القاولي حل و الا رح نهبل :(

[سمو آلأميره]

السلام عليكم جميعا

بدون ان اطيل و بدون مقدمات
راني نمر بفترة صعيبه بزاف و مالقيتلهاش مخرج حاسه روحي مخنوقة و دايما قلبي مزير عليا و يضيق فيا النفس
المهم مشكلتي كالآتي

كنت على علاقة دامت 7 سنوات مع شاب وليد حومتي ، الحق وليد فاميليا و راجل و خاطيه دعاوي الشر و فاميلتو يحبوني
لكن علاقتنا مرت بصعوبات بزاف و كل مره نخلو بعضنا و نرجعو ، حبينا بعضانا بزاف رغم كل شي
لكن مشكلته انه ما ينجمش يجي يخطبني حتى يتزوج خوه اللي كبير عليه ، عييت صابره عام يجيب عام كرهت الوضعيه هادي لانه طولت الحاله بزاف لقيت روحي نكبر مع العلم في عمري 27 سنه و هو كبير عليا بعام يعني 28
تقدملي مره شاب قبلت بيه و كانت هذي الضربه القاضية على حبيبي و يومها شفت شخص وحدوخر كان في قمة ضعفه و انهياره بعد فتره ما قدرتش نكمل مع خطيبي و فسخت معاه لاني ما قدرتش نحبه و قعد بالي دايما عند حبيبي
بعد ما فسخت رجعتلو ، الحق رجع معايا و كنا نورمال
و هنا اللي رجعت انا ماشي عادية كنت كل مره نحوس عالمشاكل معاه و ما عدتش نحمل نهدر معاه و اخر مره لقيت روحي نكلمه بطريقه غريبه اول مره في 7 سنين كلمته هكداك عايرته بمستواه و قتله انت ما تقدرش تدير دار و ما راكش قد الزواج وعلاش راك تضيعلي في حياتي و كلام اخر و الله ما شفيت عليه و شرطت عليه يديرلي داري وحدي رغم انه قدو قد روحه لكن هذي كلها كانت مجرد اسباب جاتني من اللي رح نزيد نحكيهولكم
و قطعت علاقتي بيه من وقتها و انا نتعدب لكن كنت كل مره نبعتلو ميساج فالتيليفون نسقسي عليه و كان يرد عليا
المشكله الاكبر انه انا نعاني من سحر لحد الآن و هذا اللي كان سبب عركتي الكبيره معاه رقيت شحال من مره و كل راقي يقولي نفس الكلام عندك سحر و تعطيل على الزواج و الخدمه لكن ولا واحد عالجني و ريحني من هاد الهم اللي راني فيه

بعد فتره دامت 4 اشهر ولا اكتر خلاص ما قدرتش نصبر عليه و ما قدرت نقبل حتى واحد من غيره و ما قدرت نحب حتى واحد، مع اني حاولت ننساه و حاولت نحب من جديد لكن ما قدرتش
ندمت على كل كلمة قلتهاله و عرفت بلي خسرت معاه بزاف لكن انا من تأثير السحر و من الضغط اللي عليا اني كملت دراستي و ما لقيتش خدمة ووو كنت نخرج كلش فيه
اتصلت بيه فالاول ماردش بعدها عاودلي و حكينا مدة ساعه عادي ضحك و قصره مع العلم انه قلبه بيض و كبير و بطبعه انسان متسامح، ما تتصوروش قداش فرحت يومها و قلت اخيرا رجعلي حبيبي و عمري ما رح نفرط فيه ولا نقيسو بكلمة و نصبر معاه عالحلوة و المرة

لكن بعدها تقلب حاله ما عادش يعيطلي و كي نكلمو يهدر معايا ببرووود و ما يردش على رسايلي قتله نتلاقاو و نفهمك كلش ، قالي كي يكون عندي الوقت لكن تجاهلني و ما عطانيش من وقته
حاولت نفهمه بليميساج لانه ما يردش على مكالماتي الا نادرا و تجاهلها تاني، كحال قلبو من جيهتي رغم اني متفهماته و عارفه اني خسرت معاه لكن اعتذرتله و قتله انه الشي اللي قلته ماكنتش واعيه بيه و الدليل اني ماشي متفكره الكلام اللي قلتهوله
اول مره يجفا عليا بهاد الطريقه ، رخصت روحي و بقيت نحوس عليه و نعيطلو و قلت معليش ما يهونش عليا و نرضى اني نرخص روحي على جاله لانه علاقاتنا اكبر من اني نذل روحي ليه و قلت معليش يرجعلي برك و نسيه فكل حاجه ماشي مليحه جوزناها، ماراهيش علاقة شهر ولا عام ولا عامين هادو سبع سنين ماشي حابتهم يضيعو ، قلت بالاك عندو وحده في حياته سقسيته قالي ما عنديش
كتبتلكم اليوم متمنية نلقا عندكم الحل لانه راني نجوز في ايام ما يعلم بيها غير ربي ، عايشه بتأنيب الضمير و الاشتياق ليه و نخمم فيه 24 ساعه و مالقيتش الحل معاه

اسمحولي طولت عليكم لكن رجائي منكم انكم تعطوني حل

سلام

[blue.sky]

اقتربي من الله وكثّري الاستغفار راح تبانلك أشياء أخرى

[الحلم الجميل]

السلام عليكم
يا اختي بصح هو طول عليك يعني سبع سنين بزاف
و لوكان خوه ما يتزوجش صافي تقعدي هاكا تستني فيه
نعطيك نصيحة خليك منه و ما تزيديش تعيطيلو علبالي راكي مهمومة و حزينة
بصح احفظي كرامتك و صوني نفسك ان جاء لخطبتك فشئ جميل و ان لم ياتي
خليك منه و الله سيبعث لكي احسن منه
اقتربي من الله استغفري و ابكي في سجودك و بعد فترة راح تنسيه و تعيشي حياتك
الله يفتح عليك و يصبرك

[نايفز55]

ابقي استنيي 28 من 30 .........35 ............98 ..........ططططط

اذا كان نوي يتزوجك كون خمم في هذا الشيئ من 20 سنة قبل موش يقعد يتمسخر

انسايهم وابدي حياتك مع لمستعد لزواج

ولي تحملي مسؤوليتك وابقي معاه حتي تولي عجوزة

ودليل موش محترمك وما يردش عليك وموش مقيمك 7 سنين وفي اخير يفرط فيك

موش راجل كيما راكي تتوقعي

[ام نسمة]

7 سنين انا تزوجت فيها وولدت زوج ولاد ربي يحفظهم راهم يقرو
واش نقلك بزاااااااف وزايد يتهرب منك راها باينة مالقري صعيبة لكن واش نقلك ديري حل اما تتصالحو وتتزوجو اما القطار فاتك راكي كبيرة وهو مازال صغير على الزاج
نعم ختي هاته هي الحقيقة هو يقدر يتزوج وحدة عندها 20 عام عادي لكن انت 27 سنة ؟؟؟؟؟؟؟؟؟؟؟؟؟؟؟؟ واش راح تستناي حتى ترجعي عجوزة ويفوتك وقت الانجاب وووو ؟ احسمي قرارك ماتلعبيش

[aymen01]

حاب نبكي بصح مقدرتش

راكي تهدري كانو الامر عادي في بلادي مسلسل تركي

و تحوسي السحر يروحلك و انت في علاقة غير شرعية

اه يا زمن رجعوني لبكري كخخخ

مادموزال غير اخطيك ما تزوجيش تظلمي راجل معاك متحبيهش

اقعدي استني صاحبك كاشما يربح في الطونبولا كخخخ

[mohaa47]

لا حول و قوة إلا بالله .............الله يهديك ...............

[safya]

nsa9sik:anti tfar9i bin la7lal w la7ram!!raki tjahri balma3siya ta3k kali 7aja 3adiya!!toridina nasi7a tobi ila allah. W 3lah tar9i,bah traj3i lsa7bak?rabi yahdik okhti anti mabik la si7r la jan bik nafsak l'amara bi soe.

[ABDOU ELE]

تتكلمين عن 7 سنين علاقة غير شرعية والامر عادي بالنسبة لك !!! اختي توبي الى الله من هذه المعصية.........اما موضوع الزواج فهذا الرجل ليس لديه نية الحلال يعني يجوز الوقت بيك........وانت تعلمين انه يضيع وقتك وحياتك لكنك تتبعين قلبك .....بئس القلب الذي يهوي بصاحبه الى الهاوية .......اقبلي باول خاطب يطرق بابك.........قبل ان ياتيك وقت تندمين فيه على ضياع الفرص
ربي يهديك.

[ام وعد]

الله يلطف فينا
بنيتي استهدي بالله وانعلي الشيطان وخليك من كلام الحب والغرام وما نعرف واش وقصة 7 سنين
يا بنتي لو كان صح يحبك راه عمل زردة *عرس متواضع وسترك وراكي ان شاء الله مع وليدك ولا بتك يقرا سنة اولى
افطني مع روحك ومتنسايشفترة الخصوبة تاعك وعفك من هذي الامور المحرمة شرعا يا بنتي اذا جاك من ترضاي دينه وخلقه فتزوجيه ورحي استغفري
واش حبيبي لو تعرفي الزواج واش هو والله غير مسوولية كبيرة ماشي فستان ابيض وووووووالله غير تربية احترام ومشاكل
حسبالك الزواج غير امور بسيطة
ربي يهنيك يا بنتي اعتبريني كيما يماك واستغفري وتوبى من المعصية ومتزعفييش مني راني نحبلك الخير كيما بنتي
في امان الله

[hamdanhamdod]

ضيعتي وقتك ودخلتي في دوامة الولف ما يحس بجمرة غير لي كواتو ننصحك نسايه وكتري من صيام وصلاة

[manita]

ربي يهديك استغفري وارجعي لربي واش درتي يجي النهار الى تندمي احكمي في ربي واستغفري يزي بلا تمسخير ربي يهديك

[karim.dz]

7 سنين بزاف بالنسبة لعلاقة تسبق الزواج ....
انا نقولهالك الاخت الفاضلة اذا هو حشم يقولهالك
باينة بلي ماهوش حاب يتزوجك وعذر حتى يتزوج
خوه الكبير ماهوش عذر ضرك ولات لي وجد روحو يتزوج
اخطيك منو واذا حاب يتزوجك راح يحوس عليك ....

[RAZANE23]

يا اختي اصبري و اصبري و اصبري كرامتك قبل كل شئ الله اعلم هذا السيد برد من جيهتك مش على خاطر قستيه بالكلام لا... على خاطر العلاقة بينكم طولت بزاف... وممكن تكوني خسرتي فيها بعض الاشياء ( ......... ) شوفي ما يصلح بيك اختي و ما تبقايش تبكي على الاطلال .......... راح يجي يوم و تعرفي بلي كنتي ضيعي في وقتك........ الله يوفقك

[naamane3]

اول حاجة علابالك باللي هذه العلاقة غير شرعية
ولكن استهنتي بها وواصلت في علاقتك
ثانيا راكي مع وليد حومتك يعني الناس كامل تعرفكم
لو يجي واحد يخطب ويسقسي فالحومة يفضحوك
ثالثا العلاقة دامت 7 سنوات لو كان تزوجتو فالعام الاول راكم عندكم 3 اولاد
رابعا وليد الفاميلية والراجل ما يلعبش ببنات الناس ويعلقهم 7سنين
بركاي ما تكذبي على روحك
يا بنتي اقطعي هاذ العلاقة وتوبي الى ربك واستغفريه
وربي يجيبلك الخير اذا كانت توبتك صادقة
والله المستعان