الله يجازي كل وحدة ترد عليا

[ramoussa]

السلام عليكم اخوتي. نتمنى انكم تفيدوني عندي عرضة لسلفي ومرتو قاورية روحو من انجلترا راني حاصلة بالاخص الاكل الي راح نطبخلها وربي يعطيكم ماتتمناو

[takwaaa]

لقور ديما يحبو الحاجة التقليدية تجيهم حاجة واو شخشوخة ولا ماعلباليش بلاصتكم بواه مشهورة وريلها تقاليدكم
و الا ديري طاجين لحم ولا طاجين جبن و بريك و اورداف و جاري ،انت وش خممتي؟

[الصمت حكمة]

كيما قالت الاخت تقوى

[lyzzabel]

ديريلهم منيو جزائري محض
شوربة ، بوراك ، طاجين بالزيتون و الجاج ولا لحم محمر بالشمبنيون ، طاجين حلو ،،شكشوكة بالفلفلة ، سلطة منوعة hors d'œuvre و ديسار ديري فلون و سلطة الفواكه و ما تنسييييش فالأخير لاتاي بالمكسرات
نتمنى نكون ساعدتك و بالتوفيق اختي بصح ما تنسيش تقوليلنا واش درتي في موضوع مستقل

[نصيرة1973]

أنت وشطارتك في الطياب تقليدي ولا عصري والأحسن تقليدي وبهذا تفتخري بأكلات البلاد

بالشفاء والهناءللجميع

[panpouna]

حميص شربة بوراك مثوم و قلب اللوز..انشاء الله نكون فدك

[إلهام07]

بما أنو مجال عملي مع الأجانب نقولك راهم يموتو على الشربة والبوراك والبربوشة يظلو يحلمو بيهم :d:d:d:d
وكيما قالو الاخوات ديري تقليدي بصح ماديريش ماكلة ثقيلة كيما الشخشوخة راهم مايحبوش الماكلة الثقيلة وماياكلوش بزاف كيما حنا :d:d:d

[hayat b]

ana min rayi di hrira bel borak w tabak taklidi w gratan ta3 eskalop belformaj w bichamal w ida habiti etahliya diri disser derto lrajli wdah lilkhedma w wahd marto gawriya w3jbo . dessert howa tabaka al1 helib w mayzina w vani wdirihom fog enar heta ykhtro w menba3d frghi fel kissan w diri fokhom tabaka banan w Zidi diri 3assir alaymon w sokar w mayzina fog enar hta tkhtar w frriha fok elbanan w tkedri tzyni men fok bel crem chente w lfawakih

[فقه معاملات مالية]

أفضل ما قالته روضة 88
بالتوفيق

[أم إناس]

اختي كيم قالو لك الأخوات ديري شربه وبوراك ومقبلات وسلاطه ويحبو الخفيف ومايحبرش الحلوة الحلوة ياسر. دري تيراميسو في الدسار والتاي كيم تحبي
وفواكه. متنوعة. دير سلاطه بالفواكه. وايضا يحبو الكسكس.
وان شاء الله تقومي بيهم وماتنسيش. الصور رانا حبين نشوف وش درتي. بالتوفيق

[مشرق2]

أنا رأيي مع الاخت الهام 07

[عطرالذهب]

اختي عليك بالتقليدي وكثري السلطات يموتو عليهم

[zamilio]

بوراك مع شربة فريك وزيدى جلبانة بالقرنون وسلايط ومتنسايش فلفل حميس مع الكسرة تاعنا اللحم لحلو بزاف شغل دريلهم طعام باللحم خير من هده التعبة وتقليدى

[MINA-NINA16]

انا نضن انهم صح يحبوا اكلنا التقليدي لكن ماتنساوش هم يهتموا اكثر برشاقتهم وما يكثروش بزاف الماكلة انا رايي ديري طبق واحد تقليدي ونوعي السلطات و المقبلات و ادا استطعتس الستيك بطريقة سريعة وخفيفة دون الاكثار في طهيه لانهم يحبوه يبقى اللون الوردي تاع اللحم عند الاكل وفي الاخير عفسة باردة الحمد لله المنتدى معمر بافكار الاخوات والشيفات اللي يحمروا الوجه
ان شاء الله نكون قد افدتكي وبالتوفيق اختي

[ramoussa]

اشكركن جزيل الشكر اخواتي على اهتمامكن وردودكن المميزة راني هزيت من عندكم افكار رائعة ان شاء الله تفوت مليحة نحب نقولكم بلي هاذ المخلوقة ما تحب شئ ،التقليدي يجيها ثقيل، المرة الي فاتت كي عرضتهم درت شخشوخة باللحم ودجاجة محمرمع بطاطا كوشة طاجين حلو +سلاطة منوعة دار شيخي و سلفي كلاو ما خلاو والو بصح هي كلات دجاج وبطاطا وسلاطة هذا ماكان عليها انا راني حايرة مالقيت شكون نرضي هما ولا هي ! وربي يعطيكم ماتتمناو