بينَ الطموح و الحلم ... و ضغط الاهل ! أفيدوني أحبتي

مشكلتي · 2013-09-12, 21:13

نص المشكلة في الأسفل

سيدة القصر الهام · 2013-09-13, 10:25

موضوع حيرني و حبيت ندي آراء موضوعية فيه بتعمق مش ردود و فقط بدون تامل للحالة من كل جوانبها

حكايتي انِي ادرس فتخصص مش حاببتو

كنت صغيرة كنت اعشق المجال الأدبي جدا و كنت نحلم بمحال الاعلام و السياسة و التاريخ

و طبعا كنت ممتازة جدا فصحلي العلمي و الادبي ، و لانه عيلتي عائلة يشوفو المجال الادبي انه مجال تاع الضعاف !!!!

كرهوني فيه و كنت صغيرة ف 3 متوسط و درت خيار علمي

المهم تبعث علوم فالليسي و درت رياضيات

الباك جبته 15,69

حبيت ادارة اعمال فالمعهد ، ترجمة ، اعلام

للاسف كل مكتبوش المعهد ولى بالليسانس و الترجمة و الاعلام تغلقوا هاداك العام كفرعين بالنسبة للمختصين علوم

لقيت قدامي استاذة او طب

علما اني كنت نكره طب خلاص

حبيت ندير استاذة انجليزية ، بابا قاللي اخطيك

حبوني ندير آنفورماتيك بطريقة غير مباشرة

ماعلينا صراحة كانو يقولولي ديري وش تحبي و كي نقول استاذة انجليزية او علوم سياسية يتبدل وجههم عقدوني ههههههه

المهم درت طب لكن قلتلهم ثاني عام رح نعقب باك أدبي و نسجل بيه فالجامعة تخصص ثاني نحبو و نقرا بالموازاة

كل كانوا ضدي قالولي ماتقدريش تقراي زوج حوايج في بعضهم

لكن الحمد لله درت ارادة و قريت للمدسين و الباك الادبي اعتمدت على قدراتي فالكتابة واللغات و رحت و جبتو الحمد لله 14,80

و هنا بدأ الخلاف

اهلي منعوني اني نسجل تخصصين و ماحبوش يسجلولي و رفضوا بشدة قالولي حتى تكملي طب

تم انا تدمرت صراحة

لانه كنت حابة التخصص هذا من قلبي و علابالي باللي نقدر ندير تخصصين بشهادة اساتذتي ، لاني متمكنة فالمجال الادبي نظرا لمطالعتي و نقاشاتي مع اكبر الصحافيين بسوريا و مصر و الحمد لله اجتماعيا محتكة فهاد المجال و نبدع فيه

لكنهم قالولي مستحيل حتى بعد 5 سنين و سجلي بيه

بكيت حاولتهم باللتي هي احسن درت كل شي رفضوا

قلت معليش رحت لسنة 3 طب قلت نقرا مليح و حاولت نحبب روحي فمجال الطب قدر الامكان و مبعد نقنعهم فعام آخر

اولا جيت تصدمت فالطب الجزائري بصراحة ، حسيت حالي قاعدة فجامعة تجهيلية مش تعليمية فقسنطينة الطب 0

مكانش تطبيق خلاص ، نحفظو ليكور برك و مانتعلمو والو و مكانش ضمير و ماشي طب كااامل

اذن العام هذا قلتلهم نكمل سياسة و نترك الطب نهائيا رفضوا بشدة

يقولولي كيما تحبي كي نجي ندير القرار و ننفذ يمنعوني و يقاطعوني و يقولولي تخيبي ظنا فيك

و الله يا جماعة التخصص الادبي نعشقه و نحبه كمجال و نبدع فيه و مجال الطب حاولت نحبه لكن للاسف هنا في الجزائر ممكن تولي طبيب ( متفوقة في المجال لكن العلامة برك !!! مانعرف والو لانه مكانش تطبيق )

فقلت نتركه لانه مش حابة نكون كيما اي طبيب جزائري نهف روحي و نفس الوقت ندير مجال نحبه و نتحمل مسؤوليتي و نبدع

اهلي رفضوا نقرا الاختصاصين مع بعض و كي قلت نترك الطب قلبوها عليااا

انا نعشق الكتابة ، و كتبت الصيف اللي فاتت رواية و كي كملتها قراوها دارنا ( قاطعوني ) لانهم ما فاهمينش المغزى ابدا ، انا تطرقت للسياسة الجزائرية و الدم ففترة الارهاب و تطرقت لموضوع تاني المرأة و العذرية في المجتمعات العربية و ركزت على نقطة الشرف الموهوم فوقت يرتكبوا اكبر الاخطاء

ماعلينا اهلي جاتهم كبيرة و قاطعوني و بهدلوني و انا تم شاركت فيها فعلي معاشي

ربحت الجائزة التشجيعية و لجنة التحكيم قالتلي و الله تستاهلي الاولى و كي عرفت بيا قالت اسلوب لا مثيل له ، وشكرتني خلاص قدام بابا فتكريم خليدة تومي

تم وليت بنظرهم مبدعة و الرواية رائعة وو و

مشكلة اهلي تهمهم النتيجة مش الثقة فيا ، يعني كون دك نقرا سياسة يقاطعوني كون نتفوق يوليو ليا

و الآن سليمان بخليلي الحمد لله شجعني و دكتور من باتنة قرا الرواية و رح يعاوني فالنشر و دار نشر مصرية حابة تتبنناني و الدكتور يوسف زيدان عرض عليا الدراسة بالاسكندرية السياسة و دخول ورشة الكتابة مع كتاب و شعراء مشهورين

الفرصة قدامي رائعة و لا تعوض .. هل اختار حلمي و طموحي الذي فعلا اثق جدا بمقدرتي على النجاح فيه

ام اضيع 4 سنوات اخرى في مجال الطب الذي لا احب ( راح يدي مني وقت ياااسر و منقدرش نكتب )

شكرا جزيلا و اعتذر على الاطالة بالصح حبيت نحطكم فالصورة كاملة

alchimi · 2013-09-13, 10:44

سلام عليكم
هذه المشكلة منتشرة في كل العائلات خصوصا ان كان افرادها كلهم متخصصون في مجالات علمية فهم لا يرون للابداع مكاننا و لا وقتا انا انصحك ان تستمري في ابداعك لانه عن ثقة كاملة لكن اعلمي ان تخصصك في السياسة لن يغير شيئا فالدراسة السياسة في الجزائر لست مختلفة عن الطب سوف تحبطين مرة اخرى لذلك انا انصحك ان تسنمري في الطب و ثجتهدي في الجانب الادبي ان كنت وصلت لهذا المستوى فقط بالمطالعة فيمكنك كذلك ان تصلي الى اكثر من هذا باجتهادك

ام ايمان16 · 2013-09-13, 10:51

ربي يكون في عونك اختي وتلقاي حل يناسبك
فمادامك متفوقة لهذا الحد فشوفي اذا تقدري تكملي التخصصين الطب وتحقي رغبة عايلتك وفي نفس الوقت تواصلي في تحقيق حلمك في المجال الادبي
وشوفي كاش واحد من عايلتك يقدر يوقف معاك ويساندك في تحقيق ذلك
وعلى حساب ماقلتي مازالك 4سنين في مجال الطب؟يعني قطعتي مسافة في هذا المجال ؟فاذا كانت عندك الامكانيات باش تواصلي الطب مع المجال الادبي انا نشوف كمليهم في زوج احسن وتكوني حققتي رغبتك ورغبة اهلك

وربي يوفقك ان شاء الله

عبد الله 22 · 2013-09-13, 10:55

السلام عليكم ياخت بم ا أنك مبدعة فلا تحتاجي لتضيع الوقت في دراسة الادب لآن الابداع لا يتم تعلموه لهذا ماعليك الإ المواصلة في الابداع من جهة و الطب من جهة أخر بالتوفيق وان شاء الله نسمعو قريبا بمفكرة جديدة في هذا الوطن بالتوفيق

alchimi · 2013-09-13, 11:16

لن انكر ان الاستمرار في دراسة لا ترغبيتها فيها مضيعة لوقتك و لكن لديا قناعة ربما تكون غريبة للبعض لكنني اؤامن بها اعلم ان ارضاء الوالدين و لو على حساب رغباتي فيه رضا الله

الواثق · 2013-09-13, 11:36

في الحقيقة اول مرة اجد شخص يفكر بهذا التفكير .................جميل جدا ان تكوني مهتمة باللغة والادب فالكثير يراه من الماضي لتغلب الافكار الغربية على تفكيرنا

بالنسبة لي فارى ان موهبتك وابداعك ليس له علاقة بالدراسة في الجامعة فاغلب الادباء والشعراء كانو عصاميو الدراسة

واقول لكي وانت جربتي تخصص الطب ووجدتي فيه تلاعب وانعدام المستوى فكل التخصصات هكذا حتى الادبية منها فلربما درست ماتريدين فلاتجدي شيئا سوى مضيعة للوقت

نصيحتي لكي اكملي دراستك وحافظي على موهبتك ولاتنجري وراء اطماع الكثير في قضية تبني الاعمال والسفر ووووو فكل هذا يفتح مجال للفتنة والكثير من يشتغل في تجارة المواهب الجديدة وهذا معروف فلاتغرنك اسماء او شهادات

ولحبذا كانت موهبتك في مجال الدعوة الى الله فسيكون لكي اجر عظيم

واخيرا حافظي على عائلتك واحترمي رأيها ففي الاخير هم يريدون لك الخير ولانقاش في ذلك فاحبي مايحبونه في المعروف

وفقكم الله لما يحبه ويرضاه

والله اعلم

سيدة القصر الهام · 2013-09-13, 11:45

اصدقائي شكرا جزيلا لكم

فيما يخص مجال الطب سيشغلني عن الكتابة لانه مضغوط بزاااف

24 على 24 حفاظة ماتلقاش وقت

باش كتبت روايتي الاولى ماكنت نرقد كااامل ساعتين فاليوم برك ، هلكت صحتي فقط لاني نحبه

لكن اهلي دك مانعين نقرا تخصص ثاني اصلا

فيما يخص السياسة ، قبلوني فكلية الاعلام الامريكية فدبي و عيلتي رفضت قبل 3 سنين

دك بعثت اوراقي و جسلت اعلام سياسي فالاسكندرية و التعليم تم مليح و الوسط الادبي منتعش جدا

عندي طموحات تأثير فالامة الاسلامية فكريا ، اكثر من روتين دراسة ياخد وقتي و جهدي و مانقدرش نقدم بيه

رُفيدة · 2013-09-13, 11:50

ربي يوفقك اختي ..

sarl02 · 2013-09-13, 12:39

احيي فيك طموحك وتفكيرك ...لكن من وجهة نظري تقدري تستمري في دراسة الطب دون اهمال جانب الكتابة والنشر وهناك من الروائيين الكبار من كانو في شعب علمية نجحو في الجانبين ..وعلى راسهم الدكتور والروائي المصري الكبير علاء الاسواني فهو طبيب وروائي عالمي ووفقك الله.

أيادي الأمل · 2013-09-13, 13:08

أنا نظن إذا الطب ماتحبيهش و راكي تقرايه فوق القلب غير أخطيك منو خير،
لانو ماهوش لعبة، إما تقرايه من اعماق قلبك و تحبيه و تبذلي فيه كل مجهودك يا إما تخليه

و تانيك في الطب الطالب ما يعتمدش غير على اساتذتو و يحفظ لازم انت بنفسك تروحي للاستعجالات و تتعلمي وحدك ،
و تقراي الكتب و تتثقفي،
اما الاعتماد على الدراسة في العام فقط غير كاافي

انا من رأي ديري حاجة تحبيها و متمكنة منها خاصة اذا سفتي نفسك ماكيش رايحة تعطي في الطب لانو صدقيني ماهوش سااهل،
إلا اذا حبيتي تكوني ككثير من الاطباء يطبعوا برك

و إلآ اذا حبيتي تنجحي في الميدانين اذا كانت عندك قدرة و استطاعة و ارادة ربي يسهل،

ومثال ذلك الدكتور مصطفى محمود طبيب و كاتب و فيلسوف وكلش الله يرحمو،
كتاباته و كلماته مذهلة و مؤثرة فعلاا روعة

ربي يوفقك للصوآب

سيدة القصر الهام · 2013-09-13, 13:19

مشكلتي مع الطب كي تحتمت عليا و درتو تصدمت فالوسط ( قسنطينة )

صراحة كارثة التعليم الطب تم

مام تحاولي تمنحي والو ، خصوصي ف عامنا كاين 700 طالب ، كي نروح للاستعجالات العام كامل تلقاي حجرة صغيرة فيها 30 عالاقل جايين يتعلمو

تهبلي و تتصدمي وسخ و فوضى و يدوزيو فينا غير بالورق

انا الحمد لله علامات عادي نقرا نجيب لكن التطبيقي حاولت ندير وحدي مالقيتش واحد فوق راسي عالاقل يوجهني و سقسي على قسنطينة و يجاوبوك كارثة و انا مش حابة نتفوق و ضميري يهلك بدون اكتراث و هذا واقع اغلب الاطباء دك مع الاسف

لذا حبيت نتفرغ للتامل و البحث ، فمجالات الدين و السياسة ، و الكتابة تبقى موهبة نطورها ان شاء الله

زيادة على ذلك الطب يدي الوقت بزاف على والو كل يوم 20 ورقة للحفظ تقريبا .. ماتلقايش وقت للتامل و الكتابة

الزهرة المضيئة · 2013-09-13, 13:28

عرفتك الهام قبل ان ارى ردك هذا
اتفهم شعورك جدا و اسضا شعور اهلك لانهم ينظرون للموضوع بزاوية مجتمعية ضيقة لا اكثر
احنا في بلادنا عندك 15 في الباكالوريا خلاص انتهى قدرك هو الطب بغض النظر تحبي المجال او لا
انهم لا يرون ما يوجد في الجامعات فقط يتبعون القيل و القال و ان للطب مكانة مرموقة و انتهى
لك كل الحق ان تختاري ما تحبين و انا لو كنت مكانك لما فرطت في شيء
انا ارى ان تكملي الطب سيفيدك كثيرا في حياتك حتى لو لم تعملي به و سجلي في التخصص الذي تريدين وواصلي الكتابة
ضعي تحدي مع اهلك انك ستنجحين في التخصصين و ان لم توفقي ستتوقفين عن السياسية و جربي
و اتمنى لك كل التوفيق حبيبتي

الزهرة المضيئة · 2013-09-13, 13:34

و تقدري انت تعيشي وحدك في بلاد غير بلدك؟
على الاقل سجلي هنا في الجزائر

torkia18 · 2013-09-13, 13:40

السلام عليكم
انا من راي ان تكملي الطب بالموازاة مع ابداعاتك الادبية
بما انك درست 3سنوات طب لا تنسحبي هكدا . عندما تبدئين التربص في المستشفى ستاتيك حلاوة الطب وربما تبدعين فيه مثلما تبدعين في الادب.
ربي يوفقك.