الورشه الثالثه و العشرون .....سطايفيه

stayfiya · 2014-11-28, 08:53

السلام عليكم و رحمة الله وبركاته

اليوم و بعد مرور اربعة اشهر و نصف على غيابي
يسعدني ندشن قسم الورشات (بدون علم مسبق)
جيتكم بمجموعة ورشات ان شاء الله تستفادو منها و طبقو عليها
ورشة اليوم روب كافتون خفيف ضريف

تحتاجي لمتر و نص قماش من الافضل يكون ايلاستيك و 80سم تيلو و 4.5متر قالون
و زوج ربط كل واحد واش يسميهم انا نقولهم كرابع هههه و كاين يقولهم زويتنات
و لي يقولهم قفالي و..الخ المهم تعرفوهم

اول شي هذا هو لقماش هو فولور في البيزو بيزو

نروحو نحكمو قيسنا و نطبق لقماش على زوج نفصل الظهر وحدو و الامام وحدو
هذا الباترون وراح تفهمو في لقماش احسن

نطراسيو لي بانس بغيت المودال يكون سانتري شوي ميش عريض
عليها درت بانس في وسط الظهر و زوج من الامام

https://imagizer.imageshack.com/img903/7536/j1Tl2D.jpg
و هنا فصلت طراف التول لي يركبو اعلى الصدر طولهم ماتتحكميش فيه غير لكان بلاسيتيه مع لقماش
و تحطيه عليك شوفي وين يوصل خاطر كاين تول ايلاستيك راح يبدلك القياسات

لي مونش يجيو طرواكار ماهم طوال ماهم قصار

نبدا نخيطو ليبانس تاوعنا و من بعد نلصق الجزء السفلي في العلوي

نمرر القالون بهاذ الطريقه

انا من الامام حبيت ندير فونت في الاسفل فتحت قيمة 50سم

كي تخيط ما ضليش ديري كفه عند لافونت قلب لقماش لبرا و حطي عليق القالو جي خياطتك شااابه

و من بعد نجمل لكتاف الامام و الخلف و تقطعي الزيادات لانو كي ستعملنا لي بانس راح يكون تفاوت خفيف
نقدرو نتخلصو من الزياده حنا رانا عملنا حساب ليبانس كي ضفنا 4سم في دوران الصدر و الخصر
و نسرفل (زيقزاق)
هنا انا ركبتها على المانكان (راني بدلت زوليخه ب جاكلين هههه) يعرف الكود غير المتتبعات

و نفوت القالون على حواف الرقبه
و نلصق ليمونش بعد ما نكون سرفلت الحاشيه و لصقت القالون
هاذو حواف المونش

الخطوه لي وراها نجمل لي كوتي

و نكفف و باش جي خيا طتنا متحوفه لازم نحدد مليح الروبه انا ندير كتانه مشمخة و نحدد

و اخر خطوه نلصق لكرابع اكيد بالبرا و الخيط

و انتهينا هاي لابستها هنا مولاتها تلبسها بالصحه و لهنا

ان شاء الله تكونو فهمتو ولو القليل راني نبسط على قدما نقدر
مايلومونيش لي ماقدرتش نوصللهم الفكره
دعواتكم الى اللقاء مع الورشه القادمه
سطايفيه

stayfiya · 2014-11-28, 09:17

تساؤل ام رشدي
عندي سؤال ممكن تفهميني في البانسا الي درتيها في الصدر بقداه تدخلي وبقداش خرجتي لاني ناقصا شوية فيها ......

حبيبتي ام رشدي الباس اتوحيتها من بانس الصدر عرضها 2الى 3سم تبدى من ابرز منطقه في الثدي. و موقعها يبعد ب حوالي عشره سم على خط الجنب و هو في الاصل المسافه بين الثديين غالبا تكون 20سم نقسموها على ثنين =10سم . باش نوضحلك في الرسم هاو ليك

فوزية1975 · 2014-11-28, 10:47

4444444444444444444444444444

أم معاذ أم معاذ · 2014-11-28, 10:55

ما شاء الله يعطيك الصحة و الهناء

أم معاذ أم معاذ · 2014-11-28, 11:00

راني راح ندير ملف في الميكرو تاعي إسمو سطايفية ههههههههههههههههه

فاطمة1987 · 2014-11-28, 11:47

ماااااااااااااااشاء الله تحفة الله يبارك فيك على الورشة

biba19000 · 2014-11-28, 11:50

بارك الله فيك سطايفيه مستوى راقي و ورشه مميزه كباقي الورشات الله يرحم الوالد ان شاء الله

أم ياسين الزهراء · 2014-11-28, 11:55

عودة موفقة وربي يبارك فيك ويهنيك

ربي يرحم بابك

مالكة القلوب · 2014-11-28, 11:58

ربي يحميك و يقبل مساعيك و يجعلها في ميزان الحسنات

fatma1977 · 2014-11-28, 12:08

يعطيك الصحة حنونة دائما مبدعة

crono · 2014-11-28, 12:44

الله يعطيك الصحةلبرتي على الورشة تسلام الأيادي

ام رشدى · 2014-11-28, 12:59

اختي سطايفية ربي يعطيك ماتتمناي وانشاءالله يرحم الوالد العزيز فقط عندي سؤال ممكن تفهميني في البانسا الي درتيها في الصدر بقداه تدخلي وبقداش خرجتي لاني ناقصا شوية فيها ورربي يجازيك الخير ياحرة لحراير انا في الانتضار وممكن تقوليلي وين لقيتي تيل دو تخافاي لاني حوسات اعليه في بلعلى ماصبتوش

ام رشدى · 2014-11-28, 13:06

.................................

mimimouni · 2014-11-28, 13:37

ماشاء الله عليك يعطيك الصحة
شرح كافي ووافي اكيد الكل راح يفهموا

farawla01 · 2014-11-28, 13:50

الله يبارك يعطيك الصحة دائما متالقة 4444444444444444444444