قهرني

[مشكلتي]

السلام عليكم
انا فتاة مخطوبة من 4 سنين و خطيبي يشتغل و له بيت و لكنه ياخر الزواج كل مرة بسبب انه يبني في نفسه
يصرف ماله يمينا و شمالا لدرجة انا الي اشتريت غرفة النوم و خاتم الزواج
و كي اهلي الحو عليه يا الفرقة يا الزواج قررنا ان يكون عرسنا يوم 9 اوت
تخيلو لحد الان لم ياتو ليعقدو و ليست بالمشكلة
المهم اتصل بي اول بارح لكي يقول لي انه سوف سفر ابوه الى مكة و ان كل ما عنده راح يعطيه لابيه لكي يعمر
رديت عليه و قوتلو قوم عرسك و الى بقا لك عمرلو قالي انتي مش متربية
على هته الكلمة جعلني اتذكر كل انتظاري له فقلت له حسبي الله و نعم الوكيل في تمسخيرك ليا انشالله تخرج فيك نيتي و تجيك في اعز حاجة فيك
في هته اللحظة قالي انتي طالق بالثالث مع العلم اني مانيش مفتحة فهي كلمة لا تجوز
و لكن الي غاضتني كل صبري
لم استطع ان احكي لاهلي اشياء كهذي لانني يتيمة و ليس لدي اخ يعني حقرني لانو ماكاش رجالة
حكيت لاختي الكبيرة و قاتلي ماتزيديش تهدري معاه و نصبرو ايامات الا معتذرش كلش انتها بينا و بين عايلتهم
انا مش عارفة واش نقول للناس
4 سنين خطوبة و كي بقى اقل من شهر كلش انتهى و منو هو ؟
يعني كان يلعب بيا ماكاش ناويني
حسبي الله ونعم الوكيل

[وسيمツ]

تنتظري منه ليعتذر ؟؟

"..قالي انتي مش متربية .."

اختي هذا انسان وقح و ما يحشمش على روحو ، لاكان ف الخطوبة دار الشيئ هذا أكل مالا بعد الزواج كيفاه ؟ ناس متزوجين و جامي قال هذ الكلمة لمرتو، هذه الكلمة تقولها لشخص تحس أنه لا ينتمي إليك ، فكيف في تقال في أوطد العلاقات الزواج ؟؟!!
و أيضا الرجل عندما يماطل في الخطوبة اعلمي أنه كان يبحث على سبب باه يفسخ الخطوبة لأنو من المفروض كان يعجل لو كان يريدك زوجة فعلا،

أختــــي ، لا تذلي نفسك له أو لأي أحد فالله أعزك بالاسلام قبل كل شيئ
لا أقول لكي اتركيه بل تخلصي منه !
صح ظروفك صعبة و ربي يفرّج عليك أختي ، لكن مهما كان مدام دارك الشيئ هذا أديري وجهك !

و الله أنا قلقت في بلاصتك
المهم صحا فطورك و ربي يقبل الصيام و القيام

[Napia]

ربي يوفك اللي فيه الخير راني مع قول الأخ وسيم

[lalib40]

بما انه قال لك هذه الكلمة كيف سيكون حالكما بعد الزواج

[رجل الخفاء]

ربما أنت يتيمة وليس لك أخ لكني أنا هنا أخوك ولا تنسى أن الله مع اليتيم وهذا الشخص سيدفع الثمن غاليا على فعلته، لا تقلقي ففي هذه الدنيا رب يحمي الولايا وسيحميك ويرزقك الخير كله، لا تعاودي الإتصال به وإن أراد أن يعود إليك فعليه الإعتذار وأظن أنه يتمسخر والله أعلم لهذا أقول لك مبروك عليك فراقه لأنك تهنيتي من سافل والله يرزقك بوليد لحلال وصح فطورك

[mounaminou]

للاسف كاين بزاف اللي خاطبين كي يلقاو لبنات عاقلات يتكسلو عليهم ....في الحق يحطك فوق راسو و مايفرطش فيك خلاص ....عليها لبنات ولاو طايرات .....نضن في وقتنا هدا اللي تسكت في الاول و تحمل في قلبها واحد مايقدرها كيما يلزم

انا نقولك بللي معاك ربي سبحانو ....و مادام عندك كرامة و شخصية ماتخافيش .....ربي يعوضك ماخير منو خاصة لاكان ما اعتدرش و ماطلبش السماح و بين بللي ندم علي هدرتو .....

[بلسم غرام2018]

اولا صح فطورك
تانيا وعسى ان تكرهوا شيئا وهو خير لكم
حبيبتي ربما الله اراد لكي خيرا في هدا الامر انكم تتفارقوا ورفق بيك من بليه راح توقع اذا تزوجتي بيه فالحمد لله على كل حال
والكاتب ليك يجيك واستخيري ربي قبل متتركيه
وكلام الناس ميهمكش فيه لانهم يجكوافي كل الحالات وبالتالي ديريه تحت الصباط حشاك وراحتك اهم من هدرة الناس فهمتيني

[amina260]

السلام عليكم ورحمة الله وبركاته
صح فطورك ختي ربي يهنيك ويجيبلك لي فيه الخير ليك واذا مكاش فيه الخيرربي يبعدهعليك ويرزقك الاحسن منو
ربي يفرحك متقلقيش روحك

[dalal 28]

ربي يكون معاك اختي احمدي ربي انك تهنت منه الان

[محبة الله الجزائرية]

ربي يكون معاك اختي

[أناييس الربيع]

خيرو في غيرو

وزيد والله أنا يا أختي ضد خطوبة لمدة طويلة

حنا عندنا الخطبة ماتفوتش شهر

قليل وين تقعد البنت لمدة أشهر بحجة تكمل الدراسة

أو توجد جهازها فقط

معندناش المراة تستنى خطيبها يبني روحو

وربي يعوضك واستخيري اختي

[شلال فرح]

اختي هاد الراجل راهو باين و واضح وضوح الشمس انو كان يماطل حتى تكرهي و تبطلي انتي و يدي هو كلشي و يخرج بدون خسائر كان حاب تجي اي سبة باش يفسخ العلاقة

يرحم والديك جنس مثل هاذا واش ديري بيه مادارش ولو ادتى اعتبار لعشرة 4 ستوات

وكلي عليه ربي كل وقت قولي حسبي الله و نعم الوكيل فيك و في لي ظلمني و حب يقهرني و تشوفي جزاء ربي كيفاش

ربي يعوضك خير اختي و هاذي تعطيك درس فالمستقبل علاش تتنازلي و تشري الشومبرة و حاجة خلاف رح تدي راجل يتحمل مسؤوليتك و لا طرطور يستناك تصرفي عليه

خمي مليح اختي و ربي يفرج عليك ادعي ربي ديما يا ربي فرج يا ربي فرج

[محبة رسول الله]

الحمد لله اختي مزلتي على البر ومتتزوجتيش بيه
وعذبك في دارو
وتاني شي لازم القدر بين الزوجين والاحترام
تأكدي اختي انو الزواج مكتوب من عند ربي سبحانو
ربي يكون معاك لانو 4 سنين مرو من عمرك مش ساهليين وانتي صابرة عليه وعاونتيه
بصح معليش مزلتي على البر والحمد لله لي ربي هناك منو
ربي يزيل عنك الهموم ويفرح قلبك

[امينة النايلية]

المشاركة الأصلية كتبت بواسطة مشكلتي

السلام عليكم
انا فتاة مخطوبة من 4 سنين و خطيبي يشتغل و له بيت و لكنه ياخر الزواج كل مرة بسبب انه يبني في نفسه
يصرف ماله يمينا و شمالا لدرجة انا الي اشتريت غرفة النوم و خاتم الزواج
و كي اهلي الحو عليه يا الفرقة يا الزواج قررنا ان يكون عرسنا يوم 9 اوت
تخيلو لحد الان لم ياتو ليعقدو و ليست بالمشكلة
المهم اتصل بي اول بارح لكي يقول لي انه سوف سفر ابوه الى مكة و ان كل ما عنده راح يعطيه لابيه لكي يعمر
رديت عليه و قوتلو قوم عرسك و الى بقا لك عمرلو قالي انتي مش متربية
على هته الكلمة جعلني اتذكر كل انتظاري له فقلت له حسبي الله و نعم الوكيل في تمسخيرك ليا انشالله تخرج فيك نيتي و تجيك في اعز حاجة فيك
في هته اللحظة قالي انتي طالق بالثالث مع العلم اني مانيش مفتحة فهي كلمة لا تجوز
و لكن الي غاضتني كل صبري
لم استطع ان احكي لاهلي اشياء كهذي لانني يتيمة و ليس لدي اخ يعني حقرني لانو ماكاش رجالة
حكيت لاختي الكبيرة و قاتلي ماتزيديش تهدري معاه و نصبرو ايامات الا معتذرش كلش انتها بينا و بين عايلتهم
انا مش عارفة واش نقول للناس
4 سنين خطوبة و كي بقى اقل من شهر كلش انتهى و منو هو ؟
يعني كان يلعب بيا ماكاش ناويني
حسبي الله ونعم الوكيل

<واش نقول للناس> عندك الحق في هاذي الناس مايرحموش ومايعذروش خلاص . بصح واش اديري كاتبة .
في الاول كل واحد يقعد يتفلسف ويحلل وحدة تقلك وين راها انوثتك ولخره وقيلة زعفتيه.... بصح ديري في بالك اذا مرجعش الزمن يداويك نقصد تنساي مع مرور الوقت وحتى الناس يلهاو بكاش حاجة اخرى واذا رجع ماتنسايش تعرضينا.

[امينة النايلية]

المشاركة الأصلية كتبت بواسطة رجل الخفاء

ربما أنت يتيمة وليس لك أخ لكني أنا هنا أخوك ولا تنسى أن الله مع اليتيم وهذا الشخص سيدفع الثمن غاليا على فعلته، لا تقلقي ففي هذه الدنيا رب يحمي الولايا وسيحميك ويرزقك الخير كله، لا تعاودي الإتصال به وإن أراد أن يعود إليك فعليه الإعتذار وأظن أنه يتمسخر والله أعلم لهذا أقول لك مبروك عليك فراقه لأنك تهنيتي من سافل والله يرزقك بوليد لحلال وصح فطورك

عجبني ردك كيقلتلها راني هنا نعاونك.
بصح بنتلي متناقض في حاجة! ياك راك تقول لبنات ماهمش ملاح ومافيهم حتى ثقة !!!