البدرون لاختي نسيبة2009 وكل الاخوات

fifiarch · 2012-09-12, 14:32

مساء الخير لبنات
راني جبتلكم وصف قصير للبدرون وطريقة الخياطة والقماش المستعمل
ان شاء الله تكون مفيدة ليكم
وبخاصة اختي نسيبة

البدرون هو احد الالبسة التقليدية الجزائرية ويظهر اكثر في العاصمة وتعرف به
بلبسوه بخاصة العرائس ويضموه للتصديرة نتاعهم
واغلبية العرائس العاصميات مايستغنوش عنو في التصديرة

ككل الملابس التقليدية كاين فيه بعض التغييرات لمواكبة الموضة
كاين البدرون الثقيل يعني لي فيه خدمة ويكون مشارجي بالطرز وغيرها
وفيه السامبل والعصري لي يصلح للبنات غير المتزوجات
يعني مايكونش حكر فقط على العرائس

والان نعطيك بعض الصور للبدرون التقليدي والعصري
باه تعرفي الاشكال نتاعو كاملين

بالنسبة للقماش المستعمل
كاين انواع وكل اخت تستعمل على حسب المودال لي تختارو هي

كاين مودال يشبه للسروال المدور نتاع الكاراكو
هذاك استعملي الساتان بانواعو يخرج هايل

وكاين المودال الاصلي نتاع البدرون وهو هذا
يصلح للبنات غير المتزوجات
يكون سامبل وماشي مشرجي وطبعا التفصيل واحد لكن كل اخت وتختار طريقة التزيين
هذا النوع يجي بقماش يكون مطلوق لانو راح يتلبس بين الرجلين
لام قماش مرتخي هكا باه كي تعديه بين رجليك يجي هابط ويعطي لافورم شابة
هذا المودال لي نحكيلك عليه هنا

وهذا هو المودال لي راح نعملولو الشرح نتاعو
انا كنت قبل حطيت موضوع عن البدرون فيه طريقة الخياطة
هاوليك الرابط
https://www.djelfa.info/vb/showthread.php?t=895673
كبري الصور وشوفي مكتوب عليهم الشرح المفصل
والموضوع تانا فيه طريقة اللبس
لكن راح نزيد نشرحلك طريقة اللبس على صورة بدرون حقيقي
هذا بدرون انا خيطتو من قماش ساتان لازار درتو سامبل وبقالون سامبل هكا باه نجرب ونفس الوقت باه مانخسروش الدراهم
كل شيء كان فيه تمام غير من الاسفل المكان لي يجي بين القدمين كان منفوخ لانو القماش واقف
وبهاذ الشكل مايجيش شباب من اسفل
يعني لو كان اخترت قماش اكثر ليونة كان راح يجي هايل

المهم تابعي الخطوات نتاع موضوع الشرح جيدا باه تفهمي طريقة اللبس

وهذه الصورة عملتلك فوقها الشرح لانها واضحة وراح تبانلك احسن

والبدرون على حساب شرح طريقة التفصيل تقدري تعمليه طويل او قصير حسب الرغبة نتاعك

بالتوفيق اختي واي استفسار راني هنا

ملاحظة
للاسف ماعنديش مانكا في الدار
واختي صغيرة تقرا باه نلبسها ونصور المراحل
وانا ماكاش شكون يصورني وانا نلبس فيه
مالا حاولت نشرح بالصورة
ان شاء الله تكون واضحة

pink rockette · 2012-09-12, 15:15

merci okhti mémafhamtech 3leh toul fi 2 wa3lech machi tol fi 3

batoul2000 · 2012-09-12, 16:29

يسلمووووووووووووووووووو
لكن ياريت يكون الشرح مفصل اكثر
يسلموووووووووووووووووووووو

fifiarch · 2012-09-12, 18:35

اقتباس:

المشاركة الأصلية كتبت بواسطة pink rockette

merci okhti mémafhamtech 3leh toul fi 2 wa3lech machi tol fi 3

الطول في زوج لانو راح تعملي قطعة طويلة وتلبسيها من الامام للخلف
فهمتيني ضك
يعني تعملي حساب طول البدرون شحال حبيتيه وتضربيه في اثنان باه كي تخيطيه راح تكون قطعة طويلة وتتلبس من الامام للخلف يعني راح تتقسم على زوج وتتحصلي على الطول لي انت حاباتو

fifiarch · 2012-09-12, 18:37

اقتباس:

المشاركة الأصلية كتبت بواسطة batoul2000

يسلمووووووووووووووووووو
لكن ياريت يكون الشرح مفصل اكثر
يسلموووووووووووووووووووووو

الله يسلمك
لكن حبيبتي بتول واش راح نزيد في الشرح
اذا كان اي غموض اسالي عنو وراح نعاود نشرحهولك

ايمان16 · 2012-09-12, 19:03

444444444444 مرسي

تجويد4 · 2012-09-12, 19:14

بارك الله فيك

موضوع قيم

fifiarch · 2012-09-12, 20:43

مشكورين اخواتي على التشجيعات

نسيبة2012 · 2012-09-12, 20:46

يعطيك الف صحة حبيبتي الشرح راهو كافي ووافي انا ممنونة لك ........................ربي يحققلك واش تتمناي راكي حطيتي واش نحوس و زيادة .....انا هدا وين فتحت الميكرو راكي تعرفي الشغالات ....نحب كي نعود نكونيكتي يكون وقتي طويل على هدا لازم نكمل كل شي قبل ما نفتحو .............و جزاكي الله خيرا.......

fifiarch · 2012-09-12, 21:02

اقتباس:

المشاركة الأصلية كتبت بواسطة نسيبة2012

يعطيك الف صحة حبيبتي الشرح راهو كافي ووافي انا ممنونة لك ........................ربي يحققلك واش تتمناي راكي حطيتي واش نحوس و زيادة .....انا هدا وين فتحت الميكرو راكي تعرفي الشغالات ....نحب كي نعود نكونيكتي يكون وقتي طويل على هدا لازم نكمل كل شي قبل ما نفتحو .............و جزاكي الله خيرا.......

اىلعفو اختي نسيبة
الحمد لله اني افدتك واي حاجة تحتاجيها ونقدر نساعدك انت او الاخوات راني هنا
بالتوفيق للجميع