غراتان من مطبخ رحيق النحل و تكوني اختا للشيطان

[رحيق النحل]

السلام عليكم اخواتي واش راكم ان شاء الله تكونو كامل بخير
بما ان الجميع يعلم ان التبذير حرام اليوم جيتلكم غراتان صحي و شهي بالخضراوات. كنت حضرت بالامس مرق جلبانة مع بطاطا و جزر و قعدلي منو و علابالي لي ماش راح يتكل و با ما نرميهش قررت نعمل منو غراتان شهي لاضرب عصفورين بحجر واحد منو تكون عندي طبخة جديدة اكلت حتى اخر فتفوتة هههه و منو ما نكونش اختا للشيطان بالتبذير و رمي نعمة ربي. ما نكثرش من التفلسيف و مباشرة الى الوصفة
اولا قليت 3 حبات بطاطا

ثم جبت بلاطو بيركس و حطيت طبقة من دوائر البطاطا المقلية ثم طبقة من الجلبانة و خضراواتها بعد ان صفيتها من المرق

من جهة اخري قليت شوية كبدة مع شوية ثوم مبشور و ملح و فلفل اسود و حطيتها فوق الخضراوات و زدت قطعت فوقها 4 حبات فرماج

في اناء كسرت 3 حبات بيض +2 ملاعق اكل مملوؤة معدنوس مقطع رقيق+ نصف حبة جومبو بقر و افرغت نصف الكمية فوق الكبدة

ثم غطيت الكبدة بما تبقى من دوائر البطاطا المقلية و افرغت ما تبقى من خليط البيض و المعدنوس ثم مباشرة الى الفرن كنت سخنتو من قبل .

و هده صورة مقربة باه نسخفكم ههههه

و شهية طيبة مع دعوة خيرو رد حلو بحلاوتكم .