مطرح تاع الصوف

[نيفرتيتي.]

اخواتي السلام عليكن
عندي مطرح تاع صوف ودارلي الغريشة ماعلاباليش في المناطق الاخرى واش يسموها
وانا وحدي وماكانش معايا واحد كبير ينعتلي كيفاه نحل المطرح ونفرز ولاخر نغسله
ممكن انكم دلوني
قالولي خلي الصوف يطيب في الماء بصح ماعرفتش كيفاه
نجبد من المطرح طول ونحط في الماء يغلي ولا لازم نحي اللي فاسد اي اللي فيه الغريشة
ربي يجازيكم نشاله عانوني بنصائحكم كي نعرف زي ماه يجيني الغسيل ساهل
وشكرا

[نيفرتيتي.]

علاه ماكاين حتى رد راني في ازمة ماتبخلوش عليا على بالي بلي راتكم حراير

[ahlam2060]

السلام عليكم

اختي ام دودة حسب ما نعرف لازم تحلي المطرح وتعاودي تغسلي الصوف تغطسيها في ماء وصابون مغلي خليهم يترنخو واغسلي مليح
لمطارح الصوف لازم تكون صوفهم نقية مليح باش ما تديرش الغريشة ولازم مرةعلى مرة تخرجيهم للهواء والشمس وتقلبيهم يتشمسو على الجهة الاخرى وكي تقعدو عليهم لازم مرة تقعدي على جهة وبعد مدة تزيدي تقلبي على الجهة الاخرى وتقعدي عليها
ثاني نزيدك حاجة كي تشيح الصوف تاعك كي تعاودي تحشي مطارحك حطي معاهم صابون ازيس او تاست المعطر وكثري ثاني الخزامة تطرد الغريشة هذ وش نعرف نتمنى نكون افدتك

[نيفرتيتي.]

المشاركة الأصلية كتبت بواسطة ahlam2060

السلام عليكم

اختي ام دودة حسب ما نعرف لازم تحلي المطرح وتعاودي تغسلي الصوف تغطسيها في ماء وصابون مغلي خليهم يترنخو واغسلي مليح
لمطارح الصوف لازم تكون صوفهم نقية مليح باش ما تديرش الغريشة ولازم مرةعلى مرة تخرجيهم للهواء والشمس وتقلبيهم يتشمسو على الجهة الاخرى وكي تقعدو عليهم لازم مرة تقعدي على جهة وبعد مدة تزيدي تقلبي على الجهة الاخرى وتقعدي عليها
ثاني نزيدك حاجة كي تشيح الصوف تاعك كي تعاودي تحشي مطارحك حطي معاهم صابون ازيس او تاست المعطر وكثري ثاني الخزامة تطرد الغريشة هذ وش نعرف نتمنى نكون افدتك

مشكورة اختي انا ماعرفتش نفرز الصوف من الغريشة ولا نحطهم كامل في الماء مغلي بعد الغريشم تموت ولا كيفاه
وانا مطارحي ماكانوش عندي كي رحلت خليتهم عند عجوزتي وكي جبتهم لقيتهم غرشو

[ام ريتاج لينا]

اااااااااااه هدا مشكل..الظاهر انك تسكني في منطقه ساحليه و لا رطبه...
انا سمعت مره موضفه معايا قالت لي عجوزتها تعمر لابينوار بالماء الساخن و تحط معاه 02 كيلو ملح و تغطس فيهم اللحاف و تخليه 24 ساعه..و من بعد تقطرو و تنشرو كيما راه يعني ما تشلوش من الملح تخليه بالماء تاع الملح

هادي ساهله جريبها....ازربي لاخطرش هد الحشره سريعة التكاتر...تمشي لك في الفراش الصحيح

[ام ريتاج لينا]

و ايلا حابه تغسلي الصوف ...لازم تغسليها كااااااااامل
انا شفت ماما كي تغسل الصوف العاديه..تجيب القدر الكبير تاع الاعراس...و تحطو فوق الفرن ديال 03 رجلين راكي عارفاتو...و تغلي الماء فيه مع الاومو..و هوما فوق النار تحرك بمونش كيما تاع الباليه....و بعديها تعود تشللها مليح و كي تنشف تماما تحط فيها الكافور و الصابون مرحي

[اروى الحلا]

واش تقصدي بالغريشة تيفري
الا كان تيفيري لي خاسرة ترميها لاخطرش الصوف يتيفر يولي كما القطن ويزيد يعديك القش واليولي راشي
لازم ترمي كلش
الا كان كما بداه ديري الفيتوكس وتغسلي في الماء السخون وينشف مليح وتقلبيه لشمس
مرة جارتنا صارلها رامت كامل القش وشفت كيفاش علابيها نعرفلو وتعلمت منها
قوليلي كي تشوفي فراشك تصيبيه مغربل تقوشي فار ماكلو وساعات تشوفي فراشة دور هديك كانت دودة ولات فراشة والا حطت وبيضت في الفراش لاخر تخسرو لازم توقفي معاه كل مرة قلبيه وخرجيه لشمس وديري الكافور وفلفل الاسود حب رشيه في الفراش والا عندك الحلفة ديريها تاني
حنا ماما كامل ماتحبش الصوف تخاف من التيفيري سيرتو لي شفنا جارتنا مسكينة فراش بنتها عروسة كامل راماتو لاخطرش مهم تكوني نقية تخافي المرا لي خدمتلك الصوف يكون عندها التيفيري ويعديلك الفراش
وتاني الصوف كي ماينشفش مليح يتيفير
ان شاء الله نكون افدتك اختى

[نيفرتيتي.]

شكرا حبيباتي كاين مطرح رميتو لقيت فيه الدود والاخرين فيهم الفراشة اللي قلتي عليها انا حابة نفهم كي نجبد الصوف من المطرح طول نحطة في الماء مغلي والغريشة وحدها تذوب وتلروح لانهم قالولي بلي الغريشة تكون كيما الغبرة وانا كي حليت المطرح الاول لقيت الصوف فيه كيما النقط بيض مالقيت مالندير قولولي طول نحطه يطيب بالصوف بالغريشة ولا لاوم نفرز
واللي قالي من واه دار الغريشة هو انه في عرسي تخطبت 3سنين وكي بقا على العرس 15يوم شرو الصوف وغسلوه وشيحوه وخيطوه في اسبوع يعني قبل العرس باسبوع وجدو
حتى انهم حلوه بعد عامين من العرس وقالو غسلناهم وحسيت بيهم نقصو بصح درك راهم كارثة

[نيفرتيتي.]

ماكاين حتى رد

[ام البنتين]

شوفي انا نفهمك ما تتقلقيش لازم تفتحي المطارح الغلاف مباشرة في الماء ما تحاوليش تنفضيه باش ما تنتقلكش ثم شوفي اذا لقيتي بلي راهي كلات كل الصوف يعني الصوف الي مقيوسة اكثر من لي صحيحة من الاحسن ترمي كلش خاصة اذا طولت راهي الصوف تولي تتفتت اما اذا لقيتي جهة برك مقيوسة انزعيها و ارميها و الباقس اغسليه نعم تغسلي كامل الصوف جيدا و تشيحيها مليح في الشمس و من بعد تنفضيها بعصا خاصة رقيقة باش ما تبقاش كتل كتل و تلميها ديريلها غبرة غبرة ازيس او تاست و رشي شوية بالفليتوكس ننصحك ما دريش الكافور لان ريحتو كريهة ثم تعاودي تتطرحيها في غلاف من الاحسن يكون جديد و لازم ديري حسابك انك كي تفتحي 2 مطارح و تغسليهم راهي الصوف تنقص اي لازم تزيدي باش تتحصلي على2 مطارح ارجو انك فهمتيني و اذا كان استفسار اني هنا.

[oumjiji]

ربي يكون في العون اغسليها بالمء والجافيل وخرجيها للشمس لمدة طويلة اختي صرالها كيما انتي وغسلتهم وعاودت طرحتهم ودارت القرنفل والكافور في المطرح وديري الفليت فيى كامل المناطق

[أم فاطيمة]

شوفي ختي خرجي لمطرح للحوش و حليه و نفضي صوف مليح و فرزي لي مسوس و بدى يتفتت في يدك رميه و اخر دريه في ماء و اومو و جافيل و غسليه مليح و نشريه فشمس حت ينشف مليح و عاودي نفضيه مليح و شوفي اذا ما فيه والو و عمري بيه المطرح مرة اخرى و ديري معاة فلفل اكحل مطحون و خزامى باش ما تعاودش توليلك و طريقة حل المطرح تبعي مكان لخياطة و حليها

[ام ساجد]

سلام اختي ام دودة ما تخافي مالوالو ولات موجودة تقريبا في اي دار الغريشة تجي حتى في السميد كي

يطول وفي الفريك عادي بصح تاع الفراش تفسد تجي دودة ومن بعد تتحول لفراشة نسموها بوفرططو

نقلك شوفي المطرح تلقاي بلاصة الخياطة حليها واجبدي الصوف لي تلقايه محتحت طيشيه ولي تلقايه مليح رنخيه في الماءالاومو ومصمصيه

مليح مليح وحطيه في كرباية يستقطر ولا شكارة تاع السميد من الصباح للعشوة وفي العشوة هزي بالطرف واضربيه بعصا رقيق باش

يتحل ويرفرف كي شغل تنشفيه وخليه على الارض في بلاصة فيها الشمس وساعة ساعة اقلبيه وخليه يشيح مليح مليح

لان لو يبقى مندي راح يعاود يغورش

ومن الاحسن تبدلي لقماش تاع المطرح وديري الخزامة على شكل صرة في الفاسمة وارمي في كل مطرح 5 او6 صرات الخزامة تهرب

الغريشة بالتوفيق اختي وان شاء الله نكون افدتك

[كريمة كوكة]

و من الأفضل كي تكملي الغسيل و تنشف الصوف و تطرحي المطارح لوحي الداخل قرون فلفل أحمر الحار مقسومين باه ما تعاودش ترجع الغروشة هكذا تدير يما و دايما توصيني باه ندير الفلفل داخل مطارحي. الله يكون في عونك يا أختي

[كريمة كوكة]

نسيت ما قلتلكش الفلفل اليابس