البسكوي رولي اللي يتشرب بالـ jus

كريمة كوكة · 2013-02-14, 21:57

السلام عليكم . جبت لكم اليوم الطريقة الناجحة و المضمونة للبسكوي رولي اللي يتشرب بالعصيرأو السيرو كيما حبيتو أنا نشربو بالعصير:
5 بيضات –ملعقة صغيرة فانيليا أو زاست الليمون أو أي ذوق تريدين.
125 سكر عادي
125 فرينة – رشة ملح
¼ كوب عصير برتقال (عصير رامي)
3 ملعقة كبيرة مربى حسب الذوق (أنا عملت مربى الكرز)
ط.ت:
- سخني الفرن على درجة 200.
- اخدمي البيض و السكر لاباتور ملييييح (لمدة 10د أو أكثر) حتى يتضاعف حجمو و يتكاثف و يصير لونو فاتح
- نضيف الفرينة لخليط البيض و السكر بالتدريج على ثلاث مرات بواسطة غربال مع التقليب من فوق إلى تحت بواسطة سباتولا أو ملعقة حشب بلا ما نكسرو قوام البيض.
- نصب الخليط في سنيوة مستطيلة أو مربعة عليها ورق الطبخ و نسوي السطح ثم ندخلها إلى الفرن لمدة 10-12 د
-نحطها فوق طرشونة مندية (ماشي مشمخة بزاف أي مرشوشة بالما)نخليها تبرد شوية ثم نشربها بالعصير بالبانسو.
ثم ندهن طبقة المعجون و نروليها ثم نغلفها بالطرشونة (كيما لابول تاع الكاشير) ندخلها الثلاجة 15 د نخرجها نرشها بالسكر الناعم المخلوط بالفانيليا و نقطعها. و نقدمها مع المشروبات أو في قهوة الصباح/ المساء بالصحة و الهناء.

ماتحرمونيش من أرائكم....