ساعدوا أخوكم

جوجو95 · 2013-10-12, 17:56

أهلا وسهلا أنا شاب جزائري (على فكرة هذا حساب أختى) ساكن في الغربة بعيد على أهلي لذا أرجو أن تساعدوني
في تحضير بعض الأطباق السهلة والتي لا تستهلك الكثير من الأمور، الميزانية لا تسمح ههه
في مطبخي هناك سباغيتي ، معكرونة ، أرز ، ثوم ، بصل ، فلفل ، راس الحانوت ، زيت ، زبدة، فرماج ، طماطم مصبرة ، بطاطا، فلفل أحمر مطحون على ما أعتقد ، بيض
ساعدوني في طبخ أي شيء الليلة ، كرهت من الفريت أوملايت ، أي شيء للتنويع
أنتظر مساعدتكم
لازم تكون سهلة أحوكم لا علاقة له بالطبخ

*عاشقة الجنة* · 2013-10-12, 18:13

اخي شوف دير مرقة حمرا بالطريقة هذي

ارحي 2 فصوص ثوم .....و بصلة صغيرة......حطهم في الطنجرة
مع 2 ملاعق كبيرة زيت.....حبة فلفل........غير شوي راس الحانوت
وغير شوي (ميوصلش نصف ملعقة صغيرة ) فلفل احمر مطحون
و ملعقة كبيرة طماطم مصبرة....شوية ماء.....حطهم على نار متوسطة يتقلاو
شوي ....وحط حبة بطاطا متوسطة الحجم بعد متقطعها على اربع
او ستة قطع.......ثم اظف حوالي 1/2 لتر ماء نقص النار شوي وخليهم يطيبو حوالي
نصف او ساعة كاملة
في هذه الاثناء حط ماء يغلي ودير فيه شوية ملح و ملعقة كبيرة زيت
بعد ميغلي حط فيه السباقيتي يطيب 7 او 9 دقائق وخليه يتقطر
كي يطيب حطو ف المرقة يتشرب

وكول بالصحة والهناء

يمكن تعملها صوص برك يعني مشي مرقة
اتبع هذه المراحل فقط

ارحي 2 فصوص ثوم .....و بصلة صغيرة......حطهم في الطنجرة
مع 2 ملاعق كبيرة زيت.....حبة فلفل........غير شوي راس الحانوت
وغير شوي (ميوصلش نصف ملعقة صغيرة ) فلفل احمر مطحون
و ملعقة كبيرة طماطم مصبرة....شوية ماء.....حطهم على نار متوسطة يتقلاو
شوي

وكي اطيب السباقيتي حط فوقها الصوص
مع حبة فلفل مقلية وحبة بيض مغلية

وبالصحة والهناء

اعانك الله اخي الكريم

sirila · 2013-10-12, 18:40

الوصفة الاولى

مرحبا

انا نعطيك اسهل طريقة

طيب مقرونة ولا سباغستي ولا ارز في ماء ملح قطرة زيت

كي تطيب صفيها و حطها

دير في مقلة بصلة مرحية ولا مرابية + مرغرين حسب الكمية حوالي 2 مغارف كبار

ذبل بيها البصلة

مبعد لوح السباغيتي او المقرونة... ولوح عليها البيض والملح والفرماج وخلط

راهي بنينة بزاف

sirila · 2013-10-12, 18:42

الوصفة الثانية

قشر البطاطا

قصها دوائر رقاق

لوحها في الكوكوت + ملح + ثوم +فلفل اسود + حوالي نصف كاس زيت

اغلق الكوكوت حوالي نصف ساعة على نار جد هادئة

مبعد حلها ادا طابت نحيها واذا لالا زيدلها شوي

sirila · 2013-10-12, 18:46

الوصفة الثالثة

طيب المقرونة حوالي ربع ساعة في ماء مغلي سابقا مع الملح

زيد الحليب حسب الكمية تاع المقرونة

وكل ماتنشف زيد الحليب

راهي كي طيب تجي ناشفة

مبعد ذوب الفرماج في الحليب واذا بغيت 1 علبة ياؤورت طبيعي فوق النار

زيدو للخليط وحرك