gataeu sec

mina3100 · 2013-07-07, 22:49

العجينة 250غ زبدة ،125غ سكر،1 صفار بيض ،نصف صاشي فرفارة،قرصة ملح،500غ فينة

بالنسبة للتزيين لوز أو بندق أو قرقاع مهركشين ،نتيلا ،صفار بيض ، شكلاط طريقة التحضير خلطي الزبدة مع السكر 5د ثم أضيفي الصفار والملح والفرينة والفرفارة واتركيها ترتاح ساعتين من بعد قطعيها كما الشكل هذاك وديري صفار فوق الأقراص و ذرذري فوقهم البندق مهركش انا نفضله هو لأنو يتوالم مع نيتيلا ورميهم يتيبو لما تخرجهم لصقي الحبة مع اختها بالنيتيلا وديري زقزاق بالشكلاط مينا أو اللي كان عندك ملاحظة ضاعفي المقادير لأنو هذه متكتعش بزاف وإذا درتوها بالزبدة سموها كاليبسو صدقوني تعطيها ذوق آخر وماشي ببليسيتي هههه طبعا و شكرا

JIMI17 · 2013-07-07, 22:55

يعطيك الصحة

نور الهدى06 · 2013-07-08, 07:47

شكرا اختي على الوصفة الرائعة باذن الله نجربها
حابة نسقسيق تعيشي بما انك من وهران ممكن تعطيني وصفة الكعك الوهراني هل حقا يعجن وقداه كمية الحليب والبيض والفرينة ارجوكي اعطيني الوصفة بالمقادير المظبوطة شحال وراها في قلبي

نور السلام 16 · 2013-07-08, 07:47

يعطيك الصحة

mina3100 · 2013-07-08, 17:44

اقتباس:

المشاركة الأصلية كتبت بواسطة minouch23

شكرا اختي على الوصفة الرائعة باذن الله نجربها
حابة نسقسيق تعيشي بما انك من وهران ممكن تعطيني وصفة الكعك الوهراني هل حقا يعجن وقداه كمية الحليب والبيض والفرينة ارجوكي اعطيني الوصفة بالمقادير المظبوطة شحال وراها في قلبي

مكانش مشكل الأخت هاكي الوصفة 2كغ فرينة،رطل سكر عادي،فنجان خمارة الخبز،2فرفارة،2لفاني،زاست 2حبات برتقال و2حبات ليمون،رابعة زيت أي كأس كبير،نصف لتر حليب دافئ ،ملعقة كبيرة ممزوجة بين الشنان وا لنفع مطحونين ،خلطي الماء مع ماء الزهر على حساب ما تتلملك العجينة بالنسبة للطريقة ضعي كل المواد الجافة مع بعض إلا الخمارة ضعيها مع الحليب حتى تبسيها بالزيت من بعد أضيفي الحليب ولميهابشوية ماء وماء الزهر كيديرلك الثقب اعرفيه بلي راه مدلوك قطعيه بالخدمي و شكليه كيما تعرفي واتركيه يخمر واطليه بصفارالبيض مع الحليب ذرذري الجلجلان أو السكرأو الكاوكاو وارميها اطيب ملاحظة العجينة لازم تكون طرية ما قاصحة ما مطلوقة وباصحة و الراحة أختي وأي سؤال آخر راني هنا باللي نعرفه

نور الهدى06 · 2013-07-09, 08:53

merci عليك يا عسل ربي يحفظك معليش نزيد نطلب منك وصفة تاع كسرتكم تكون مبسة ياسر ومحشية بالغرس

حب الله لا يعادله حب · 2013-07-09, 11:54

مرسي يعطيك الصحة

minn · 2013-07-09, 12:15

بارك الله فيك

oum abderrahmene · 2013-07-09, 12:43

شكرا اختي يعطيك الصحة

latifa ouz · 2013-07-09, 12:51

ممكن وصفة المبصلة راحي شحال او هي في قلبي

mina3100 · 2013-07-09, 14:42

اقتباس:

المشاركة الأصلية كتبت بواسطة minouch23

merci عليك يا عسل ربي يحفظك معليش نزيد نطلب منك وصفة تاع كسرتكم تكون مبسة ياسر ومحشية بالغرس

تسلمي أختي بالنسبة للخبز منديروش فيه الغرس الغرس نديروه فالمقروط :d

mina3100 · 2013-07-09, 15:15

اقتباس:

المشاركة الأصلية كتبت بواسطة latifa ouz

ممكن وصفة المبصلة راحي شحال او هي في قلبي

شوفي أختي المقادير عينك ميزانك كيما المبسس والمقرود ديري السميد متوسط زيدي الملح ،خلطي الزبدة مع الزيت ورويه غاية وبسي مليح ،قعدي فتليه غاية كيما المبسس ولميه ،قطعيه مربعات وديريه فالكوشة يطيب لما يطيب فتيه بالمهريز أو قرعة تاع قازوز وفوتيه فالبوسار تاع الحديد وهذاك الغليض اللي يبقى دقيه فالمهراز وعاودي سيريه وخليه، في كاسرول ديري شوية زيت و2عيدان قرفة و2 قشرات بصل قلليهم حتى تشمي ريحتهم زيدي شوية ماء عليهم وخلي القرفة تطلق ريحتها ،من بعد خذي هذاك الخليط وبسسي بيه المبصلة ثم أضيفي الزبدة والعسل وبسسي ملاحظة لما تحبي تحميها حميها على حمام ماري وإذا حبتيها تكون طرية بزاف زيديلها الحليب شوية ولكن حتى تبغي تقدميها لأنو تحماض

نور الهدى06 · 2013-07-09, 16:15

شكرا حبيبتي ربي يعطيك متتمني واذا بغيتي وصفة عنابية راني هنا

latifa ouz · 2013-07-10, 11:23

شكرا اختي بارك الله فيك عن قريب نجربها
مي حبيت نسقسيك البصل ياك متقعدش ريحتو؟؟

mina3100 · 2013-07-24, 04:22

اقتباس:

المشاركة الأصلية كتبت بواسطة latifa ouz

شكرا اختي بارك الله فيك عن قريب نجربها
مي حبيت نسقسيك البصل ياك متقعدش ريحتو؟؟

هي على جال البصل يقلولها مبصلة ولالا متخافيش متقعدش ريحته صحة رمضانكم