عذاب

[مشكلتي]

حياتي جحيم منذ خطبتي

السبب هو امي تشتم وتسب في خطيبي لا ادري لماذا ؟ اي سبب يحدث تلصقه به نكون قلقانة تقولي سببتو هو ؟ وهو خاطيه والحمد لله بينا الاحترام والحدود منتعداوهاش في الكلام ابدا هو قريب لزميل كان يدرس معي في الجامعة صارحني انني اعجبه قتله اذا كان صحيح ارواح للدار وفعلا كان يخدم فقط في الخاص جا وتكلم عليا وصبرت عليه عام وجا من بعدها خطبني ودرنا الفاتحة ودركا راهو العام الجاي العرس
المشكلة جاتها وحدة زعما تقرا في جمعية دينية قاتلها نسابكم راجل عجوزة بنتك تزوج عليها وخلى مرتوا الخ الخ انا الشيء اللي حيرني تجي امي وتقولي حاجة كيما هكذا ما الفائدة مدام قاتلي هذا شيء ميأثرش وتقولي ردي بالك وخبي نقودك ومديريش الامان وعندك يكلحك الخ
راني في حالة منهارة هاذي لحكاية صرات من قبل وكنت قد كتبت موضوع لكن اليوم زادت ثارت الموضوع احس انه والديا حابين يتهنواه مني مفياش الفايدة زدت عليهم واقيلا باكلي وشربي لانه في مرة من المرات امي كي قلقوها خواتاتي الكبار قاتلهم تسلكوا حق ماكلتكم وزيديوا ديروا الحس نزعكم الخ من المعايرة مع العلم انها كرهتلهم حياتكم كي كانوا صغار في الرجال بسبب والدي ومن بعد ديروا السلاح الخدمة ومن بعد الطوموبيل الخ ومن بعد كي لقاو روحهم رفضوا العديد وبدا القطار يففوتهم اصبحت تعايرهم على اي صغيرة مهما صرا مشكل تعايرهم البايرات اللي حصلوا في راسي روحو اكريو دار الخ وانا العكس في سن 21 تجيبلي في العرسان ودركا انا 25 كي تخطبت ولات تكرهلي في معيشتي غير نقولها واش دار مسكين مادار والو تولي تسب فيا هذا راهو ساحرلك هوما ماشرطوا عليهم والو بصح انا تمرضني واش جابولك واشي هذا شرط 15 ميدير والو جابولي في العياد الذهب واش هذا معجبهاش قلتلها هل يوجد سبب عارفته عليه قوليلي قتلي معلابالي بواله هذا علاش متحبيش الهدرة عليه قلتلها راكي منين ننطق اسمه تولي تسبي فيه
لا ادري اين المفر كرهت من حياتي كرهت الشك دخلني التوسويس قاتلي هذا يخرج لباباه يتزوج عليك ويطيشك جابت هدرة تاع وحدة متعرف عليها والو مام اسمها او لقبها متعرفوض تدعي انها كانت جارتهم
انا نفكر اني نصارح خطيبي ونقوله باللي كاينة وحدة تهدر عليكم بالعاطل باش يقولي الحقيقة لاني رح نهبل منها هبلتني انا نتحمل السب والشتم بصح هي في وجوهم ملاك علاش دير في بنتها هكدا علاش انا عدوتها
تضحكلي وتقولي ديري حسابك قادرة يدير كي باباه النار شعلت في قلبي تسما تتفرجي على بنتك وراكي تشوفي في مصيرها وتضحكي عليها؟يا ربي واش هذا
اخباري تحكيهم للناس الناس كامل علابالهم شكون خطبني علابالهم حنحل حانوت علابالهم كي تكلموا عليا وتجي تقولي انتي تحكي لخطيبك كل شيء انا خطيبي مقتلوش باللي نفتح محل في دارنا اللي رح تتبنى للحلويات قاتلي اكي قلتيله وهو قالي قاتلي الوالدة تاعك لانها في مرة راحت باركتلهم على مولودة سلفتي
قلبي رح يتقسم رح نتطفى رح نموت واش صاري فيا درت حلويات هي تاني دارت وعادت تغير تقولي انت متعرفيش ديري لانه ابي يمدح فيا علاه يا ربي كاين فرق بيني وبينها علاه الدير هكدا اختي حابة تبيع سبارتها سيارة قديمة هدرت بتمصخيرة قلت حابة نشريها انا دارت باختي قاتلها هاذي واحد ميشريها غير انا وباباك وانا كون نحب ندير البارمي ندير
ابسط شيء الشورة اللي نوجد فيها وحدي نطفس نشوف في المنتدى كيفاه يديروا البنات مخليتني وحدي متحبش تخرج معايا اللي يشوف يقول خطيبي زير نساء او سكير وهو احسن ناس العيب ميخرج من فمه مصلي متعلم وخدام صح على قد حاله لكني وافقت عليه لانه رجل كي عجبته جا وطرق الباب وصارحتني انه لا يستطيع ولازم نصبر عليه وراني في العامين وانا صابرة وبلا مزيتي وانا عند وعدي ومال الدنيا ميبدلنيش عليه وجدت معاه الراحة النفسية اكثر من اهلي اللي كل دقيقة مشكلة ماش حاملتوا في وجهوا تسلم وتسقسي عليه ومن وراه تسب وتشتم كون نقول رايي تقولي هو اللي قالك هو يتحكم فيك حق الله تعالى كون حسيت وشفت دقيقة انه متحكم ومتسلط لما قبلت به لاني عشت في مرار من العائلة هاذي مع ابي المتسلط
تقولولي راهي امك علابالي بصح ماش من حقها تعذبني هكذا راني نبكي كل يوم على واش صاريلي حتى انني الشيطان يوسوسلي بفسخ كل شيء
واش ندير نصارح خطيبي ؟ باش نعرف الحقيقة ونبرد ؟ ونقوله باللي جارة قديمة لكم قالت كذا وكذا ؟ ام نروح ونتكلم معاها ونكشف اذا تكذب ام لا؟ لانه قلتلها مادام قاتلك هكذاك زيدوا سقسيو
افهموني ربي يعيشكم راني في نار دركا الشك سكني كيما قاتلي يتزوج عليك وانا مازلت حتى مدخلتش كيفاش رح نعيش وانا في كل دقيقة نستنى فيه يتزوج عليا ويطيشني

[doba]

ربي معاك وربي يهنيك في أقرب الأجال

[nouna l maghbouna]

ربي يهدي امك
ماتقولي لخطيبك ما والو
هاد لحكاية تع الجارة امك اللي اخترعتها

كي تكون تهدر عليه سمطيها
ماتقلقيش روحك

ربي معاك

[haytoo82]

ماماك نظن تعقدت من زواج ابيك التاني وهي اخطات معاك ومع اخواتك ونزيدك حاجة الذرية كاينة اللي تعزها الوالدين وكاينة اللي شوي من ربي هذي انت قلتيلها زيدو سقسوماعندك ماتزيدي وهو يبان ناس ملاح ما تقوليلوش وعام رايح تتاكدي الا كان يستاهل ولا والو تكملي معاهاما امك ما تناقشيهاش كامل باه ماتزيدش تقلكولا وصيلها خالتك تهدرلها وتفهمها

[souma.sousou]

اول حاجة هي الاستخارة ...استخيري وربي يجيب لخير.......ومدخليش في راسك الشك راه يدمر الحياة راجلك ماشي شرط يعاود زواج كيما باباه............وراكي تقولي معندهش نتي وراه حاصل باش يجيبك كيفاه يزيد على روحه........توكلي على ربي ومادخليش هدرت الناس في راسك........ماماك الله يهديها ماتعاسريهاش فالهدرة ....خدمي عقلك .اذا متاكدة من اخلاق زوجك نحي الخوف من قلبك وفرحي متبدايهاش بالنكد والغيرة راني وصيتك........الله يفرحك ويهنيك .في انتضار الاخبار السارة منك.في امان الله

[بيلسان الجنان]

السلام عليكم
ان شاء الله خير خيتي
بقالك عام في داركم فوتيه كيما كان الحال وخلاص نهار تروحي تحسي روحك ماعشتيش فيها

ماتصارحي خطيبك ما تكسريلو راسو لا راسك لا تفسخي الخطبة وحتى اذا باباه تزوج على يماه هو وش ذنبو و وش علاقتو(يعني اذا باباه اعاد الزواج هو ايضا يعيد ازواج !! بعني هنا انت ايضا رايحة تعاملي بنتك كيما تعامل فيك يماك؟؟ !! )نحي عليك هذه الوساوس

والدتك حتى لو كانت متسلطة لازم تحترميها ماترديلهاش الهدرة و ما تعيطيش وكي يجي عرسك ماشي رايحة تخليك وحدك ونهار تروحي منك لزوجك مايتدخل بيناتكم حتى واحد

ربي يسهل لك و يفرج كربك اخيتي

[om chiraz]

اختي يماك شوية نننن
المهم مالفري تو يماك و شدي في خطيبك و قوليلها ايه برك و هاديك الجارة تاع البوليتيك قولها و اوبعد و كي تزوج باباه على يماه سبا سافودير وليدو كيما هو و حطيءة رذيلة كبيرة من الكباءر ربي حللو انت جاية تهدري فيه نامبورت كوا شدي في راجلك و سايسي ختى تحرجي من هاديك الدار تتهناي

[naamane3]

اخبري امك انه من الاولى لها ان تدعي لكن لا تسبكن
وانها لو بقيت على هذه الحاله فلن يتغير الوضع
وانها تبقي في المشاكل الى ان تموت
مروها بالتوبة والعودة الى الله
وان شاء الله يتحسن حالكن جميعا

[الفاتحة]

سامحيني نقولك حاجة أنت بنت ضعيفة الشخصية والخطأ ليس منك بل بسبب ظروف التربية الغير سوية والظغوطات التي مارستها ومازالت تمارسها والدتك سامحها الله ، حتى والدتك ليست شخص سوي فهي أكيد تعاني اضطرابات في شخصيتها حتى تعامل فلذات اكبادها مثل هذه المعاملة وانت أدرى بما واجهته والدتك حتى أصبحت تمارس كل انواع التسلط على العائلة

أختي حل مشكلتك بيدك انت وفقط ، قوي شخصيتك ، ولن يكون هذا إلا بتقوية علاقتك بربك ، اكثري الدعاء ، الاستغفار، النوافل، قراءة القرآن ، الرقية، صدقيني ستشعرين يالراحة والطمأنينة، وهكذا لن تستطيع والدتك التأثير فيك بزرع الشكوك والوساوس التي ستفتك بعلاقتك الطيبة ، ربي يجمع بينك وبين زوجك عاجلا غير آجل ويرزق بنات المسلمين الازواج الصالحة.

[ABDOU ELE]

ســــــــــــــــلام
زواج اب خطيبك للمرة الثانية لايعني بتاتا ان الابن يقلده لان الاب من جبل والابن من جيل اخر.....بالنسبة للام تحملي حت ى تتزوجي وتتهناي....ابعدي عنك الوسواس وكلام الام انزعيه من راسك لانك لاتريدين اعادة خطا اخواتك لما سمعن لامهن فكل مسؤول عن نفسه .....لاتكلمي خطيبك باي شيئ لان كل ذلك مجرد اشعات و وساوس .....لاتنسي ان استخيري وادعي الله ييسر امورك.

[لمعة السيف]

وعليكم السلام
اختي انت ناضجة وكبيرة ومقدمة على زواج ولا يغرنك حب الزوج ولا الزواج لان هذه مرحلة فيها تعارف فقط لكن العشرة شئ آخر أي
ربما تجدين زوجك ايضا يعاملك كما والدتك او اهله .. ماذا تعرفين هل تصبرين ام تظلين تتشتكي هكذا ..يا اختي هذه والدتك مهما قالت ..مهما فعلت
لا تردي عليها ولا تغضبيها ولا تطيعها في منكر واطلبي لها الهداية ..هكذا احوال الامهات الجاهلات عفوا من هذا اللفظ اي كان يغير رأيهن
طبعهن الطمع وعدم الرضى .ومشاكل ازواجهن يفرغن غضبهن اتجاه الابناء..للاسف ما تعانيه ربما حسرة وغبن في زواج الام تريد ان تفرغه في البنت وهذا حال الكثير من الامهات نجدها في المجتمع هي نوع من الغيرة الام على ابنتها ..لكن هذا ليس انها تكره ابنتها او ترضى لها الشر لا يغرنك كلام والدتك .هي سلاطة االلسان والطبع الحاد والقاسي ..المفروض انك تعودت عنه بتعاملك وبرك ومرورك عن الكلام الجارح
واخلاقك يلين الام ولو بعد حين مازال امامك عام اصبري واحتسبي لله واطلبي الهداية لوالدتك ولا تهتمي لاي شئ تقوله مهما كان قاسيا
صمي آذانك وكأنك لم تسمعيها ..سيأتي يوم وتحترمك وتوقرك وتفتخر بك عندما تتزوجين وتسعدين وتبتعدين ..الكثيرات من الامهات
القاسيات الطبع كن هكذا ..لا تكبري الموضوع وكل المشادات والامور التي ذكرتها توجد في اي بيت تقريبا لا يوجد احدا مثاليا وكل وطباعه ..والذكي يعرف كيف يتجاوز كل هذا لا تفسدي عليك حياتك اهتمي بزواجك وحضري له جيداولا تملئي رأسك باي شئ ..فكري بحياتك الجديدة
وكيف تسعدي زوجك وتكوني عائلة وبيت ولا تقلدي والدتك في حياتك واسرتك مستقبلا ...واصبري لانك عشت منذ الصغر بين اهلك وتحملت وصبرت وبعدما تزوجت اصبحت لا تطيقي هذا فالتكوني واقعية ووواعية هم اهلك مهما فعلوا وانت ستذهبين لرجل غريب لم تعاشريه بعد فلا تتنكري لاسرتك مهما قست عليك ....وفقك الله

[اناناسة]

السلام عليكم، اختي انا لوكان جيت في بلاستك امي ماناقشهاش تماماً و اذا تطلب الامر ان أبدل المكان فسأفعل قولي لها انا قائمه لأني لا اريد ان تتاذى اي منا كلامك عنه يجرحني و ان كنت تكنين لي بعض المحبه لا تذكريه لي أبدا لا بخير و لا بسوء . لا تهجيرها او تقابليها بوجه سيء او منزعج بل بالعكس قابليها بالكلمة الحلوة و الوجه البشوش ( رغم الألم) لان هذا هو واجبك تجاهها ، أما خطيبك فلا تقولي له اي شيء و اصبري و احتسبي لله الى ان يفرج الله بالزواج منه . أما قضيه احتمالية زواجه باخرى لا تشغيل نفسك بالتفكير في ذلك بل قومي بتجهيز نفسك نفسيا لان تكوني نعم الزوجه له و الباقي صدقيني على الله ثقي بالله و سوف ترين العجب . الله يصلح حال والدتك غضتيني والله

[hodahodahoda]

عليك ان تفتحي عينيك و تلاي لماذا امك تشنم خطيبك
لعل هناك سبب لا تريدين رؤيته او الاقتناع به
اذا كان لا يوجد اي سبب و كان حطيبك طيب جدا
سارعي في اجراءات العرس و انتهي من هذه المشكلة

[AMINA.Z]

فرغي قلبك مع خطيبك

و ان شاء الله هو يبردلك النار اللي شاعلة فيك

اما الوالدة ربي يهديها