انتهى ببساطة

[مشكلتي]

سلام عليكم
خلاص عييت نفكر هي مش مشكلة لا اعرف ما هي بالضبط
المهم خاوتي راني عقبت الباك هذا العام و مخدمتش ممكن منجيبوش و اذا جبتو راح يكون معدل كارثي كلو عادي عندي لاني نقدر نعاودو و نجيبو بالعلامة لي نحبها هكذا كنت نفكر . لكن اليوم شفت صديقاتي هبلت كامل خدموا و معولين طب و صيدلة و فرحانين و لباس عليهم و انا نبكي بصمت لاني كنت الاولى دااايما واحد ما يسبقني لكن العام هذا انقلبت الموازين ليس لانه صعب بل هو اسهل عام لكن لم اعرف لم . قلت نجي لمنتدى الجلفة هنا زدت قريت مواضيع كانت بمثابة القطرة التي افاضت الكاس تلاميذ خدموا و متوقعين حتى 16 و 17 . و الاسوء العايلة معولين عليا و ماراهمش قاع عارفين بلي راني ممكن منديش .
راني منهارة و غير نبكي ندخل غرفتي و نبكي كرهت حياتي امااالي قوتي راحت كانت عندي قوة ندير لي الناس كل تعجز عليه و ثقتي كانت كبيرة جدا الان صفر و لحد الان الاحداث تمر امامي و لا اشعر بها و كاني لا اصدق كيف كنت و كيف صرت . لست متوترة بسبب النتائج لاني اعرفها سلفا و معدلي يتراءى لي انا متوترة مما قد ياتي بعدها تحطيم لامال عائلتي ابي امي اساتذتي اصدقائي أنــــــــــــــــــــــــــــــا . مسيرة 13 سنة دراسة جهد و تعب تنتهي هكذا فقط لو مت لكان احسن .
أنا الان فاقدة للوعي و الاحساس و لم اع اهتم بشيء لاني طيلة عمري كرست حياتي لدراستي و توقعت الافضل دائما لكن ......
السؤال الان من انا لان هذه التي طرحت المشكلة ليست أنا .

[123boutheina]

وعليكم السلام
ي اختي الغاليه حل مشكلتكِ ذكرتيه فقلتِ انتهى ببساطه .

- "أرح نفسك من الهم بعد التدبير، فما قام به الله عنك لم تقم به أنت لنفسك "


يارب ارضني وارضها واقر عيني وعينها

[sara 97]

وعسا ان تكرهو شيئا وهو خير لكم وعسا ان تحبوا شئ وهو شر لكم
اعلمي ان الله يريد الخير لك عباده ويرزق كل عباده الا من ابى
بالله مالذي ستسفيدين منه من هاته الحاله سوى الهم والحسره
غيري حالك توكلي على الله فقط وهو اقادر على كل شئ
بكلمة واحده يبدل الاحوال الى احسن حال
بدل التحسر ابداي بالدعاء وقت السجود قومي الليل وصلي وادعي الله كثيرا

[hanna25]

اختي علابالك حسيت وكانوا انا لراني نكتب نفس حالتي تماما
راني محطمت ساعات نتمنى انو ميوصلش نهار النتائج لانو ناس يستناو بصح انا علابالي لوكان صرات معجزة رايحة نديه ب 10
علابالك اآلمني كنت دائما ممتازة حتى معدلي السنوي ممتاز والباك مفحمتش وش صرالي كلش نعرفوا بصح مكتبت والوا
هديمك نهار ارغمتني امي نروح معاها لعرس بنت عمي علابالك كل يسقسيو انا نقلهم مخدمتش وهوما يقولولي تكذبي وزيد يقولولي اسمعي رانا نتحقوا الميدسين
محبوش يفهموا كرهت نتمنى نموت انا مبعد موحال نقدر نعاودوا حاسا حياتي نتهت عمل سنين راح في لحظة
ربي يعطيني لقوة برك

[little smile]

يا اختي درك الباك فبت و ما عندك ما رايحا تقدري تبدلي فيه
خممي لقدام soit ديتيه بمعدل صغير و لا ماديتيش
شوفي واش استفادتي من هاذ التجربه و ما تقارنيش روحك بناس اخرين
و ما تلوميش روحك ولا الناس لي تعرفيهم
و عله خير

[~~نهال~~]

مايهمكش صديقاتك وش يديرو ولا موش مايديروش
انتي بغيتي تحققي المعدل اللي بغيتيه
استناي لعل يجيك المعدل مليح و اذا ماجاش عاودي
راني نعرف ناس عاودو قداه من مرة و نجحو و طلعو للجامعة و كملو
لذا لا داعي تتحطمي
ربي يفرج و ربي رزاق هو اللي يرزقك مش هوما ولا اي احد
لذا ااذا ماعجبكش معدلك العام هذا
مازال كاين عام اخر
لربما فيها خير

[دعاء المحبوبة]

قولي الحمد لله
ابنة عمتي كل أحلامها ممكن اختصارها في الدراسة وفقطـ وكانت دائما هي الأولى.
قبل الامتحان "البكالوريا" بيومين تقريبا مرضت، ولم تستطع ان تحضر الامتحان، والمسكينة الآن راهي في حالة لا يمكن وصفها.
دراهم ما عودوش حايرين في الباك، حابينها تشفى وفقط
والله وحده أعلم اذا كانت سترجع إلى سابق عهدها وتعيده مرة أخرى أو لا .

[فرح حياتي]

''وعسى ان تكرهو شيئا و هو خير لكم''

[سارة غفران]

سلام اختى ربما ساكون قاسيه معك لكن راح تحصدى واش زرعت

[رتيـل]

اختي بغص النظر عن الاسباب التي جعلت مستواك الدراسي ينزل

فأنتِ الآن ليس بيدك شيء الا التمسك بالامل

و الذي ينبع من ايمانك و ثقتك برحمة الله

ان كنتِ قد اخذتِ بالاسباب ان كنتِ تعبتِ و اجتهدت ِكما ذكرتِ

فثقِ ان الله لن يخيبك و ان كنتِ على حافة السقوط

و حتى ان حدث عكس ذلك

فان الله في جميع الاحوال رحيم حكيم

فسلمي امرك لله و هو سيتولاك بعنايته

اسال الله ان يقرّ عينك بما يُسعدك

[ام محمد أدم]

والله نفس الحالة عشتها عام 2004 لكن لما كبرت ندمت لانو بعد ما جبت المعدل لي نحب و درست الاختصاص لي حلمت بيه لقيت روحي ماربحت والو من القلقة تاع القراية في بلا الحقرة
ماتقلقيش روحك و ارضاي بالقضاء و القدر خيره و شره
ربي يفرج عليك اختي و ينجحك و تكون عندك القوة

[ام محمد أدم]

قولي حسبي الله لا اله الا هو عليه توكلت و هو رب العرش العظيم
و اكثري من الاستغفار

[zahra96]

اختي مديري والو في بالك خليها على ربك
وهذا ميكون غير عين وحسد وغيرة
كاين لي ميامنوش بالعين بصح انا نامن بيها
قوي ايمانك وحاولرغم كلشي باش تشوفي دنيا بتفاؤل هي صح صاعبة مش كيما الهدرة بصح لاباس بالمحاولة
اختي انا العام القادم عندي الباك وخويا من دوك قلي قل من 15 راكي قاعدا للدار
بصح انا شفت كلامو من الجانب المشرق ولوكان درت على لجانب الاجابي كون راني دوك قابدا نيفي ونبكي
و واش فيها اذا عاودتيه يمكن جيبيه احسن من دوك لبنات ومديريش على ديك لهدرا تاع هي خدمت وانا مخدمتش
لانها متوصلش لبعيد
ان شاء الله نكون افدتك

[wail ZEHAR]

لا تقلق يا أخي و الله أن مشكلة نفس مشكلتي بل انا لقد تعرضت لإنهيار عصبي بسبب المشاكل لكني لم أيأس و قلت في نفسي مهما كتب الله لي فإنه حتما خير لي أخي صحيح أني نجحت لكن بأضعف معدل بين كل أصدقائي و في السنة القادمة حصلت على أعلى معدل حتى بين أصدقائي الذين نجحو لا تفقد الأمل بل يجب أن يكون هذا سلاح لك لكي تنجح السنة القادمة و تكون في أعلى المراتب لأن هذا في الأخير هو مجرد إبتلاء ففرح لأن الله راض عنك لذك هو يبتليك و إذا رضيت بما قسمه الله لك و صبرت لوجهه فأكيد سيجازيك خير الجزاء على ذلك فقط توكل على الله