قلبي شبّتْ فيه من ريم احْريقهْ...بقلمي...

[شادي الصالح الخرباشي]

قال اللّي بالحب وشْرارو محروقْ .... قلبي شبّتْ فيهْ منْ ريمْ احْريقهْ

نار الحب اليومْ والحسرهْ والشوقْ ... أَفْناتو في وقْتْ مافاتْ ادْقيقهْ

وتْشكَّلْ ملْبعْدْ منْها عنّي طوقْ... واطْريقي مسْدودْ ملْقيْت اطْريقهْ

ملِّي شفْت البدْرْ ملْكتْ نفسي الذّوقْ... سلْطانةْ الغيدْ حَسْنهْ وأْنيقَهْ

ساهرْ طول اللَّيلْ ياخوتي مخنوقْ... بَحْبلْ لي حبّيْتْ وعْهود وْثيقَهْ

وْسامرْت النُّجومْ وعْيوني للْفوقْ...سرَّيْتلْها السرّْ ولاّتْ اصْديقهْ

ماعادشْ لامانْ في قلب المخْلوقْ... واللّي اتْذيعُ السرّْ يعْملَّكْ اخْنيقَهْ

لاصادقْ فالنّاسْ شايفْ لا مصدوقْ... ولَّى فينا الغدْرْ يشْبهْ لَخْليقَهْ

راحْ العهْد اليومْ مالدّنْيا مسروقْ... واللّي وفَّى بارْ واتْبعْ ارْفيقَهْ

وَكْثرْ التّمْلاقْ أهلو ليْهمْ بوقْ... ولاّوْ السّاداتْ هذي لَحْقيقَهْ

ياقلبي وشْبيكْ منْ غَفَلْتكْ فُوقْ... واخْتمْ ياصالحْ بورودْ احْديقهْ

للّي وفَّى طول عمْري كالصنْدوقْ... ولْعادي مْلُغْرابْ نعْملُّو اصْبيقَهْ

.........شادي الصالح 3 جوان 2015 ام الشواشي تارمونت مسيلة