اريد رايكم بصراحة

[مشكلتي]

انا متزوجة منذ 6سنوات ولدي ولدين المشكلهو عجوزتي متخلنيش نقضي اوندخل المطبخ من نهار لتزوجت ممنوع علي الطبخ الغسيل الميناج واحد مافهم علاه كنجي نقضي ولا نطيب تخرجني من الكوزينة وتقلي الهاي باولادك وانا طيبة معاها بشهادة الجميع هدرو معاها بناتها وراجلي ولكن لاحياة لمن تنادي راجلي كنقلو يقلياصبري ويسمطني ماحنا عندنا شقة وقتلو نسكنو وحدنا مع العلم ان امه مسامحتلو يخرج وحدو بصح مفهمش علاه راه ساكت كاش واحد يقبل امه تخدم ومرتو مربعة اديها صرت اشعر بالاحراج خاصة امام اضياف وانسابها كي يجو للدار واش يقولو مكسرة فنيانة متعرفش واش نحكيلكم على التبهديل وانا الحق ولات لي هيبة في اطياب والقضيان من غي غرفتي منخرجش وانا الحق نسايس في العافية ومنيش حابة المشاكل على وجه راجلي بصح هو مفهمش روحو لكان حبيبك عسل متلحسوش كامل اريد رايكم خاصة انت سيدي الرجل مارايك لو رايت زوجتك هكذا مع امك ماهو تصرفك ونظرتك الى زوجتك اوامراة كحالتي ديما نقول واش نظرة زوجي هل يشعر بي كزوجة لها دور ام اني زوجة بيولوجية فقط ارجو نصيحتكم ولاتقولو لي الصبر فقد مل الصبر مني

[chamam]

السلام عليكم ..........عندكم شقة وزوجك ..يريد البقاء مع امه ...وهدا نوع من الرجال انا احترمه ...والواجب عليك طاعة زوجك

خصوصا ...ان دخولك للمطبخ من عدمه ...ليس فيه اي مشكل ...يعني زوجك لم يشكوا ..من شئ ...

اما قولك ...هل انا زوجة بيولوجية ...اقول انت زوجة صاحبة اديولوجية .....جميع النساء عند الزواج اول مايفكرون فيه هو

الانفراد ...والاستقلالية ..وهي حقيقة ...لاتحس المراة انها صاحبة منزل الا ادا كان لها ...بيت منفرد .....ولكن الواجب هو طاعة زوجك

لاسيما انك ....وافقت على الزواج به (ميتاق غليظ) ...وانت تعرفين انه يعيش مع امه ......

[إكليل]

إذا كان زوجك راضي بهذه العيشة و لا يأنبك فلا اعتقد أنه يوجد مشكل .الأساس أختاه هو في علاقة مع زوجك مادامت طيبة فلا تبالي بكلام الناس و لا بالضيوف فقد ياتي يوم يعرفون فيه الحقيقة.

[مريم الصابرة]

السلام عليكم أختي
أولا الحمد لله إنو زوجك مرضي والديه وراه عندك والدان حقك تفرحي لأنو كما تدين تدان فلما هو بار بأمو الاكيد ولادك راحين يكون بارين بيكم
أختي راجلك ما شكاش وبناتها عارفين المشكل من عندها مش من عندك معليش كبري قلبك إنت اخدمي اللي واجب عليك وما تربحيش المشاكل معاها سايريها أحكي معاها سقسيها اكيد تكون لحظة وين تقسري معاها وسقسيها ممكن عجوزتك من نوع اللي قلبها رهيف وما تحبش تاكل إلى ماكلة يدها ممكن كوزينتها تعتبرها عرش نتاعها اللي غالب كاين هكذا يخمو إنت راكي مرتاحة خلاص وزوجك ما شكاش اما امام الضياف عادي لما توفيها ناضت نوضي وراها وخلاص على الأقل يحسو إنك إنت حطيتي ورفدت وخلاص واش ديري الله غالب
ما تقلقي روحك ما تقلقي راجلك وديري مشاكل اما يروح يسكن وحدو رغم هي سامحتلو راه راجلك هو ما يقدرش وبارك الله فيه لازم طيعيه
ربي يهديها

[محمد جديدي التبسي]

حقيقة مشكلة غريبة وقد يحسدك بعض الزوجات خاصة مرة مشكلة هنا وحدة في شهرها الثامن من الحمل وحماتها مش راحمتها
تصرف أم زوجك غريب معك لابد أن تتقربي إليها وتعرفي مشكلتها ..لم تخبرينا عن طريقة معاملتها لك في باقي الجلسات العائلية يعني تبتسم في وجهك أم تعاملك بنوع من الفضاضة..
على كل أنت مرتاحة من أعمال البيت ومتفرغة لأبنائك وزوجك راضي عنك لكن هذا لا يريحك طبعا لذا عليك دائما السعي لكسب ود أمه وساعديها بدون أن تطلب واستغلي فرصة خروجها من البيت وقومي بالأعمال عنها كذلك اشتريلها الهدايا لربما تتغير الحال .. ربي يوفقكم

[أم عبد الكريم]

اختي مادام زوجك قابل وموش مقلقو الحال متقلقيش روحك اوجدي لنفسك هواية مارسيها و خلي عجوزتك تطبخ تغسل ديري واش حبت لانها في بيتها وانت الدخيلة ننصحك ديري الطرز او الكروشي او ديري الحلويات

[ibrahimm]

انا مفهمتش في العقلية نتاعكم

اذا قالولكم اخدمو كفماه و ذا قعدتو كفماه

احمدي ربي و هو حر يسكن مع الوالدة او دارو

[جويرية الإيمان]

سبحان الله نفس مشكلتي "تقريبا" من أول ما تزوجت و أنا ساكنة وحدي و نروح لدار شيخي "ضيفة" على حد تعبير عجوزتي. و كيما قلتي ما تخليني ندير والوا .و إذا دخلت للمطبخ تقولي روحو اقعدو في الصالة ظرك يوجد العشاء . حتى زوجي وين يشوفني قاعدة يقولي أدخلي عاوني ماما و أنا نقولو راهي حاوزتني . حتى بشوي بشوي وليت ندخل للمطبخ و نخدم الحاجة لموجودة مثلا نغسل سلطة نغسل المواعين نفرز المطبخ . و حتى كي نقضي عمرها ما تقول أنا لي قضيت تقول راها بنتها هي لي خدمت و ظرك راه عندي 6 سنين و ندخل للمطبخ بالحيلة . انت اصبري و ما عندك ما خسرتي يخي الناس كامل عارفين بلي ما تخليكش تخدمي . و كيما قال الأخ سابقا اغتنمي فترة غيابها و أطبخي ل تحوسي عليها. و ما تقوليش حتى ملّ الصبر مني هاي كاينة في الأغاني برك ياختي راكي مسلمة و عارفة جزاء الصابرين و جزاء طاعة الزوج و الحمد لله راكي متهنية مع زوجك الدنيا و ما فيها . و دارك تعياي و تروحيلها غير بشوي برك و ربي يهنيك و يكبرلك بالك .

[أم شروفة]

عجوزتك ياإما تحبك فوق اللزوم.أو حابة الناس بقولو عليك فنيانة.لذا اختي اللي حابة تعيش مع اهل الزوج لازم تكون حيلة ودهاء يمشي في الارض.غير تشوفي الضياف نوضي اخدمي وكي يخرجو روحي الى غرفتك مرة او اثنين تفهم روحها عجوزتك وتعرف باللي انتي قادرة على شقاك.

[roose]

في رأي ديرو طاولة مستديرة انت و زوجك و أخوات الزوج و حماتك قولي لها مشكلتك قدامهم و شوفي واش تقلك و ساعات قولي لها حبيت نطيب هديك الحاجة ذراري حبوبها اذا تخليني و هكذا بلاك تقدري تغيري منها

[مواطنة]

شوفي اختي لازمك تحمدي ربي بزاف على هذا الحال لانو لوكان تولي تشوفي العرايس واش يسوفريو في الشغل و الطياب و الضياف و الدراري تهربي
احيانا الام تحب تكون المدبرة الرئيسية بلا منازع لمملكتها ولوكان توشي كاش حاجة انت تقدر هي تغلط معاك لانها معتادة على نمط معين
انا وحدة يما كي نبدل مكان مواعن ديرلي ملاحظة وهذي لي ولدتني و منها وليت نفهم لعجوزة كي تقولك خلي انا نخدم خليها
خذي الامر من هذه الجهة يمكن الام ما تقدرش تتصور وحدة غيرها مدبرة البيت او ماتحبش واحد يمن عليها
لذلك التهاي بولادك مليح و راجلك بعديه على المشكل و هدي فرصة ليك انك تعتني ينفسك و وتربية الاولاد وزيارة اقاربك و بالك مهني
بما انك نيتك صافية ماتتبهدلي ما والو
نهار تكره تلاشي
و انت ماتفسديش حياتك علاجال مشكل هو نعمة في حد ذاتو

[ميمي سمية]

سلالالام

مدامك طلبتي راينا ختي نقولك ... افرحييي هههههه بزاااف لي رايحين يحسدوك على النعمة هذي لخاطر تعرفي قدماه من وحدة تعاني تجيب انلهار كاامل وهي تخدم في عجوزتها ودار راجلها ومن اللخر تقول عجوزتها وقدام الناس راهي مادييير وااالوووو

هههه يعني احمدي ربي راكي خير من بزاااف من النساء

++++

اما اذا كنتي نتي حابة تخدمي هنا نقولك ختي

احكي مع راجلك هو لي يفريها

يا اما يحكي مع عجوزتك ويقولها خليها تخدم {ومادراك مهيش حابة تعبك ، ولا كاين نوع من الناس مايشتيوش خدمتهم يديروهالهم اخرين ومثال على ذلك الوالدة تاعي تشتي خدمتها وبيديها كي ندير حاجة ماشي كيما ديرها هي مايعجبهاش الحال}


ويا اما ترحلو وتشوفو وين تسكنو وتعود دارك وحدك وتتهناي {طبعا حسب الظروف المادية}

في النهاية ختي نقولك مشكلتك ماهيش مشكلة كبييرة لي تحتاج لتعقييد منك

مي حاولي تحليها {الحل كاامل راهو بين يديك}

[نارينا]

انا حايرة في هاد العجوزة اللي ماتتعبش الله يبارك

[جمعي البشاري]

اظنها نعمة يااختي حمد ربي عليها وتلهاي بولادك وبيتك وتعلمي حاجات اخرى مثل الخياطة
لان يجي نهار متلقاي وقت باش تقومي على كامل اشغال المنزل

[bellaluna]

أعتبر أنّ مشكلتك ليست مشكلة حقيقة فأم زوجك في منزلها و حرّة في تسيير شؤونها بالوجه الذي يرضيها و اعتقد انّ سكوت زوجك علامة على تفاهمه مع أمّه على هذا الامر ربّما لأنّهم على هذا النّظام مدّة طويلة و لا يحبون شخص دخيل يفسد نظامهم او ربما يحب أكل أمّه و نظام امّه و لا يرغب باستبدلهما.