طلب مساعدة من البجاويات او اهل البرج

[ام طيري الجنة]

السلام عليكم
اخواتي البرجيات او البجاويات اريد مساعدة منكن بخصوص طبق تقليدي خاص بالمنطقة و هو تكربابين
لي صديقة راها تتوحم و تو حمت على التكربابين ذاقتها مرة عند وحدة من البرج و انا عمري ما درتها و راني باغية نديرهالها و راني خايفة ما نعرفش و الا تتفتت لانني اطلعت على الوصفة في النت بغيت تعطيوني نصائح ووصفة مضمونة باش ننجح فيها و اجركم على الله

[لينا11]

ام طيري الجنة تقصدي هدا حنونة

[ام طيري الجنة]

نعم اختي لينا اللي يجيو فيه دي بولات بالسميد

[لينا11]

نعم يجي دي بولات حنونة هاكي رابط درتو على جالك

https://www.djelfa.info/vb/showthread.php?t=1611369
بالنسبة للنصائح
بالنسبة للحم ليس اجباري تقدري ديري تقدري ماديريش
اولا يفضل استعمل سميد متوسط رقيق يتعجن لك
02مالازمش تعجنيه لازم تلميه باطراف الاصابع برك
03 كي تلميه ماتكثريلوش ماء يولي بغرير وتحصلي فيه خخخخخ ويجيك اضربيه للحيط يرجع
04 بالنسبة للمرقة استعملي واش تحبي كخضر لستي مقيدة
ونصيحة من عندي ديرلو عدس باش مرقة تجيك بنينة ممممم ديجا انا ريوقي يسلو وانا نكتب خخخخخ بلاك نفحال انا ثاني وننوض نديرو خخخخخخ
باش تعرفي لا طابت مليح نحي حبة ووتذوقيها نرمالمون مايطولش بزاف يطيب
ولازم مرة على مرة تحركي البولات باش مايلصقولكش فالطنجرة

وضرك نروح كيما قلت لك نديرو سخفت روحي بروحي خخخخخخخ

[أم أنيس 81]

سلام يا أخت ، سوف أعطيكي وصفة ناجحة جدا ، تقوم جدتي بإعدادها :
وجدي مرقة حمرة ، تتكون من البصل ، اللحم ، الفلفل أكحل ، ملح ، قرفة ، فلفل عكري ، زيت ، طماطم حب و طماطم مصبرة ، و قلي ثم مرقي ، و عندما تمرقي كثري الما تاع التمراق خاطر تسحقي مبعد لصوص .
خذي سميد خشين نتاع المقروط ، و دوزنيه بالشحمة تاع الغنمي مقطعة رقيق ، نعناع ( لازم) ، فلفل عكري ، فلفلف أكحل ، ملح ، كاس ماشي كبير مخلط ما بين زيت و سمن ، و بسي مليح ، و عندما تغلي المرقة نتاعك ، خذي لالوش و بداي رفدي منها و صبي على الخليط تاع السميد و عجني بأطراف أصابعك حتى تتحصلي على عجينة متجانسة ماشي يابسة بزاف و مائي طرية ، يعني تقدري ديري بيها دي بول ، مبعد خذي قدرة و كسكاس ، و صنعي دي بول و فوريهم لمدة 10 دقائق ، و لا زم تدهني الكسكاس نتاعك ، و تبداي تحطي في الحيات ، يكونو قد حبة البطاطا المتوسطة ، و حطي فوق بعضاهم و متخافيش يلسقو ، و مبعد لي تخرج الفورة نتاعهم ، نحي الحبات و حطيهم ، أرجعي للصوص نتاعك ، أرمياها الحمص و كل الخضر اللي تحبي ( لفت ، زرودية ، قرعة ) و في الوقت الخرشوف نديريو الخرشوف .
كي تطيب المرقة أرمي الحبات نتاع الكرباب ذاخلها و تركيها تغلي لمدة حوالي 15 دقيقة ، و طفي ، كي تكوني تقدمي في الطبق ضعي حبة كرباب في الصحن و سقيه بشوية مرقة و اللي يكون ياكل يقطع الحبة و يسقيها باللصوص ، و شهية طيبة .

[ام طيري الجنة]

ربي يحفظك لينا هذا وين شفت الوصفة نتاعك هااايلةو يعطيها الصحة اختك و مشكورة على النصائح و راكي سخفتيني انا تاني و على اكثر تقدير غدوة انديره ان شاء الله و بصحتك مسبقا و ادعيلي بالتوفيق

[sandy belle]

شكرااااااااااااااااا

[ام طيري الجنة]

المشاركة الأصلية كتبت بواسطة hanane ite

khti la3ziza hna malfin ndirouh kima ta3 lina mais tjrs beljaj w les boules hadouk ta3 smid nchemkhouhoum b la souse ta3 les legumes li tayebnaha w tji bnina thabal

شكرا اختي بارك الله فيك على المساعدة رمضان كريم