لم اجد من الجا اليه رجاءلا تمرو على موضوعي

[اياد حياتي]

ساحاول قدر المستطاع ان اقتصر قصتي تزوجت منذ سنة ونصف من رجل يتيم هو الكبير عايلة مع خاوتو 2 ذكورا واخت كبيرة في السن الي كرهتلي معيشتي ديرلي اشياء استفزازية وانا كل مرة نطنش هي قدام الناس مسكينة ويتيمة وانا معايا دير حوايج وتسمعني مين ذاك كلام تخيلو البارح كنت في غرفتي وهوما كانو في كوزينة يفطرو ومجمعين مع اختهم المزوجة واخت الكبرى واخوه الصغير الي عمرو19 سنة الي درتلو قيمة اكثر من خويا انا كنت نرضع في وليدي وزوجي كان يدقدق في الباب بزاف وهما مسمعوش وكيكثر انا خرجت وقلتلهم مسمعتوش مساع وهو يدقق خرج خوه الصغير ورفد يدو عليا وقلي بنبرة خشنة علاه راكي طيري بمعنى تصرخي انا والله ما صرخت وهو كانو وحش حاب يفترسني شحال من مرة يدير هكذا وانا نساعفو ونقول صغير بصح البارح قتلو متزيذش ديرلي هكذا مانيش اختك وتنوض هي واش دارت مادارلك والو انتي هكذا وهكذا انا نصدمت ماشي كون عقلتو ولا تسكت بيني وبينو كبرت في الموضوع وقاتلي رانا في دارنا ودار ما مكان مادخلك دار ما بحكم هذه دار الورثة وكل مرة تقولهالي ونفوتها في وجه راجلي مانجمش يخرج ويخليهم وحدهم وهو يحوس يكمل البنيان وانا البارح قتلو والله ماني عايشة فيها منا للقدام في دار الورثة قالي مكانش وين تروحو وهو مانبا مقاليش كلمة حنينة وقالي معليش صبري في جالي قالي صاي انتي في حدك وهي في حدها وزد راحت شرات قاز جديد وقالت نطيب وحدي وهو حلف وقالها والله ماديري دارت كارثة سمعت كامل الجوارين واش نحكي واش نقول راهي قصتة طويلة ونقاطها
ما سبتش راجل حنين عليا خرج حتى 12 تاع اللليل باه دخل وخالاني نبكي وهي بدا يسكت فيها ويكالمي فيها
واش ندير واش ندير مارانيش قادرة نكمل كتبة

[زخات المطر]

صباح الخير أختي الكريمة
كبري باللك وربي يفرج عليك ان شاء الله بسكن وحدك

[اغادير]

ربي يفرج عليك.................

[ام مهدي2010]

اختي ما تديريش عليها و زوجك على حساب ما حكيتي عليه انسان حنين لانو ما حبش يوقف معاك قدام اخته الكبيرة اللي مسكينة يتيمة وو زيد فاتها قطار الزواج هي مسكينة تشوف روحها ما عندها حتى واحد و هو حاول يبينلها العكس اما بالنسبة لاخ زوجك صغير فهو بصراحة ما شي مربي لازمه تربية من جديد لو كان جا يفهم الاصول ما يرفدش يدو على مرت خوه مهما كان السبب انا نظن انو هاذا المشكل لازم تفهميه لزوجك و تبينيلو انك اذا خوه رفد يدو عليك مرة ثانية تلحق كبيرة بزاااااف يعني تهديد برك و اخت زوجك صدقيني المسكينة الكبيرة في هذيك الدار لانها ممكن تكون تغير منك لانك صغيرة عليها و متزوجة و هي لالا ربي يفرج عليكم اختي حاولي تصلحي قد ما تقدري و جربي ما تخسري والو لوكان تقربيها منك و تولي حليفتك مش ضدك اللسان لحلو برك

[بيان 5]

ربي يفرج عليك

[اياد حياتي]

يا اختي واش نقولك ماشي غير شريت وجبتها ليا بصح دور عليا نحيت على روحي وكنت نشريلها حتى خوه شريتلو بونك قريب مليون بصح مفيهمش الخير ودورك نقصت نييتي منهم

[لينة نور]

السلام عليكم

أكيد أنهم لم يسمعو ولاتنسي أن كلمتك تلك مستفزة ...[ اتهام غير مباشر ،هكذا يفهم كلامك ...]

الخلاصة لن تكوني أحن على زوجك منهم ، هم أهله، هم الاولين وأنت الدخيلة ...

لكن هناك الذي يربطك بهم هو ابنهم الذي عليك أن تحترمي أهله بتقربك منهم دونما يأس

اعملي على أن يكونو فخرا له لا العكس ......

[ المهم تكملو البني وتروحو لداركم ويبقى غير العيب ] اياك أختي وخطوات الشيطان .

[راية الاسلام1]

السلاام عليك أختي
حبيبتي طبيعي جدااااا ان يكون هذا رد فعل زوجك
هو مسكين نهار كاامل وهو في الخدمة وكي يجي تعباان ويحوس على الرااحة عوض ان يجد الحنان والحب يلقى المشااكل
والاكثر من هذا بين عايلتو وزوجته
كونني ذكية يااختي هي اصلاا تغير منك وتمنات يعطيها ربي زوج بصح المكتووب
وراهي تحوس ديرلك مشااكل انتي حاولي تتفادايهم
واكثري من الاستغفااار وراح يشفيك ربي فيهم
حاولي تجبدي رااجلك ليك بحلو الكلاام واكثري من الدعااء حتى يفرج ربي

[bellaluna]

لترتاحي جدي زوجا للفتاة

[bibicha]

ربي بغرج عليك مي نقولك اجبدي روحك منها و نتي في حظك و هي في حدها بيناتكم شغل الدار و بس هكا تتهناي و زوجك قوليلو يدير الدوبل نتاع المفاتح و هكا تتهناي بلا تكسار راس

[ASYA84]

ربي يفرج عليك

[Majrouha]

Salam okhti,walahi rani hassa bik,rani marit binafes almouchkil,kont khdama 3lihoum 3aycha hyat dhoul slafati yaqraw wana nakhdam 3lihioum W ntayablhoum,3jouzti dart fya hala W salfti sabtnui W bghat tadhrabniww....W....loukan nahkilek wach srali matsadeqich,W rajli kan rafadh ydirlu dar,bechwi bechwi hta t3amar houa W darna darna ba3d 10 snin zwaj,,,hadhi hya danya besah lmechakel mayakhalsouch meme W darna dar,rabi yahdina,,asbri W rabi yfaraj 3lik

[اياد حياتي]

يعطيكم الصحة راكم فرجت عليا همي انا والله شاهد والله غير دخلت بنية الصافية وقلت انا نولي يماهم ونلمهم ونستقبلهم بصح شوفو كيما يقولو العربي كامل مافيهش الخير وهي راهي في الاربعين ويخطبوها وماهيش حابة تتزوج غير تشرط لازم نديه هكذا وهكذا واش نديرلها وهو خو راجلي كل مرة يديرها هكذا ويصرخ عليا ونفوتلو بصح ما بقى صبر كون سكت مرة جاية يضربني

[اياد حياتي]

والله غير ريحتوني شوية اما هي راهي فيا الاربعين وما زالو يخطبوها وهي غير تتشرط نديه لازم هكذا وهكذا مرضتني بكلامها نهار كاملو هي تقول خويا على خوها هذاك وسطاني كبير عليا بشوية تشكر فيه غير هو وتقول هو برك الي يبغيني ويدلي انا راجلي بطل قرايا على جالهم جامي الا ستعرفت بيه وزيد بزيادا بدات تقول نروح نسكن مع اختي

[loufa]

الان حدث ما حدث ولن تغيري شيئا
حاولي تكسبي زوجك لانه ميقدر يدير والو هاذو اهلو لكن كان عليه ان يمسك اخاه وحدهما ويتكلم معه بصفة الاخ الاكبر او الاب ويغلطو انه تكلم معك بهذه الطريقة وكان عليه ان يلجا لاخيه بدل ان يرفع يده ويكلمك بهذه الطريقة
اسمحي لي ولكن طريقتك عندما تكلمت عن الباب لم تعجبهم لانك ربما خشنتي شوي صوتك فيها بحكم انك مكنتيش قاعدة ومشغولة مع ابنك وتصرالنا كامل يا اختي
تدخل اخته بتلك الطريقة زاد الطين بلة كان عليها ان تصمت او تقولكم اخزيو الشيطان بدل ماتزيد تشعل النار لكن المسكينة يبدو انها تغار منك
الان متحاوليهاش لانها راح تزيد تقوا عليك خليها ربما يجبلها ربي ولد الحلال وحينها تتحل الامور
أنت الان في نظر الجميع الدخيلة التي تحاول التفرقة لهذا احكمي روحك والزمي الصمت قدر المستطاع فان لم ينفعك لن يضرك وكما قلت لك اكسبي زوجك بالكلمة الطيبة ومتشكيلوش بزاف
تفادي اخ زوجك باكبر قدر ممكن لانهم سيقولون المسكين اليتيم مرحمتوش وهو على ما يبدو اخته اللي ماثرة فيه
ادعي ربي يفرج عليك