بيتزا ديريها و عينيك مغمضين

kakkou · 2014-09-27, 10:57

السلام عليكم
هاذي الوصفة تاعي تع البيتزا ديريها و ما تندميش
راهي خفيفة و بنينة تسخف خسارة ما عنديش التصاور
المقادير(2 خبزات)
500غ فرينة
2 مغارف تع ماكلة سكر
3 مغارف تع ماكلة حليب غبرة (لازم غبرة)
1 بيض
كاس تاي تع الزيت
ملح
1 مغرف تع ماكلة خميرة الكسرة
ماء دافيء
الصلصة
الطماطم+بصلة (الحجم على حساب كمية الطماطم) ضيفيلهم شويييييييييية سكر باه تنحي الحموضة يتقلاو في شوية زيت (الطماطم ما لازمش تنشف بزاف)
طفي النار و زيديلها شوية ثوم و دبشة+ملح+ فلفل اكحل (التوابل كيما حبيتي)
التحضير
خلطي كلش(فرينة+ملح+ سكر+حليب غبرة+خميرة) ومبعد زيدي الزيت والعضمة دخليهم مليح و مبعد لمي بالماء الدافئ حتى تتحصلي على عجينة طرية شوية
أعجنيها غير شوية و خليها تطلع
مبعد فشيها و اقسميها على زوج و زيدي خليها ترتاح شوية
حليها وديريها في بلاطو مدهون بالزيت مرشوش بالفارينة
حطي فقط الصلصة تع الطماطم و زيدي حبيبات زيتون اسود يمدلها arrière gout هايل
و مبعد انتي و طيابك لازم اطيب على نار قاوية شوية
كي تحمار من تحت انا نخرجها ونزيدلها التونة و نشقف فوقها عضمة (مخلطة) و منبعد نرابي الفرماج
رجعيها للفرن شعليه من فوق قيس ما تنشف العضمة و نحيها.

و شهية طيبة