ارز بسمتي بالشعيرية و اللحم المفروم

[ام مريم اسراء]

السلا عليكم

للتغيير ليوم حبيت نحط وصفة الارز البسمتي








الوصفة سهلة و تعتمد على البهارات كثيرا

اولا نغسل جيدا الارز نتاعنا سواءا البسمتي او المفور العادي حتان يولي الوعاء الي فيه الارز شفاف و هو سر يخلي الارز مزربع لانو بذلك راح نتخلص من كامل النشاء الي يخليه مكلز و ننقعو في الماء لنصف ساعة .......

في مقلاة نقلي الفرميسال نتاعنا في الزيت حتان تتحمر و نحطها في في - الكوكوت - و في نفس المقلاة نقطع البصل مربعات صغيرة و سنات ثوم مقطعة رقيق نحمرهم في الزيت و نحط اللحم المفروم نحمرو و نزيدلو الملح و الفلفل الاسود و نحطو مع الفارميسال و نصفي الارز و نحطو معاهم و نزيد قيس 3 ملاعق كبار زيت و نحط مكعب جونبو دجاج و ملعقة صغيرة ملح و ملعقة ص عود لصفر و نصف ملعقة فلفل اسود و ملعقتين ص كمون و نص ملعقة قرفة يعني يحوس على البهارات ممكن يحتاج اكثر يعني عينك مزانك
حسب الكمية نتاعك لدرجة انك لما تقلبي تلقاي اللون الغامق ظاهر جدا جدا كثري قد متقدري و حطي الككوت فوق النار يتقلى و قلبي الكل باش يتجانس الخليط و ياخذ بنة البهارات زيدي ورقة رند اذا حبيتي
مرقي بحيث تكون كمية الماء دوبل نتاع الارز و اقفلي الكوكوت و خليها تطيب على نار خفيفة لمدة 10 د او 15 د تقدري تطيبيه عادي في طنجرة على نار هافتة اذا عندك الوقت انا ليوم كنت مزروبة
تقدري تزيني الطبق بلوز افيلي محمص او لوز محمص او كاجو او صنوبر محمرين بزبدة جربتها مرة زوجي لم يستصغ وجودها و كاين الي يزينوه بالزبيب لكن افخاذ الدجاج او اللحم هي الي تعمر عين الرجل الجزائري

بصحتكم