طردتني عجوزتي

[مشكلتي]

السلام عليكم انا لست صاحبة الموضوع انما اردت كتابة الموضوع لجارة لنا
انا امراة متزوجة منذ 10 سنوات زوجي لا يملك مسكن قبلت بيه وقبل السكن مع عائلته ووالديه ظنا مني انني سأكون رعاية وحفظ عائلة اعتبرها عائلتي لكن بعد سنوات الجمر ادركت انني كنت غالطة اتمنى العيش في بيت فوضوي قربي ومنعيشش معاهم زوجات سلافي عايشين في زوج طيجان واتا في الطاج الاخير ماهوش مفيني لكن الحمد لله وفي الطابق السفلي دار عجوزتي
المشكلة عجوزتي بعد تحملي الطويل للسانها والله كلامها كالسم من نهار جيت مش عاجبتها زوجي يحبني وهي لا نطيحلها في الما متشربوش المشكلة انا لا اعمل ونسا سلافي يعملوا يعني انا ديما معاها
تدخل لطاجي دير واش تحب انا ساكتة لسبب انه بالرغم انني ساكنة نتم لكن يبقى المنزل دارها كيما تقول هيا وهي عندها الحق دارها ودار شيخي وانا سومتي سومة الرخيسة في هاديك الدار احس نفسي ارخس ثمنا من كلب الحديقة بل كرهت الزواج وندمت حاجة وحدة مصبرتني زوجي واولادي رغم انني نقول خلاص منزيدش نوليلوا كرهت منهم جميعا
المشكلة وباختصار نعم عجوزتي طردتني لانني مؤخرا اعاني من فراغ بطلب من زوجي سجلت في مدرسة قرآنية نتعلم في الاحكام ومشاركة في جمعية خيرية على الاكثر نخرج مرتين او ثلاث في الاسبوع وولدي الصغير معايا
جن جنونها لما سمعت وهي اصلا تعاملني ديما على انني طفيلية في دارها وكل نقاش يصرا تقولي ولزوجي اخرجو من داري مرتك مش قابلة بيها مرتك مخيرتهاش انا الخ
في يوم جيت فيه من المدرسة بعد ما هددتني اني نحبس القراية لاقاتني في الباب من كلمة لكلمة رفعت يدها عليا وضربتني وجات بنتها ودفعتني للخارج في الزنقة بين الديار بل وصل الحد انهم نحاولي الخيمار وكل الناس شافت بعينها فضحوني مقدرتش نهز راسي بين الناس بهدلوني حقروني هربت من الدار اى دار خالي ولا اريد العودة وزوجي ميقدرش يدبر سكن في العاجل دمرولي عايلتي شتتوني
بالله علييكم انا منهارة اريد الموت وكرهت الدنيا بما فيها

[*ام عبد الكريم*]

لا حول ولا قوة الا بالله حسبنا الله و نعم الوكيل يا اختي قلبي معك و لا احسدك على الموقف ...لازم تقوي نفسك و لا تنهاري و اتكلي على الله و حاليا يمكن لزوجك الكراء و لو f2 المهم لا تياسو ..و صدقيني لست الوحيدة الي صرى معها هكذا و هي من الامور الخاطئة في مجتمعنا الرجل و لو متزوج يبقى في سكن الولدين و لا يتحرك للبحث عن حلول ..و السكن مع الولدين يجلب مشاكل كثيرة و عويصة ربي يسهلك امورك اختي عليك بالدعاء رحمة الله واسعة و لكن ما قلتيناش رائ زوجك فيما فعلته امه؟ انه ظلم و دعوة المظلوم مجابة

[○•ميسون•○]

لو كان ضربتيها كان احسن حتى انتي مراة

ربي يفرج همك هاذا ما راح نقولك

[نجوى لحلوة]

ربي يفك احوالك ولي يحكم في ربي ما يخيبش

[السي ياسين]

ادعي ربي يفرج على زوجك و يكري أو يشري سكن

[فحلية]

لا حول ولا قوة إلا بالله العلي العظيم
اللهم فرج كرتها واجمع بينها وبين زوجها كما جمعت بين يوسف ويعقوب

[سمو امير الكلمات]

يا أختاه نقولك حاجة البنت نهار لي تخرج من دار بوها شوفي واش تقولها يماها
يابنتي زواج زوجتك بصح الهناء مانظمنش البنتي

اختاه البنت لي تتزوج بدل ماتجهز روحها وتخسر ذوك الفلوس كامل على جال حوايج قادرة تلبسهم وقادرة لا لا
تجهز روحها بالصبر ثم الصبر ثم الصبر واذا ماقدرتيش تصبري على أذى نتاعهم معنتها استسلمتيلهم وهذا أكبر خطأ انت وكلي ربي عليهم وبالعكس اذا هوما يسعاو باه يخربولك دارك انت ابنيها
على حساب كلامك افهمت ان زوجك راه واقف معاك هذا هو الصح انت ماتظلميهومش لأنه ربي حرم الظلم على نفسه وربي يديلك حقك منهم
امسكي في راجلك وكبري في عينو لأنك قدرتي تصبر معاه على أذى أمو على حساب كلامك هو ثاني سحتوه
اختي مكانش دار مافيهاش مشاكل واذا نحلو المشاكل بالإنفصال مراهش حل أبغض الحلال عند الله طلاق
وكنصيحة مني واش تقولك دري ماتخليهاش تحكم عليك حاجة هكدا تموت بالغزال
فكري مليون مرة وعدي للعشرة قبل ماتأخذي قرار تندمين بعده
ربي يحفظ عائلتك ويقوي المحبة بيناتكم ويهدي امو لي طريق صواب وربي يفرج عليكم بسكن تتهاني من العجوزة ولوسة
امين يارب العالمين

[حرة في بلادي]

ألله يهديها ما لقيت ما نقول
كل واحدة وزهرها في الدنيا الله غالب طحتي طيحة شينة كيما يقولو مكتوبك تفوتيه
حتى واذا بغيتي بنت حلااااااال
الصبر والصبر والصبر وكثرة الدعاء وربي يفرج عليك ان شاء الله

[*نسيبة*]

اصبري يااختي واحتسبي الاجر عند الله

ربي يفرجعليك ويلقى زوجك بيت يضمكم قريبا باذن الله

[الحلم الجميل]

لا حوله و لا قوة الا بالله
حسبي الله و نعم الوكيل فيهم
لا املك لكي اختي الا الدعاء عسى الله يفرج همك عااااااااااااجلا غير اجلا
قولي حسبي الله و نعم الوكيل لا تفارق لسانك
يوما ما ستفرحين باذن الله .......الصبر الصبر الصبر

[ايمان ألماس]

اختاه احزنني ما سمعته عنك اليوم وربي يكون معاك انا اترجاك الا تتركي اولادك ولا زوجك ولا تفكري بالطلاق ارجوك انا اعرف معنى تشتت العايلة والله اثاره يبقى طوييييييييييييييييييييييييييلا .ادعي ربي يفرج عليك واحتسبي وكل نفس ذائقة الموت واصبري مع راجلك بزاف ...وصدقيني راح يفتخر بيك طول عمرو واليك هذا الدعاء قوليه كي تبدا تعس فيك /ياحي ياقيوم برحمتك استغيث اصلح لي شاني كله ولا تكلني الى نفسي طرفة عين/ واقراي بسم الله الرحمان الرحيم /وجعلنا من بين ايديهم سدا ومن خلفهم سدا فاغشيناهم فهم لا يبصرون/ صدق الله العظيم وكرريه كثيرا ورجعيلي الخبر الحلو

[بنت غليزان]

ربي يهديها و يصبرك و يكون معاك
لاحول و لاقوة الا بالله العلي العظيم

[ٱولادي ٱحبابي]

اصبري اختي انا ثاني كيفك حاوزتني عجزوتي منذ 7 سنوات و انا حامل و قاتلي نطلقك و ربي يطيحلك البيبي و ماتفرحيش بيه و كلمات بزاف يجرحو و خرجتني من دارها وبعد 3 اشهر رجعت ووضعت حملي ذكر ماشاء الله و صبرت و اليوم بعد 9 سنوات زواج فرج ربي و قريب نرحل داري بصح انا صبرت ووكلت ربي وجاء القرج ولو بعد سنوات والحمد لله لهذا نقولك اختي ارجعي دارك و ماتيتميش ولادك و ربي يصلح نشالله

[نوارة البلاد]

يا اختي حالتي و حالتك كيف كيف تقريبا انا متزوجة عندي عام وشهر برك و راهي عجوزتي مشربتلي الخل ما فهمتش وعلاش المهم انها في الاخير طردتني انا و زوجي من البيت و بسبب تتتتتتاااافه جدا و هذا كله كي ما خلتلهاش سبة عليا يعني ما حكمت عليا والو انا وكلت وعليها ربي انا محرمة عليا كلش و هي محلاة لمرة سلفي الي صرا فيا ما يعلم بيه غير ربي او ضرك راهي تقول بلى بني مسكين ومرتو الي حرشاتو و مازلت موكلة عليها ربي و صابرة خصوصا اني قريب نزيد و يجيني طفل وكلي ربي و اصبري

[sorour%]

لا حول ولا قوة الا بالله ,اصبري اختي الكريمة و ما تخليش لعجوزتك الفرصة انها تهدملك دارك باه تجيب وحدة اخرى لولدها من اختيارها هي و ما تستسلميش فالحياة ملئ بالصعاب لازم تحاربي على خاطر ولادك و زوجك و البيوت مليانة بمشاكل مثل مشكلتك و اكثر و جاء النهار الي فرج ربي عليهم , ادعي ربي يفرج همك و وكلي عليها ربي , نقول لكل ظالم متجبر :
لا تظلمن اذا ما كنت مقتدرا فالظلم آخره يأتيك بالندم نامت عيناك و المظلوم منتبه يدعو عليك و عين الله لا تنم