ابحث عن وصفة شربة حمراء تكون بنينة. تاعي ما تعجبنيش

psy-emploi · 2014-06-06, 18:19

السلام عليكم. ابحث عن وصفة شربة حمراء ( فريك ) تكون بنينةن تاعي ما تعجبنيش. ربما ما نعرفش مليح الخطوات .شكرا لكن أخواتي

ام قصي · 2014-06-06, 19:46

شوربة افريك

أم رتاج و مرام · 2014-06-06, 19:53

السلام عليكم حبيبتي انا يقولولي الشربة فريك تاعك بنينة والله اعلم مانعرف يجاملو فيا ولا صح هههههههه المهم راح نقلك على طريقتيبسم الله حبة طماطم تكون متوسطة
بصلة صغيرة انا مانكثرش البصل لانو يصمط الشربة
4سنينات ثوم
ورقة رند
حشيش مقطفة غير العواد برك
عود قرفة صغير
ملح وتوابلوماتكثريش
تقطعي الطماطم والبصل والثوم مربعات كبار وتحطي التوابل والقرفة واللحم والزيت مغرف واحدة لانو اللحم راح يطلق الدسم ويجيك ميدم بزاف تحطي الحشيش اغصان مربوطين بخيط وتضيفي نصف كمية التوابل وتخلي الكل يتقلى على نار هااااااااااادئة كلما تقلى مليح كلما جاك بنين وتكوني مسخنة الماء الي راح تمرقي بيه تضيفيه وتقفلي عليها وكي تشوفي اللحم طاب نحيه وصفي المرق تاعك في صفاية تم رجعي اللحم والمرق وضيفي نصف كمية التوابل المتبقية وضيفي الفريك تاعك والطماطم المصبرة والفلفل الاخضر وخليها تطيب مدة 10 دقائق لين يطيب هاداك الفريك وتخثار المرقة ضيفي رونديلة قارص وشوية دبشة وشهية طيبة

mouna mimi · 2014-06-06, 20:02

السلام عليكم اختي هذه المقادير لاي شربة حمراء سواءا كانت فريك او فار ميسال
المقادير
حبة بصلة كبيرة مرابية اذا كان المقدار تاع القدرة كبير والعكس صحيح
حبة ثوم
لحم او دجاج واذا اردت اضافة اللحم المفروم على شكل كريات فلا مانع في ذلك
كزبرة (دبشة )
حبة طماطم مرحية +ملعقة من الطماطم المصبرة
ملعقة صغيرة كزبر مرحي
فلفل اسود +زنجبيل +راس الحانوت +ملح +زيت
طريقة التحضير :
ضعي كل هذه المقادير في القدر مع اضافة كاس ماء على نار هادئة حتى تذوب البصلة وامرقيها هذا هو سر نجاح الشربة
ارجو ان تجربيها وبصحة والعافية

mouna mimi · 2014-06-06, 20:06

هذه شربة امي ديرها هايلة وخاصة في شهر رمضان وراني نسيت راس حار بلا ماتحليه اذا كونت لاتحبي المرقة جيك حارة وشكرا

mouna mimi · 2014-06-06, 20:07

هذه هيا الشربة السطايفية

MINA-NINA16 · 2014-06-06, 23:09

شربة فارميسال
انت ومقدورك لح غنمي او دجاج المهم نحط اللحم في قدرة+1بصلة متوسطة مسكرفجة+ 1جزر مقطعة صغيرة+1كورجات مقطعة صغيرة+1 بطاطا صغيرة كذلك مقطعة مثلهم+قصبر مقطع وشوية فقط نعناع اخضر مقطع + شوية عكري حلو+فلفل اسود +ملح+1عود قرفة +قرصة قرفة مطحونة نقلوهم شوية منبعد نزيدو 1طماطم مسكرفجة ونقلي ثم نزيد 1م ك طماطم مصبرة وقرن حار اخضر ونخلي حتى يتقلاو مليح ثم ننزع القرن تاع الحار وندير الحمص ونمرق ونغطي ونخلي حتى يطيب اللحم و الحميصة اذا نقص بزاف المرقة نزيد ماء سخون حسب الحاجة ونشوي ادا المرقة بيضاء نزيد الطماطم المصبرة ونخليها تغلي مليح باش تتلق الطماطم مليح ونذوق الملح ثم نرجع قرن الحار باش يطيب وندير الفارميسال حسب الحاجة ماتكتريش بزاف لاخطرش ديري في حسابك بلي تزيد تتقال شوية كي نطفوا ونخلوها شوية قبل التقديم المهم كي ديري الفرميسال 3 دقائق وطفي وغطي القدرة ب لكي تخرجيلها قلبها وهي تغلي تولي تستبني الفارميسال معجنة في وسط الشربة

في الخير قدميها مقطع فوقها شوية قصبر ونعناع الله الله والقارص ما تنسايهش وشهية طيبة ههههههههههههههههههه

psy-emploi · 2014-06-07, 01:25

السلام .شكرا لكن أخواتي.يعطيكم الصحة وما تتمناو. سلام

عطرالذهب · 2014-06-07, 01:58

اختي انا الشربة نتاعي ندير قيس غميقة ل3 افراد
ملعقة بصل مفروم وسنينة ثوم وثلاث ملاعق زيت و6 قطع صغيرة لحم غنم او بقري نقليهم مليح ونضيف نصف ملعقة صغيرة ملح ومغرفة متوسطة راس الحانوت وفنجال ماء سخون ومغرفة اكل مش معمرة طماطم مصبرة ونبقى نقلي غير بالعقل ونضيف 2ملاعق اكل فريك نكون غسلتو وصفيتو باش تتنحى القشور السوداء ونقلي مليح ونمرق يلتر ماء ساااااخن ونغلق عليهم نص ساعة في الكوكوط ونحل نلقاه مازال خفيف شوي نضيفلو قرن فلفل حار وشوي دبشة ومعدنوس ونخليه يغلي شوي ونطفي
متاكدة كون تجربيه رايح يعجبك وتدعيلي

ام ايمان16 · 2014-06-07, 04:21

يعطيكم الصحة

mon poupon · 2014-06-07, 12:03

شوفي اختي شربة فريك دواها الثوم و الحشيش و راس الحانوت اهم حاجة

شدي لحمك حطيه في طنجرة او تاع الفخار تجي رووووعه

ارحي راس ثوم و شوي زيت و م ك راس الحانوت و فلفل احمر مرحي و م ك و نصف طماطم مصبرة و عروق حشيش

غليهم على نار خفيفة مع التحريك المستمر و زيديلها نصف كاس ماء و خليها تتقلى على الأقل نصف ساعة مع التحريك و النار خفيفة بزاف

ثم مرقي و لوحي حبة طماطم كبيرة و عند الغليان

لوحيلها نصف كاس فريك مغسول و حركي كل شوي و بعد 5 د غطيها و نقسي النار و ضفيلها م ك نعناع ناشف
و كي تطيب ضفيلها الحشيش و صحة م هنا و تمتعي بالذ شربة فريك

OM AYA · 2014-06-07, 12:54

هادي شربتي وبلا ما نزكي نفسي كااااااامل تعجبهم و يطلبوا مني االوصفة تعلمتها على يماا االله يحفظها

حبة بصل متوسطة
حبة طماطم طايبة قشريها و نحيلها الزريعة
حبة كوغجات_اختيارية_
ربطة حشيش نقصي منها شوية(على حساب الربطة كبيرة صغيرة)
زوج اعراف كرافص(على حساب الربطة الحجم نتاعو)
5سنينات ثوم
2مغارف كبار طماطم مصبرة ( على حسب النوعية)
نص كاس صغير زيت تقريبا 100 ملل
التوابل(2 م ص قصبر سوغتو لاكان جديد و اخضر+1م ص فلفل اكحل+فلفل دريس(بابريكا)+1م ص ثوم مرحي_ اختياري_+نص م ص سكنجبير_ اختياري_)
واذا ما حبيتوش راه كاين توابل الشربة فريك جاهزة بنينة جربتها زيدوا عليها غير القصبر

هدو كامل ارموهم في الروبو _ميكسور_ارحوهم مليح مليح ممكن تزيدو شوية ماء باه يترحاو فاسيلمو
وفرغوهم في لاكوكوت(ياك ما راناش في رمضان بلا ما تستعملي الفخار اوكي)
مع طراف اللحم ولا الدجاج غطيهم وخليهم يتقلاو

تم ارمي كاس صغير فريك(نتاع 150 ملل=نص كاس اينوكس المشهور) و شليها مليح لا تعودي تبهدلينا اوكي +راس حااار اخضر و لا الاحمر الصغير وما تفتحيهش اذا ما تحبوش بزاف الحاار _افتحيه غير في طبسيك اوكي_
امرقي (ماعلاباليش شحال بالاك .. ليتر ..راني نضت كيلت بلا عجز 3لتر نقصيلهم كاس تقريبا) و خليهم يشدوا الغلية مليح مليح..
......و تووووت تووووت اغلقي الكوكوت...
بعد 20 دقيقة ولا نص ساعة اضربي طلة
على حساب وش تحبي تحبيها عاقدة شوية كيما انا نقصي للنار شوية و عري عليها و خليها ربع ساعة اخرى

لمستي الخاصة: ديري بوكي قارني :حشيش كرافص نعناع حاار اربطيهم +فتي من فوق بين يديك شوية نعناع يابس ومرحي وغطيها 5-10دقائق

زينيها بالحشيش مقطع

OM AYA · 2014-06-07, 12:58

اسمحيلي على طريقة الكتابة هذي بارتاجيتها من قبل لصاحبتي درت كوبي كولي و حطيتهالك ملاحظة يما ما تستعملش الكوكوت بل الفخار و انا جربت الكوكوت تسلك و تعطي بنة

دائمة الحمد · 2014-06-07, 17:42

https://www.djelfa.info/vb/showthread.php?t=1527466