طلب من الأخت إلهام 07

[mayaaa71]

السلام عليكم

ما شاء الله والله يبارك على خدمتك مميزة جدا

ربي يحفظك لأهلك ويخليك.

كنت أختي وضعت رد ربما لم تنتبهي له أسألك فيه على قريوش الطاجين

عجبني بزاف الذي صنعتيه اي في الصورة

وكنت أعطيت الرابط للأخت الوهرانية

ما هي وصفتك أنت ؟

لقيت بزاف وصفات ليها الي فيها صفار البيض واللي فيها بيضة كاملة
ما عرفتش وينهي الصح

والحقيقة عجبتني خدمتك خارج شباب بزاف .

[أم ماجد]

ستدخل الهام وتعوانك ماتبخلش خلاص
ساليني انا رغم انها تدي كل شئ هههههههههههههههه ماخلاتلنا والو في الصحون

[mayaaa71]

شكرا أختي أم ماجد على الرد والإهتمام . ربي يحفظلك ماجد .

إن شاء الله تدخل وتجاوبني اليوم .

وهذا الرابط اللي فيه الصورة نتاع القريوشة . صورتها روعة خارجة هايييلة .

نتمنى تقوليلي وصفتك .وكيفاش حتى تخرج بهذا الشكل وتبان مقرمشة .....تشهي وتحمر الوجه.

[مليكة01]

إن شاء الله يجاوبوك الأخوات

فعلا رائعة

حتى أنا نجربها

[إلهام07]

أسمحيلي ماشفتش الموضوع نتاعك مانيش ندخل للمنتدى حتى قالولي الأخوات باللي كاينة وحدة تحوس عليا
حبيبتي الوصفة نتاعي هي
كغ فرينة
ثلاث ملاعق خل
زوج بيضات
قطعة زبدة فلوريال ذايبة وباردة أو اي مارغارين تحبي ( قطعة نتاع نص رطل تنقصي منها مقدار زوج صباع يعني تقريبا الربع )
قرصة ملح
وتبلي بماء الزهر حتى تتحصلي على عجينة تكون طرية ومتماسكة ( انا البيض نخفقو مع شوية ماء زهر قبل لا نحطو في العجين باش مايبقاش متكتل في العجين )
تعجنيها وتقسميها على ثماني كريات وتغطيها بكيس نيلو وتخليها تريح نص ساعة او ياعة
تحليها بالنشاء قرصات وتكون رقيقة وتحاولي الشكل يكون مستطيل باش مايجيش فيها الحواشي بزاف
قد ماتكون القرصة نتاعك عريضة يجيو فيها عدد لفات اكثر ويجي القريوش أبهى
تنظفي مليح الطاجين نتاع الحديد نتاعك وتتحطيه يسخن على الطابونة والنار تكون ذليلة خلااااااااااااااص
تحطي بالقرصة غير تنشف برك العجينة وهي بيضاء تقلبيها غير دقيقة تنشف برك وتنحيها ، تروليها على شكل حربوش وتدهني الحافة بالبيض وتلوحيها في كيس وتغلقي
وتكملي هكذا مع كل القرصات
تجبدي بالحربوش وتقصي بالاداة اللي نقطعو بيها المقروظ وتحاولي تميلي مليح كي تقصي وماتخشنيش بزاف خلي غير مقدار اصبع وقصي باش يجيك الشكل باهي
كي تقصيهم حليهم بسرعة وحطيهم في صينية وغطيهم مالازمش ينشف والا ماينتفخش في المقلاة
كي تخلصي دسر مقلاة عميقة فيها زيت غزير واقلي القريوش على نار متوسطة
وماتعسليهش غذا ماكيش رايحة تاكليه قريبا


اي سؤال انا في الخدمو واذا مارديتش معناها ماشفتش سؤالك
كي تحتاجيني تلقايني في موضوع واش طيبتي اليوم يوميا راني ثمة مع البنات

[mayaaa71]

ربي يعطيك ما تتمناي

ما تتصوريش فرحتي بردّك عليا .......يفرح بك النبي يا أختي .

بإذن الله نجربها وتخرج غي شوي كيما الي خدمتيها.......... ربي يحفظك و يعطيك الصحة .

[ام محمد ساجد]

السلام عليكم وجمعة مباركة للجميع يعطيك الصحة اختي الهام والله القريوش نتاعك عندي صورتوعندها شحال صراحة جاي روعة انا خدمتو بصح جاني صغيررر وحبيت نستفسر ما فهمتش منك هادي الجملة
(كي تقصيهم حليهم بسرعة )وربي يحفظ واسمحيلي بارك الله فييييييييييك اختي الكريمة

[yacef hayet]

Yatik essaha lahlouba dialna merci ala elmadjhoud dialak ki tkhadmih dirina les photos