مشكل اللوسة ( أخت الزوج) سوسة

[omanova2003]

بسم الله الرحمن الرحيم انا اختكم في الله قوقلولي واش ندير
حكايتي.

انا متزوجة عندي عامين بصح المشكل لوستي منهار اللي تزوجت درلي المشاكل
تغير من لبستي من الماكلة اللي نطيبها كي تشوف خوها ميعيطش عليا واش يطلب نديرلو دايما نبيشلوا نطيبلوا واش يحب تقولي ماشي بنينة كي بديت نخدم كيفكيف تغير معجبهاش الحال كي نلبس لبسة جديدة تبقا تخزر وزيد تمعني حتى دائما مريضة

بصح وصلت بيها الدرجة تقول قدامي على راجلي اللي هوا خوها انو ماشي راجل ربي قولولي لوكان في بلاصتي واش ديرو
و المشكل ما عرفتش كيفاش نقولوا بلي شوف ختك راهي تقول لافامي انتا ماشي راجل


لوكان أختي أنتي في بلاصتي واش ديري
ولا انت خويا لوكان أختك تقول عليك ماشي راجل وزيد تقول لناس عليك هكذا واش ح يكون التصرف أنتاعك


وشكرا

[زرقـآء اليمآمـة]

السلام عليكم
اختي اصبري تنالي الخير
وربما انت ترينها شريرة وهي تريد مصلحتك
وليس كل اخوات الازواج شريرات
اظن انه لك اخ وستكونين لوسة
ولماذا تشتكون من الحماة واخت الزوج كثيرا ؟
الزوج مليح واهله قباح ؟
والمثل يقول : الجوج يسمع من زوج
ربي يعينكم والله المستعان

[توأمي حياتي]

أختي أصبري و أحتسبي لله و أياك ثم أياك تخبري راجلك واش قالت ختو لأنك راح تنوضي مشكل فالدار و أكيد هي أخنو اذا قاطعها راح تموني سبب في قطيعة رحم و اذا زعف منها و سمحلها راح تطلعي نتي وصالة الهدرة و نتي الخاسرة في الخالتين
نصيحتي هدري معاها غير بالسياسة في لحضة رواقة و قوليلها بلي عيب هذا خوك و نورمالمو الي تضرو تضرك و اذا شفتي بلي هدرتك معاها راح تجيب نتيجة عكسية هاذ الهدرة قوليها لعجوزتك و حاولي دايما تقربي بيناتهم قوليلها خوك ديما يحكي عليك بلي يحبك و وووووو المهم دايما كوني سياسية لــأني نقولك و عن تجربة مهما صرا أنتي الي راح تكوني ماشي مليحة و و الله كل شي يفوت و يبقى غييييييييير العيب

أتمنى نكون أفدتك

[maramdou]

Okhti kabri balek w asbri had ghir wasawis chaytan ida mchiti m3aha rah tendmi
w hadi ghir difa m3ak rah yji youm w tezewedj w t3oudi tetwahchiha.
Rabi yeslah el omor binkom

[جويرية الإيمان]

كاين مثل يقلك :

يا داخل بين البصلة و قشرتها ما يجيك غير ريحتها

و ثاني

عمرك ما تدخلي بين الظفر و اللحم .

هاذي ختو و إذا قالت هاذي الكلمة الناس رايحة تهدر فيها هي مش في زوجك

و يقولو يخي خوها كيفاش تقول عليه هكذا .

انت ما تقولي والو لزوجك خليك حيادية .

و ربي يهدي لوستك و يهنيك انتي.

[wafwaf8471]

lghira thadere 3la hsabe lchoufa tghir bezaf diri balik minha

[hodahodahoda]

ما فهتش واش مشكلتك انت
اخت زوجك ماشي ملاحة
زوجك مليح معاك و انت و هو متفاهمين
اين المشكل اين المشكل اين المشكل
تحب تزعفي زوجك
تجاهلي اخت زوجك في اساءتها
عامليها بخلق حسن من اجل زوجك

[غفران 2]

ربي يهديها

[ahlem-86]

إن أخت الزوج قد تغار من زوجة أخيها، خاصة إذا أحبها وأكرمها ووجدت عنده حظوة، كذلك تغار إذا كان هذا الأخ بدأ يتغير عليهم ويركز على زوجته، أختي اياك اخبار زوجك ديري المشاكل تولي نتي مولات القيل والقال حذريها وقوليلها بالاكي تعاودي تهدري على راجلك بالسوء واذا عاودت تخبرو ويصرا اللي ما لا يحمد عقباه

[○•ميسون•○]

ما تقولي والو لزوجك يسمعها من بلاصة اخرى خير من يسمعها من عندك

و الناس راح يقولو لو كان جات نورمال ما تقولش على خوها ماشي راجل..............

[كاميلا]

شوفي اختي هاذي خبيثة كبيرة احذري منها ومتمشيلهاش في الخط تقول على اخوها ماشي راجل مع لافامي ؟؟؟؟؟؟؟؟؟ شيء غير طبيعي انا اخي مهما يكون منهدرش عليه ولا اقلل من شأنه امالا راهي دير هكذا باش نتي تخرجك عن شعورك يخي راهو خوها خليها تهدر وتزيد مدخليش روحك راح تتقلب عليها واذا وصلوا خبر من كاش واحد من الاحسن مش انت ديك الساعة تشوفي واش يديرلها المهم انت متهدريش باش متمسحهاش فيك تولي انت اللي غالطة هاذو راهم يقولولهم الفايقات الخبث ماشي في الدم ومن بعد يخرجوك غللطة امالا خليها رح الحفرة اللي تحفر فيها طيح فيها تبعيني ومتندميش متردي بحتى كلمة هاي عيني راني وصيتك وكل متقول هكاك استغفري ونوضي وخليها وحدة كيما هكد الكلام خسارة فيها
يخي حالة خويا مهما دار منطحنوش قدام الغاشي مش كي نغير من زوجة اخي يوصل بيا الحال لهكا يخي وقت يخي
ربي معاك

[ايمان نور الجزائر]

الغيرة تنطق..الحجر
اختي اصبري صبرا جميلااااا ..وسعي بالك وخاطرك
قبل ما يكون زوجك راه خوهاااا....لي تقول على خوهااا ماشي راجل الناس تقول عليها
ماشي مراة
ادعيلها بالهداية ....

[ام ملاك.]

المشاركة الأصلية كتبت بواسطة كاميلا

شوفي اختي هاذي خبيثة كبيرة احذري منها ومتمشيلهاش في الخط تقول على اخوها ماشي راجل مع لافامي ؟؟؟؟؟؟؟؟؟ شيء غير طبيعي انا اخي مهما يكون منهدرش عليه ولا اقلل من شأنه امالا راهي دير هكذا باش نتي تخرجك عن شعورك يخي راهو خوها خليها تهدر وتزيد مدخليش روحك راح تتقلب عليها واذا وصلوا خبر من كاش واحد من الاحسن مش انت ديك الساعة تشوفي واش يديرلها المهم انت متهدريش باش متمسحهاش فيك تولي انت اللي غالطة هاذو راهم يقولولهم الفايقات الخبث ماشي في الدم ومن بعد يخرجوك غللطة امالا خليها رح الحفرة اللي تحفر فيها طيح فيها تبعيني ومتندميش متردي بحتى كلمة هاي عيني راني وصيتك وكل متقول هكاك استغفري ونوضي وخليها وحدة كيما هكد الكلام خسارة فيها
يخي حالة خويا مهما دار منطحنوش قدام الغاشي مش كي نغير من زوجة اخي يوصل بيا الحال لهكا يخي وقت يخي
ربي معاك

حبيبتي واش قالت الاخت كاميلا عندها الحق لااهي مبيتتلك على نية كحلة
امالا ردي بالك كي تشوفيها تحكي على راجلك نوضي وخليها رايح يجي نهار ويسمع وهو اللي يحاسبها انت ماتخبريهش باينة راهي ترسم وتخطط من زمان
المهم عيشي حياتك انت وراجلك مهنية البسي ولاش تحبي اخدمي كيما تحبي وخلي الغيرة تاكلها الهمية
ارميها في الثقيل واذا لحقاتك ماتخليش حقكو وماتسكتيلهاش باش ماتطلعش فوقك

والاخوات الي قالو بللي تبينو في العجوزة ماشي مليحة واللوسة
ايه صح ماشي ملاح مايحبوش الكنة وابدا ماكانش عجوزة تعامل كنتها كي بنتها دايما تفرق واللوسة باينة الغيرة ماكلتها
انا واحدة راني في بلاصتها بصح حطيتلهم قع حدود

[imene12]

لو كنت مكانك لطبقت الحكمة القائلة : " أمارس التجاهل في حياتي كثيرا ..لأن لإهتمامي لا أمنحه إلا لمن يستحقه فقط".

[omanova2003]

يعطكم الصحة و بارك الله فيكم
انا صح مقلتلوش راجلي خطاش يحبني و نحبوا وجامي دارلي حاجة ماشي مليحة
بصح البارح أحكت لوسوتي وقلتلها لوكان اتي تقبلي على راجلك تقولوا ختوا هكذا والا ديرو العيب و تحبوا نسكتولكم
سكتت ومستناش اني نقولهالها