حياتي التعيسة

[مشكلتي]

السلام عليكم و صحا فطوركم خاوتي
انا شاب 22 سنة راني حاير و خايف من المستقبل نتاعي حتى و هادي حاجة نتاع ربي بصح الانسان مدام راهو صغير يخمم شويا ماشي كي يكبر يقول كان درت و درت
انا مزال راني نعاود في الباك بصح كرهت تلقيت مع صحابي لي كانو يقراو معايا واحد استاذ و احد بوليسي واحد كذا
و انا قلت بلاك نروح ندير في الجيش و خلاص حتا وانا منحبهاش بصح قلت المستقبل و الظروف راح تخليني ندير هاك

ربي يحفظكم عاونوني بأي افكار راني كرهت حياتي لا قرايا لا خدمة يقيت في الوسط
و جزاكم الله كل الخير

[لحن الحياة.]

دير في الجيش و عقب الباك ياسر لي نحرصوهم فالباك من تاع الجيش
ياك الباك 4 ايام برك ماعنديش فكرة بصح نظن يخلوك تروح تفوت الباك
تضرب عصفورين بحجر

[راية الاسلام1]

ادخل للجيش يا اخي خير من تبقا قاعد هكا لا خدمة لا والو
علابالي صعيبة وبزاااف
لكن احسن من لاشيء
موفق اخي

[نورسين.داية]

السلام عليكم

أخي المقارنة شيئ جميل في حياتنا حتى نتطور و نغيير حياتنا للأفضل لكن يجب أن نقارن أنفسنا اولا بمن هم أسوء حالا منا حتى نتعرف على المعطيات التي منحنا الله عز وجل
و السعي الى التغيير للأحسن هو أول الطريق بالتالي : قد طرحت انت في كوضوعك حل في رأي إستخر و توكل على الله ...و لا تنسى الدعاء
وفقك الله

[bellaluna]

توكّل على الله و استمع لنصيحة الأخت jill

[امل العاتر]

اذا كنت ممن لديهم ارادة وعزيمة انصحك بالتسجيل في ال_ufc أو في ال_cfa واعد البكالوريا,هكذا لن تضيع وقتك وتتحصل على ديبلوم واذا تحصلت على الباك تكون ضربت عصفورين حجر واحد.

[abdouillizi]

ياخي انصحك من قلبي اياك ثم اياك ان تدخل الجيش تخسر كل حياتك ما عليك الا بالتوكل على الله و اعادة الباك حتى يكتب النجاح خير ما تحرق عمرك في الجيش بعيد على اهلك انا عندي صاحبي كوموندو قالي لو كان يطلقوني من اليوم ما نزيد نضرب فيها ضربة

[لحن الحياة.]

المشاركة الأصلية كتبت بواسطة abdouillizi

ياخي انصحك من قلبي اياك ثم اياك ان تدخل الجيش تخسر كل حياتك ما عليك الا بالتوكل على الله و اعادة الباك حتى يكتب النجاح خير ما تحرق عمرك في الجيش بعيد على اهلك انا عندي صاحبي كوموندو قالي لو كان يطلقوني من اليوم ما نزيد نضرب فيها ضربة

نصيحة قيمة .............
او يدخل في الشرطة احسن بكثييييييييييير نظن فيها راحة اكثر و يكون قرب الأهل تاعو و كي يجيب لباك اظن تكون رتبته افضل
والله اعلم

[وسيمツ]

أخي زيد حط راسك ف القراية مليح باه تدّيه ان شاء الله ، مادام ما ديتش الباك أعرف بلي ما قريتش مليح ولاّ الشيئ اللي قريتو ما يكفيش زيد شوي برك خويا و ما تشوف لحتا واحد نتا خلقك ربي بصفاتك و ميزاتك انت دير ثقة في روحك ننصحك كمّل الباك لازم تجيبو ، نظنّ تودّر 3 عوام ذرك و مبعد تعيش حياتك مليح ولا ما تودّرش ذرو و تدخل الجيش تعيش حياتك اللي بقات كلّها مربوط، حيــاتك تروح، ما تعيش معا عائلتك لا معا زوجتك و أولادك ف المستقبل، والباك ماهوش شعوذة خويا والله تزير تجيب ما تفقدش الأمل و اصبر لا تتسرع في طلب النتيج و ربي يسهّل ان شاء الله

[براءة سامية]

اقرا خير و ادا لقيت اقرا و اخدم

[snowiman]

كل الإخوة أجمعو أن الباك أفضل
تبقى لازمك الارادة أنا جوزت الباك 5مرات وما ديتوش وحبست عامين لقراية تزوجت وجبت بيبي ورايحة نسجل للمرة السادسة باش نديه
خوذ بنصيحة الأعضاء وعاود الباك

[عائشة 88]

المشاركة الأصلية كتبت بواسطة امل العاتر

اذا كنت ممن لديهم ارادة وعزيمة انصحك بالتسجيل في ال_ufc أو في ال_cfa واعد البكالوريا,هكذا لن تضيع وقتك وتتحصل على ديبلوم واذا تحصلت على الباك تكون ضربت عصفورين حجر واحد.

ونعم الراي ملازمش تفقد الامل كيما قالت الاخت دير cfa على الاقل يكون عند ديبلوم وفي نفس الوقت سجل للباك المهم العزيمة موفق اخي

[وليد1990]

المشاركة الأصلية كتبت بواسطة امل العاتر

اذا كنت ممن لديهم ارادة وعزيمة انصحك بالتسجيل في ال_ufc أو في ال_cfa واعد البكالوريا,هكذا لن تضيع وقتك وتتحصل على ديبلوم واذا تحصلت على الباك تكون ضربت عصفورين حجر واحد.

دير براييها تربح ما ضيعش وقتك دير كاش تكوين أي حاجة

وخليك من العسكر تاخذ رايي


صدقني أخي عندي زوج صحابي زياد 89 خليتهم انا من 2009 جبت الباك وهوما لالا .... هاهم ذرك جابوه وراهم فرحانين مع ان نتاجهم راهم شادين الخدمة

[حامل المسك]

السلام عليكم ورحمة الله وبركاته ..
ماعساني ان اقول لك سوى تجربتي أنا أكبرك بعشرة سنوات 10 اول باك كان في 1999 جاءني مرض مزمن أطرحني الفراش 5 سنوات وأنا احاول الحصول على الباك كان اصدقائي قد تخرجوا من الجامعة و أيضا إشتغلوا بعقود التشغيل ..وبمعجزة من الله شفيت من مرضي تقريبا طبعا مع دوام العلاج ..ثم تحصلت على البكالوريا بعد 7 سنوات من المحاولة ثم التحقت بالجامعة بعد صراع مع المرض والحمد لله على كل حال ..ثم تخرجت عانيت من البطالة عامين كنت أشارك بمعدل اكثر من 20 مسابقة كل عام حتى عددتها مرة 38 مسابقة في كل الولايات " الجزائر ، البليدة ، المدية ، سيدي بلعباس ، الاغواط ، مسيلة ، بسكرة ، ورقلة ، سطيف .."كانت المسابقات على اساس إختبار وكن نسافر لولايات أخرى من اجل المسابقة نقيم 3 أيام لإجتيازها وتتكلف أموال مما اضطرني العمل في الحوانيت ثم تحصلت عقد ادماج مهني مازلت فيه وفي حين كنت أشارك في مسابقات الماجستير وبعد 4 سنوات من المسابقات تحصلت عليها وانا أدرس فيها ..حاليا أعاني من آلام شديدة من المرض وضعف كامل قصرت في رمضان كله وانا طريح الفراش ...وعقد الادماج قريبا ينتهي ..أصدقائي كلهم كلهم متزوجين وباولادهم و أعمالهم " أساتذة بالجامعة بالثانويات معلمين متصرفين .مفتشين مستشارين ضباط ....." وبعضهم بسيارة ومسكن ..وهم لايزورونني " قطعولي " آخرين حسدوني على الماجستير ..وش نقلك ..انا أحس بانني قوى جدا بالله .والحمد لله لدارها ربي مرحبا بيها ..قلها قلها الحمد لله.. وترك امرك لله فهو حسبك ، اين اليقين أين توكل أين إيمانك بالله ..أقول لك شيئا في فراغي أتعبد لله ادعوه ..اصلي ، مثلا حفظت البقرة وال عمرن قليل من النساء ..داومت في رمضان وقبله على الصلاة في المسجد مدة اكثر من 50 يوم لم يفتني الاذان وليس الاقامة في الصف الاول ..أصلي بالناس بالفجر أحيانا وعامين أذنت بهم ...وهناك امور أخرى شهدات تقني ، تقني سامي ، مشاركات في ملتقيات أيام دراسية .....أشرفت على مجلات دولية ...
...قوي ايمانك في 10 الأواخر فهي مفاتح نجاحي بالدعاء ثم بالدعاء ..وان وجدت ضعفا ..قويه بالدروس في الانترنت من الشيوخ الذين ترتاح لهم ..انت قوي على هذا ..حاول في كل شيء عليك بالاستخارة والدعاء .أما ذهابك للجيش سمعت أنك تكون بديبلوم أحسن " أسبيرو ولا جندي خير " ديبلوم زين ..حاول في الباك أولا ..دير ديبلوم .آخر ثانيا ...وجد خدما عند الشعب ثالثا لمصروف جيبك..ورابعا تعلم حرفى مثل فايونص ..بانتورى " أنا مهارة في البانتورة وفو بلافوا " كنت نخدم لأصدقائي في شنابرهم ودارهم قبل زواجهم هدية لهم " وفي الاخير تقبل الله منا ومنكم صيامنا وقيامنا ..والسلام عليكم ..

[hamzagolf6]

اخي عاود الباك مزالك صغير 22 سنة ماشي كبير بزاف
والرسول صلى الله عليه وسلم بدأ الدعوة وعمرو 40 سنة
ومتقارنش روحك ب الناس كل واحد خلقو رب العالمين له مستقبله
او ادي الباك وروح للجيش هكا تروح بنيفو عالي