صيدليتي على وشك الانهيار

[mos3abyacine]

اخوتى فى الله احببت ان استشيركم في امر وهو فى الحقيقة ما دفعني للتسجيل فى المنتدى
لى صيدلية خاصة بدات حالها فى التدهور بعد ما كانت دات مكانة ثقيلة فى الميدان صرت افقد زبائنى بالتدريج مما سبب لى تلف كميات فظيعة من الادوية رغم انى احوز على الادوية الناقصة فى السوق الوطني وما يؤلمنى اكثر ان الزبون لا ياتي الا بعد ان يياس من وجود الدواء فى بلدتي
ويقول لفيت عليه البلد كل وما صبته الا عندكم
فاقول فى نفسي لما لم تاتى من الاول و اغلب الاحيان يكون اشترى الادوية الباقية واتى ليتم وصفته
اصحاب الامراض المزمنة صارت نسبتهم عندي ضئيلة ولا يخفى عليكم ان وصفاتهم هى الى تشكل دخل مليح يعنى مصائب قوم عند قوم فوائد
وحتى تفهمونى اكثر اقرب لكم واقع المدينة الي فيها المحل
ليست ف ما نسميه سنتر فيل انما قليلا بعيدة فيه مستوصف واحد والمشكل انه فتحت صيدلية جديدة بيني وبينه كما انه ما فيه اطباء خاصيين.........
بصراحة الامر اتعبني جسديا ونفسيا حتى صرت افكر فى كرائها لانى ارى نفسي اعمل من اجل دفع اجرة العامل الايجار وطبعا الطامة الكبر ضرائب و تامينات ومصاريف........
يعنى ما فى ربح زائد للادخار او مشاريع اخرى
اخوتى هدا همى فافيدونى والمثل يقول شاور ولو كنت تتشاور...............انتظر تفاعلكم.........فى امان الله.

[○•ميسون•○]

اكريها و ريحي

لانها ستتعبك و لن يشكل مصروفها مدخولا كبيرا

[mos3abyacine]

هده الفكره تراودنى كثيرا واريد ان ابقيها اااااااااااااااااخر حل.........

[samirabahi]

لا تستعجل تمهل

[hicham43002]

الافضل انك تزيدي ديري مخبر تاع تحاليل تكون افضل والله الموفق

[docteurtobibe]

سلام عليكم اختي اظن مشكلتك لازم تروحي للمستوصف اعملي زيارة مجاملة للاطباء واش خسرتي هذا من جهة وشي اخر حاولي تزيدي تبيعي مواد التجميل كواقي شمس الخ وربي هو الرزاق اخيتي

[فارس وجواد]

أختي قومي بتغيير المكان أو المحل أو حتى المنطقة .
ربما مع الوقت ستستعيدي المكانة التي كنت عليها .
مجرد رأي .
شكرا .

[sarl02]

لا تفكري بكرائها لاني ضد هاته الفكرة بالنسبة لشخص من المفروض انه يسمى دكتور صيدلي...يعني انت اقريتي واتحصلتي على شهادة دكتوراه باش اتخمي من منظور تجاري بحت ؟؟...لي صديق في نفس المشكلة ونصحته بالصبر الى حين ان يلقى مكان افضل من الذي هو فيه....لذا عليك البحث على مكان افضل ولو استغرق الامر وقتا لكن ستنالين فيما بعد افضل من كرائها ...ووفقك الله.

[ريان 7]

طالما أنها كانت مزدهرة من قبل فالمشكلة ليست في المكان
انظري جيدا فيما تغير على زبائنك فهناك شيء جعلهم ينفرون حتما
و كما قالت الاخت لا تنظري الى الموضوع من منظور مادي بحت حتى يبارك لك الله بل حاولي كسب الزبائن بالكلمة الحسنة و الابتسامة. حسني من مظهر الصيدلية و غيري الشكل و اسألي الزبائن عن ما يضايقهم في صيدليتك و تواصلي معهم اكثر لفهم السبب .
إذا كنت تأكلين هم الأرباح فعليك تأجيرها .
أما إذا كنت تهتمين لكونك صيدلانية و تبحثين عن النجاح و السمعة الطيبة فواصلي في عملك و ابحثي جيدا في الموضوع .

[سارة حبيبة زوجها]

التجارة مرة ربح مرة خسارة المهم الواحد يطول باله وان شاء الله تعود الامور الى مجاريها
بصح بغيت نبهك لحاجة نتي راكي مقابلتها وحدك ولا دايرة خدامين ؟؟؟؟؟؟؟؟؟؟
لانو عندي جارتي عندها صيدلية و مين تدخلي والله غير تريحي غير من المعاملة نتاعها
بصح عندها مدة جابت وحدين يقابلو في بلاصتها الله لا يشوفك التشناف تقول راكي تطلبي الناس الكل ولات ما تشريش منها اولهم دارنا
اما الدوا يبدلوه او واش تقوليلهم ماكانش
وكاين صيدلية وحدوخرا حلفت لوكان يكون عندهم الدوا لي يرد الروح ما نروح ليهم غير من المعاملة السيئة
بغيت نبهك برك نتمنى ما نظلمش الناس

[~ حراير ~]

السلام عليكم و رحمة الله تعالى و بركاته
التجئي لله يا اختي و صلي استخارة و صلي صلاة الحاجة

اولا ما تكونيش سلبية و تشوفي بمنظور سوداوي
كوني قوية و مكافحة "كوني دزيرية عندها النيف على مالها و تعبها و جهدها"
مش مع اول انتكاسة ترفعي الراية البيضاء
و انت حبيتي تكريها و اذا كريتيها وش تعملي تقعدي في الدار؟؟ و اذا ربح الي كريتيهالو تعاودي تسترجعيها؟؟
السبب نضن واضح انه العملاء راحو للصيدلية المنافسة و طبعا الأرزاق على الله لكن هل تسائلت علاش بطلو عليك و راحولها معناها وش لقاو عندها و ما لقاوهش عندك
ابحثي في الأسباب تاع هروب العملاء عليك
و ماتكونيش سلبية معاهم
يعني لما يجيك عميل شرا كل الأدوية الا دواء واحد و يقلك انه مالقاهش غير عندك مش تقوليلو وعلاه ماجيتش من الأول
ما تكونيش لحوحة و لا متعالية عليهم

انا ننصحك اول حاجة بما انه ما عندكش عملاء بزاف نقصي من عدد العمال الي عندك
علاه تخدمي في الناس و انت مش لاحقة بالأجرة تاعهم

ثاني حاجة حاولي تقراي شوية في النت على التسويق باش تتعلمي شوية افكار

حاجة اخرى سبقوني ليها و هي انك تروحي للمستوصف و الأطباء و تجامليهم
او حتى اخدمي خدمة "الديليgي ميديكال" باش تلقاي سبب انك تدخليلهم و تعرضي عليهم خدماتك بمقابل انهم ينبهو المرضى لصيدليتك

حبيتك تقوليلي الأدوية الي تفسد وش ديرو بيها "ممكن نعطيك فكرة مليحة"

اهم شيئ اختي الصبر ماكان حتى حاجة تجي بالساهلة

نعرف صيدلية كانت على وشك الإفلاس ... و بعد ان باعها صاحبها لبنت صغيرة كانت تعمل عنده لكنها دزيرية فحلة رجعت من اشهر الصيدليات

لا تنسي الإستغفار اختي فهو من اسباب تسهيل الرزق

[nilly]

ماتكريهاش هادي خدمتك اليوم تفشلي غدوة تنجحي
بلدي المكان احسن روحي للمنطقة نائية وين مكان كامل صيدليات فتحيها ثمة

[mos3abyacine]

باش تفهمونى انا صيدليتي فى بلدية ماهى معزولة انما متاخرة فى كثير من الامور بها مشفى واحد ومافيهاش الاطباء الخاصين كانو المرضى من قبا يشرو من عندي فقط لانها الصيدلية الوحيدة وكان نضام الضمان الاجتماعى يفرض على المريض انه ياخد دواه من صيدليات منطقته اما بعد بطاقة الشفاء صارت له الحرية كما انه فيه صيدلية اخرى فتحت بيني وبين المشفى يعنى راح كل الزبائن وكان غير هنا دايما معطوب من الادوية النادرة........اما عن صيدليتى فهى مهياة ومنظمة ونظيفة عدلتها لدرجة انه بعض الناس ظنوا انو شخص ثاني فتح بدلى يعنى تغيير جدرى والمحل واسع ومش قادره نبدله لانه ما فيش محل اخر متين يقدر الواحد يفتح فيه صيدلية..........

[mos3abyacine]

الصيدلية الى قلتلكم فاتحة بطريقة غير قانونية يعنى ماجر دبلوم وما عندوش الحق فديك البلاصة وانتم تعرفو المعارف واش تدير فى بلادنا.........
من ناحية العمال ما صبتش المؤهلين
طارو بيهم القافزييييييييين والى يجى باش يخدم يقولي شحال تخلصييينى هو مزال ما يعرف حتى شيء ويحب يخلص كيفه كيف الفارماصيان.........تخيلوااااااا
موخرا جبت واحد يبدو طريف مع الناس ومتحمس ان شاء الله ما يفشل

[mos3abyacine]

المشكل الى راه صاير الان هو اغلب الادوية راهي تتبريما عندي حتى المفقودة منها و النادرة والغريب انها عند البقية غير موجودة ويوم نلمها و نحيدها من الرفوف يجي الي يحوس عليها ........فى رايكم واش ندير ليه نجيفو ولا ابتسم فى وجهه اقول ما عنديش.........اكيد لن افعل الثانية اقترحوا على ثالثة.0