمش
يعني وعلاه الجوف ياناس ماشي مرض اتسايس روحا كي لحبا تع البيض يعني وشنوا انا بونيشا وزيد اتقول اعليا بلي ماشي امليحا هذي الي تغيضني


وانا منقدرش انخلي الحالا مدودا يعني لازم انقيها وزيد منقدرش انروح ونقوللها عيب اعليك اخدمي شوي منقدرش


منعرف لتفهموني المشكل ماشي في الشغول المشكل اني نحس روحي خدامة اعليها ونحس روحي اضعيفة لخاطر منقدرش انصارحا ونقوللها نوضي لشوغلك ومنقدرش انعاندها ونخلي الحالا هكداك
ودوك بناتنا يدوخلوا يقراو في ليكول تحضيري كيفكيف يعني هيا بلجوف وانا انربي في وليدي اصغير انا انريسكي بيه ونخرجوا اصبح باش ندي بنتي ونوصلها يعني هيا العام ليفات مرحمتنيش ودات بنتي ونوما لوكان جيتوا في بلاصتي منديلهاش بنتها معايا ولا راني غالطا اعطوني حل صدقوني هذا مشكل اكبير بلاك ايبان اصغير بصح اكبير بنسبة ليا

[" أبو عبود"]

السلام عليكم
بسيف فهمت كلمة "بالجوف" يعني بالحمل. عموما نقلك إذا هي حابة تعيش في الوسخ تعانديها؟ زيدي كلمي راجلك يشوف الحكاية وزيدي بنتك بعيد عليها افضل ملي تكون مع بنتها مدام بدات من ضرك المشاكل. والسلفة راهي اوعر من الضرة والعياذ بالله. انت قومي بشغلك اخمي خدمتك وحاولي انك ما تخلطيش فيها وراه ربي يخلصها. زيني نيتك من جهتها وخليها لمولاها راه يخلصها عاجلا غير آجل.

[karimabatna]

ربي يكون في عونك ما تعانديهاش تلقايها عند ربي لولاد ما عندهم ما دخلهم انت كوني خير منها يجي نهار و تندم

[mounaminou]

madamek bdarek wahdek normalement matkalkich rohek bka couloir w droj ndon mach mochkil saykihom sa3a 3la sa3a bla matgoulilha tssayek ...el mohim eni sayki daltem wekhlass

diriha kelli makanch w hani rohek men etakhmam matedilek bentak mateddilha enti bentha hada makan

[لمسة من الماضي]

سلااااااااااااااااااااام

شدني الموضوع فاحببت ان اقدم لك نصيحة

انتما ساكنين مع العجوز ؟؟؟؟ و الا كل واحدة و دارها

المهم

بالنسبة لبنتها شو ذنبها طفلة صغيرة ديها مع بنتك للمدرسة بما ان طريقها هو طريقك و ربي يجازيك و يطرح لك البركة في اولادك

بالنسبة للشغل

شوفي الخدمة متقتلش بما انك بصحت خدمي سيقي و نظفي عادي اعتبريها غير موجودة و التفنين نتاعها ربي يجيبو لها غير في صحتها


حاولي تكوني بعيدة عليها لكن متعاديهاش سلام و خلاص حاولي تجنبيها بصمتك
و متحاوليش تعودي لزوجك امور النسا خليه بعيد احسن

و ان شاء الله تكون الامور على خير

[wassila21]

من رأيي أختي ديري الدار و كأنها دارك وحدك و ساكنة فيها غير أنتي، لازم تنقيها ، صح ولا لالا؟؟ أنتي أخدمي بنيتك و ما تعانديهاش خليها تقول عليك بونيشة هي ألي مكسرة اليدين، و على بنتها هي ما عندها حتى ذنب خاصة إذا كانت صغيرة في العمر أديها مع بنتك ياك طريق وحدة؟ إلا إذا شفتي بلي ما عجبهاش الحال خليلها بنتها

ربي يهنيك أختي

[الماسة النادرة]

علاش متقوليش لراجلك يقول لخوه وخلاص لانو الناس الي كيما هكذا لوكان تكملي معها تزيد طلع فوقك وتستغلك لازم تحطو النقاط على الحروف

[نجمة المستقبل]

السسلآم عليكمْ و رحمة الله و بركآته

أختي صحيح الظلم صعب لكن الاأفضل تكوني مظلومة على انك تكوني ظآآلمة ،
وسعي بالك و متقلقيش روحك و متخميش ياسر في صوالح ما تزيد ما تنقص ، يعني ديري الحاجة اللي تشوفي فيها مليحة و خلي سلفتك تدير اللي يريحها و حسابها بينها و بين ربي سبجانوا ،

بالمختصر المفيد اقتليهآ بالبآرد كيمآ نقولوا خخخخ
و كوني خير منهآ

فاذا قآبلنآ الاسآءة بالاسآءة فمتى تنتهي الاسآءةْ ؟؟؟



والله سبحآنه و تعآآلى قالْ :


وَلَا تَسْتَوِي الْحَسَنَةُ وَلَا السَّيِّئَةُ ۚ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ (34) وَمَا يُلَقَّاهَا إِلَّا الَّذِينَ صَبَرُوا وَمَا يُلَقَّاهَا إِلَّا ذُو حَظٍّ عَظِيمٍ (35) وَإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ ۖ إِنَّهُ هُوَ السَّمِيعُ الْعَلِيمُ (36)






















ربي ييسر لكْ أموركْ



سلآلآمْ ~~

[امينة مناد]

شكرا على كل الردود
في الحقيقة صدقوني خلاص ركبني الوسواس وليت نخمم غير فيها معلباليش وعلاه بصح الشيطان راه9و يلعب في لعبوا وحب يوقعني في المشاكل لازم انحبسوا عند حدوا
عاونتوني بكلامكم يعطيكم الصح ..............ربي يفرج علينا اجمعين

[نجمة المستقبل]

المشاركة الأصلية كتبت بواسطة امينة مناد

شكرا على كل الردود
في الحقيقة صدقوني خلاص ركبني الوسواس وليت نخمم غير فيها معلباليش وعلاه بصح الشيطان راه9و يلعب في لعبوا وحب يوقعني في المشاكل لازم انحبسوا عند حدوا
عاونتوني بكلامكم يعطيكم الصح ..............ربي يفرج علينا اجمعين

لآ دآعي للشكرْ أختيْ فالله في عون العبد ما كان العبد في عون أخيه
>>>>
متتوسوسي ما تقلقي روحك ، خلي الآفكآر السلبية بجهة و استغفري و توجور فوتيلها و عامليها باللتي هي أحسنْ
و ان شاء الله تتحسن الآمور بيناتكمْ

>>>>
ربي يفرج عليك أختي
سلآم

[ام مهدي2010]

انا نحير و علاش دخلو دراري فالوسط ربي يهديها اذا ما كانتش تقوم بواجبها وكلي ربي و خدمي الشي اللي قدرك ربي عليه و خلاص واش تدير ي تقعدي تعاندي فيها راسهم يابس و ما يفهموش راهم كاين عندنا كيفهم

[salem1985]

ننصحك انك تديريها كي الي ما تقرايهاش سيدي مبيكية وخلاص وهني راسك