قررت الإنفصال

[مشكلتي]

قررت الإنفصال
السلام عليكم بعد ماجفت دموعي قررت الإنفصال عن خطيبي لكن للأسف شعور غير متبادل
بعدما سقيته بوابل من الحب الثقة الإحترام و التقدير لم يتوانى في جرحي و إهانتي
تعرفت عليه في سنوات الجامعة إنتضرته مدة 3 سنوات حتى دار التويل وأنا حكمت خدمتي و جا خطبني كانت هناك مشاكل في الخطبة بسبب البعد لكني كنت جد متمسكة به حاولت مع أهلي كتيرا في حين هو لم يبذل أي جهد
كي شافني شادة فيه تبدل علي بزاف بزاف ياناس ولا يتكبر علي و يزوخ علي بالرغم من أن المستوى المعيشي التاعي أحسن منو
عاد يطيح بي إذا متفاهمناش على حاجة كلمة زوج يقولي الله يسهل عليك عندي مدة 6 أشهر خطبة و بفالي 6 أشهر للعرس لكن محسسنيش أنو مهتم في أو أصلا مهتم بالزواج
معه أفتقد إلى الإهتمام تمنيت كاش نهار يحسسني أني مرأة حياته ولو بالشئ القليل
ملي لبسنا الخواتم دار الخاتم هداك النهار و مبعد مزادش لبسو كي نقولو علاه متلبسوش يقولي يقلقني مع أن هو اللي شراه
في العمل التاعو معلابالهمش راه خطب حتى صحابو معلابالهمش وصلت وين في الفيسبوك التاعو لقيتو خطرة حاكي مع وحدة و قالها منيش متزوش يعني أنا عندو نكرة
يهدر بزاف على التعددية في الزوجات يعاملني كيما عدوتو
إذا غلط معايا عمرو مايطلب السماح دايمن يردني أنا الغالطة حتى إذا بكيت قدامو مايستعرفش لايحرك ساكنا
و إذا حاولت نستفسر قتلو راك تبدلت بزاف يسكت و يخليني كلما نحاول نهدر معاه يسكت و يخليني و يعاديني نرجع نحلل كالكلبة حاشاكم
و اللي راهي غايضتني كتر و كتر هو يخدم في العاصمة وحد الخطرة كنت في مهمة في العاصمة تلقيت بيه حكينا و مبعد عيطتلو و أنا معاه ياناس كاتبني في تيليفونو ma soeur قريب هبلت كي قتلو وعلاش قالي pour éviter صحابي ,حكمت تيليفونو و قاعدة نخرب لقيت ds la liste des appels معيط ل 6 بنات كل وحدة مين كي قتلو وعلاش ولا يخترع في الحكايات المشكل أنا متأكدة أنو يكذب مقدرتش نتحمل الوضع و قتلو نولي للدار ,و صلني لمحطة القطار و طريق كاملة و هو ساكت و انا نبكي لحقنا للمحطة على اللساعة 2 زوالا رحنا للقيشي باش نخلص ولا تصرف رجولي خلاني أنا اللي خلصت البيي و القطار يروح على 3 زوالا خلاني نقارع للقطار وحدي و هو راح قلي عيطولي من الخدمة
و الله غير تحملت منو بزاف راني كرهت كرهت من الدموع كرهت من التخمام كرهت من الذل صبرت معاه بزاف أنا طالبة العافية معدني ليس من معدنه أنا منقدرش نحقر خاصة أنو تبدل على لم أعرفه هكذا أحسه غريب جدا
راني نكتب و نبكي المهم هذا هو قراري سأنسحب من حياته أعرف أنه غير متوقع مني هذا التصرف لكن أنا نتأكدة هذا مايريده
أي أراء مقبولة منكم

[أمة الله 12]

اذا انتي تخوني و تهدري مع الرجال.كملي معاه و اقتنعي بمكتوبك

اذا انتي صايناتو و هو لا. بطلي عاااااااااادي جدا. تلافو يجيب خلافو

مكانش حاجة تستاهل تقلقي روحك عليها. و غلطتك بينتيلو انك مهتمة ياسر

الله غالب قليل وين تلقي ناس يستاهلو التضحية

اللي فيها خير ربي يسهلك فيها

[zeyar zeyar]

علاش قاع هذا القلق يا اخت مراكيش مرتاحة انفصلي عليه احسن .......و ربي يعوضك احسن منه .......لست الاولى ولا الاخيرة نصيحة لك اغلب حالات الطلاق هي تحكيم القلب بدل العقل ....افيقي افيقي افيقي.

[nawel zed]

سلام اختي ما تبكي ما تقلقي روحك هو الخسران الا انتي صافية مع ربي صبحانوا خلاص اللي جابو يجيب غيرو و خير انشاء الله يجيه النهار و يدور بيه الزمان و يعرف قيمتك ديري موقف لروحك لكان كيما تحكي راكي صبرتي و تحملتي خلييييييه يتبع هواه مافيهاش عيب تنفصلي خير ما تكملي حياتك مذلولة شدة و تزول ربي يقويك كلش بالمكتوب

[رجوت عفوك]

يا اختي و علاش عليك قاع هذا الذل ؟؟؟؟

كملي حياتك وانسايه باين بلي ماهوش يحوس عليك و راه يديرلك هكذا برك باش تطلبي الإنفصال ونتي مافهمتيش روحك ... اسمحيلي على هذا الكلام .. لكن هذا واش فهمت ..

*** أسأل الله ان يرزقك الزوج الصالح ***

[حورية38]

هدا انسان ما فيهش تقة مدام راه معتبرك // اسفة على التعبيرنكرة// ما يستهالش تبقاي معاه والراجل نهار يلقي بنت الحلال يفرح ويحب كامل الناس تفرح معاه هدا حاب يعيش حياة الزهو وحدة لدار والباقي برا انت مازال ما وصلتيش مرحلة الندم الاحسن تقعدي معاه وتصارحيه ادا ما جابتش نتيجة الافظل تاخدي قرار مالازمش تندمي عليه واستشيري افراد عايلتك ام او اخت تعاونك وتنصحك وادا مالقيتيش صلاح انسان ماعندوش احساس بالمسؤولية ولا غيرة ولا تقدير لامراة ستصون عرضه وتحمل اسمو ما يستهالش ....لكن عليك التاكد والتكلم معه ربما كانت وساوس فقط لاقتراب موعد العرس ربي يجيب الخير وتلقاي راحتك وهناك

[MARAM DZ]

لازم اختي ديري موقف وخلي لروحك كرامة وانفضلي عليه باين ما يستاهلكش وربي يرزقك خير منو

[أم شروفة]

حسني نيتك وما تحسسيهش باللي راكي مقلقة.اجتنبي الكلام معاه حتى تتزوجيه ومن بعد وريلو العيييييييييييييين الحمرااااااااااااااااااااا.قال تعدد قال.هههههههههههههه والخاتم جميع الرجال ما يحبوهش زوجي لم يلبس الخاتم يوما عادي

[chero]

ماتبكي ماتقلقي روحك ... صح تيضك عمرك ليامات لولى برك و من تم ان شاء الله تنساي ... و خيرو في غيرو

الحمد لله كي عرفتيه قبل ماتكبر بيناتكم .

و يجي النهار الي يعرف قيمتك ... و الحياة لا تتوقف عند انسان لا يستحق .. ديجا هو الغالط ماشي انتي .

[oumhana]

الباب اللي يجيك منو الريح سدو واتريح

[fahima06]

avant qu'il soit trop tard laisse le comme un hawhaw pardon pour le mots

[sofix206]

يجي يوم ويندم عليك الأخت ... هدا كي شافك متعلقة بيه حقرك مي كاين ربي

[bebe99]

شوفي اختي اخطيك منو خير باين مش ناوي الصلاح وضرك خير من مبعد ولا تتراجعي عن قرارك

[كلنا راحلون]

السلام عليكم قبل ان تنفصلي عليه لما لا تخضعيه في اختبار جد قاسي نوضح اغلقي هاتف مدة شهر تجاهليه ولا تنهاري بلبكاء امامه تبسمي في وجهه ابتسامة عريضة واكثري من كلمة life never stop
و انظري الى ردة فعله ادا بقي في حالة السابقة فعفوا الانسحاب خير من الخسارة
والسلام عليكم

[نورسين.داية]

السلام عليكم

أختي هذا الإنسان يظهر لي أن به حالة ملل ........و المدة التي ذكرتها .....كفيلة بدلك

نصيحتي ناقشيه على أساس إرادتك لفسخ الخطبة و السلام ألم تكفي 3 سنوات ؟