2في 1 فطير القدرة + مسمن مركب من مطبخي,

أم بدر الدين · 2014-01-06, 16:36

السلام عليكم ورحمة الله و بركاته

اليوم جبتلكم وصفة تقليدية كانت ديرها امي ربي يرحمها و لكن انا حبيت نغير فيها شوي وزدت اضافات جعلت من الطبق اروع طبق ممكن تقدميه في فصل الشتاء

فطير القدر او ثمقزرث (بالقبائلية)+ مسمن مركب بنفس العجينة كثرت شوي الدقيق لان فطير القدرة مترفدش كمية كبيرة من العجين

نطيبو لغدا و نخمو في حاجة اخرى في نفس الوقت باه كاروحو من المدرسة يلقاو وش يوكلو ,,,,,

المقداير

نقيلو البصل في زيت و ثوم ومن المفروض اكون فيها شوي قديد و انا معنديش عوضت بشوي شحم وايضا لازم شوي فول مدشش قدر حفنة اكون مشمخ في الماء ليلة من قبل و انا معنديش عملت غير الحمص

ومبعد نظيف المكونات الاخرى و التوابل لهي ملح فلفل اسود فلفل عكري و راس الحانوت و نخليو البطاطا والطماطم و اللحمم المفروم

نمرق بعد ما تتقلى مليح بكمية كبيرة من الماء حتى منزيدش نمرق و تسماط الاكلة من بعد

مبعد نلوح كرات اللحم تكون موجدة بملح و شوية فلفل اسود و ارز مرحي اعجنيها مليح و كوريها صغيرة جدا قد حبة الزيتون و لوحي حبة طماطم بقشورها و البطاطا وكتنضج الطماطم نخرجها نحيلها القشرة نرحيها و نزيد ملعقة كبيرة طماطم مصبرة و نزيدها على المرق مع البطاطا و كل هذا كراح نبداو نولوحو العجينة في القدر

نوجدو العجينة

كيلة سميد و كيلة فرينة و ملح و ماء فاتر

مديروش بزاف لان الاكلة لاتحتاج الى كمية كبيرة من العجين

نتحصل على عجينة طرية نكورها صغار خلاص لان القدرة لازم تكون كبيرة مليح و بما انيمعنديش قدرة كبيرة نصغر حجم الكويرات نقرصهم و نحط فوقهم شوي زيت و ماء باه متعملش القشرة و نغطيهم يرتاحو

نفتحوهم بالزيت و منكثروش بزاف حتى لا تكون الاكلة دسمة كثيرااا

نهزهم بالوحدة و نلوحها في المرق الغزير و نقصي على النار و بالملعقة الخشبية كتبدا طيب الورقة غطسيها مع التقطيع في المرق و لوحي وحدة اخرى

و كتشوفي المرقة نشفت تقدري تزيدش شوي ماء و متكثريش الكرات و انت وش تحبي كون تحبي مرق كثير و عجينة قليلة نقصي العجين و العكس

هذا شكلها بعد مطيب تحبي زيت الزيتون حطي انا منحبهاش يالزيت و لتحب الحار ايضا او لهريسة تقدر تحط

جربوه ورودولي لخبر رائع فعلا وهو جيد للنفساء
و الان لمسمن لمركب كورتها قبيل كرات اكبر من كرات لفطير

نحل نص الكمية و نطبقها بالزيت و نطيبها و نخليها على جنب

و مبعد ديري نصف الكمية الاهرى كما في الصورة وحدة طايبة في وحدة نية مع رشة سكر فوق الوحدة الطايبة

و نزيد نغلق و نكثر فوقها الزيت باه طيب ذهبية

و هاهو شكلها النهائي

بالصحة و العافية

oum ibrahim · 2014-01-06, 17:10

يعطيك الصحة تبان تشهي

طير الرحمة · 2014-01-06, 17:18

يعطيك الصحة
الفطير المركب هاااااايل ويبان مورق
الفطير فى القدر هاااايل اول مرة نشوفو

أم إناس · 2014-01-06, 17:51

المسمن ذقتو عند عاءلة زوجي اممممممممم يحب بنييييين
ام الطبق الاول مازال ما ذقتوش وباوك الله فيك

MOona Hind · 2014-01-06, 18:28

يا عمري على ثمغزرث طبقنا التقليدي المفضل في الشتاء يعطيك الصحه حتى ومنعملوش بنفس الطريقه

soriaalg · 2014-01-06, 18:34

مممممممممممممممم بارك الله فيك

lamiak1 · 2014-01-06, 19:23

Raw3a. Maxdou3 yastahij tathbite

zamilio · 2014-01-07, 14:03

اممممممممممم على ثمقزارث بصح المرقة ماشى كما احنا علما انا من لربعاء واسيف

zamilio · 2014-01-07, 14:04

انسيت انقولك لمسمن تاعك هايل ادحرز ربى افسنيم

أم بدر الدين · 2014-01-07, 17:22

اقتباس:

المشاركة الأصلية كتبت بواسطة zamilio

انسيت انقولك لمسمن تاعك هايل ادحرز ربى افسنيم

اذحرز ربي اراويم و ذواخاميم اولتما,

على كل حال ثمقزرث لعملتها مش هي الاصلية التقليدية انا غيرت فيها ما يناسب اسرتي شكرا على مرورك و سعدت بمعرفتك

ام ملاك. · 2014-01-08, 07:45

بارك الله فيك انا نحبها بزاف هاذي اممممممممممم شهيتيني فيها

ابداع جزائرية · 2014-01-08, 09:08

يعطيك الصحة اختي

القرآن راحتي · 2014-01-08, 12:13

ماشاء الله حتى انا كنت بصدد البحث عن أُكلة خاصة بالنفساء

جيجلية · 2014-01-08, 16:40

هذي الاكلة شفتها في قناة سميرة

قلت كفاش يجي هذا العجين اللي فالقدرة ظنيتو يجي معجن قلت مستحيل نقدر ناكلو

لازمني نجربو باش نعرف الذوق تاعو

شكرا اختي على التقاليد الجميلة

أم بدر الدين · 2014-01-08, 22:05

اقتباس:

المشاركة الأصلية كتبت بواسطة جيجلية

هذي الاكلة شفتها في قناة سميرة

قلت كفاش يجي هذا العجين اللي فالقدرة ظنيتو يجي معجن قلت مستحيل نقدر ناكلو

لازمني نجربو باش نعرف الذوق تاعو

شكرا اختي على التقاليد الجميلة

لالا اختي متجيش معجنة المهم لعجينة تجي رقيقة على قد ما تقدري و متكثريش انا نحبها عادي مهي جاية ماهي شايحة والله تجي روعة و كل واحد وذوقه ,,,