هذي طريقتي وهي الاحسن خاصة أنو مليحة للمبتدئن :
ديري كاسرونة ( طاوة ) على الكانون الصغير و نار متوسطة ماتقويش للنار بزاف وتحطي فيها 2 ملاعق أكل ماشي معمرين مليح فرينة ( انا دائما نصفي او نغربل الفرينة قبل الاستعمال ) + 2 ملاعق اكل زبدة وتحركي بالفوي كي تذوب الزبدة تزيدي تحركي دقيقة او 2 فقط باش الفرينة طيب شوية وتتنحالها ريحة العجين
تكوني موجدة توالك حوالي 1/2 لتر حليب : تبداي تزيدي بالشوية الحليب مثلا حوالي 1/2 كاس كبير حليب وتحركي بسرعة باش الفرينة ماديرش كتل رايحة تصبح مثل عجينة زيدي شوية أخرى حليب وحركي مليح بالفوي باش تتحل مليح هذيك العجينة في الحليب كي تبدى رايحة تهز الغلية و تثقال زيدي الحليب وحركي ....... وهكذا كل مرة كي تهز الغلية وتثقال زيدي الحليب غير بالشوية وشوفي
على حسب الطبق نتاعك حابة بيشاميل جارية او ثقيلة وعاقدة انت اللي تتحكمي في القوام نتاع البيشاميل نتاعك
كي تخلصي وهي على النار زيدي فيها إذا حبيتي قطعة جبن أبيض ( انا نزيد فيها قطعة جبن أبيض + قطعة جبن camembert بعد مانحيلو القشرة البيضاء لانها ماذوبش يعطيها ذوق رهيب وممكن ثاني تزيدي فيها شوية جبن مبشور كل واحد وذوقو وإمكانياتو ) وحركي مليح حتان يذوب الجبن وطفي النار
وهنا ذوقي إذا محتاجة ملح زيدي فيها ملح وشوية فلفل أسود
تعرفي الوصفات عادة يقولك مقدار كذا فرينة وكذا زبدة وصبي كذا حليب وساعة جيك جارية ساعة جيك ثقيلة بصح بهذي الطريقة تضبطيها على الشعرة تزيدي الحليب بالشوية وتخدميها مليح بالفوي تضبطيها كيما تحبي وزيد بالطريقة هذي مايجيكش فيها كتل ( كعابر فرينة ) لانو تحلليها بالشوية ماتصبيش الحليب كامل مرة واحدة
بالتوفيق 
( تقرير عن مشاركة سيئة )، و الموجودة أسفل كل مشاركة .
2013-12-28, 13:49
العرض العادي
