مشكلتي الوحش البشري

[مشكلتي]

السلام عليكم خاوتي

مشكلتي شوي صعيبة واسمحولي على الهدرة لي راح نقولها

لانها ماتدخلش في العقل مع انو دركا كلشي كاين

خصوصا اذا تعلق الامر باقرب الناس ليك وكان المحرم نتاعك

لانو هذي مخالفة لعادات والتقاليد ولكن انا ولله ماهي بيدي الحاجة هذي صرات بالعكس


المهم مشكلتي بدات كيما كنت في عمري 12 سنة (الان راني 22 سنة)

وقتها كان صيف ودارنا بعثوني انا وختي صغيرة لدار جدي باش نفوتو الصيف

وكنت ديما نحب نروح لدار جدي لاني كنت نرتاح وكان عندي خالي عزيز عليا بزاف وهو ثاني يحبني مي في الصيف هذاك ماعلاباليش وش بيه

رجع وحش بشري حيث انو كان يعاملني ماشي كيما بنت اختو لالا تقول صاحبتو اسمحولي في هاذ الهدرة وماتعتابروهاش وقاحة مي ولله هذا لي صرا كان يجي ويبقى يلمس في اجزاء من جسمي استغفر الله العظيم

ولله راني نكتب وانا مانيش حابة نتفكر هذوك الايام

حتى بدا بشوي بشوي يتغزل فيا ويقول كلام مايتوعبوش العقل البشري انا كنت صغيرة وكنت خايفة وكنت ديما ندير تيلفون لماما ونقولها راني حابة نرجع

وهو كان ساعات يدخل في ليل سكران ويدخل لوين راني راقدة ويقعد يمس فيا وحوايج مانقدرش نقولهم

حتى مرة قولتلو ماتزيدش دير معيا هكا قولتلو راني ماحبيتش نقول لماما ولا جدتي
قالي وعلاش وش راني ندير قولتلو انا مانيش صغيرة وهذي راهي حرام

المهم جات ماما وانا مخبية هذاك السر لحد الان ماقولتو لحتى واحد هذا وين راني نحكي فيه هنا


ودار جدي مارجعتش نروحلها رجع يجي لدارنا ويطارد فيا وانا نهرب منو ونبكي

وماحبيتش نقول لماما بيسك ماما تحب خالي هذا فوق الحدود وانا ماحبيتش نخلق مشاكل

ودركا راني كبرت وهو ماكانش مزوج تزوج عندو عامين

وانا بعدت على دار جدي حتى كرهتها في جرتو

والمشكلة دركا عندي بنت خالي واحد اخر لي هي بنت خوه

في عمرها 14 سنة راهي زوجت هاذ الوحش البشري راهي تقول بلي راني شوفتو بعيني راه يمس في بنت خوه وراهي تطلب في طلاق دركا

اكيد واحد ماصدقها ورجعو الناس كل تكرها وقالو بلي راهي تتبلى على راجل كيفاش يدير حاجة هذي في بنت خوه

لكن انا الوحيدة لي مصدقة الحكاية لاني كنت نحساب فيه تاب مي الضاهر لالا

وانا ساكتة وماقدرتش نهدر ونقول راهي تقول في الصح بيسك يديرها

وبنت خالي هذي نية شوي مانيش فاهمة كيفاش ننصحها خصوصا اني جامي حكيت معاها وهي على نيتها يعني ممكن تصعب الامور عليا

تعيشو قولولي وش ندير

وماما وجدتي ديما يقولولي سقسي على خالك مي هوما ماعلابالهومش وش دار فيا

وبقاتلي هذي عقدة في حياتي لدرك


انصحوني كيفاش ندير