تليتـــــــــــلي باللحم من مطبخي تفضلوا ...

manou manal · 2013-07-15, 14:09

السلام عليكم

لمحبي تليتلي وباه تنوعو شوية ، طريقة خفيفة وسهلة ولذيييييييذة عجبتني حبيت نشارككم بيها
تحمصي حوالي 500 غ تليتلي ثم تغليه في الملح حتى يطيب من بعد صفيه وقطريه

وجدت لحم مرحي كيما للبوراك
قطعت----مانرحيش ومانرابيش---- قطعت بصل رقيق كمية مليحة، انا درت 3 صغار، وذبلتو مليح في الزيت مع رشة ملح
لما ذبل زدت عليه حوالي 250 غ لحم مرحي وحركت حتى طاب ثم عدّلت الملح وزدت فلفل اكحل، نحيت من النار واضفت كمية مليحة معدنوس مقطع ، في الصورة جاني قليل زدت قطعت، حركت وخليتو
ذوبت زبدة امممممم ممكن 50غ او اكثر عينك ميزانك، مع 4حبات لافاش كيري، ثاااااااني عينك ميزانك تحبي تزيدي تحبي فرماج الميزان
كي ذابو فرغت عليهم تليتلي وخلطت باه شرب هذيك الزبدة والفرماج
فرغت نصف الكمية في مول، فوقها اللحم مرحي، ثم غطيت بتليتلي
رابيت عليه الفرماج ودخلتو للفور غير يذوب
راه يجي خفيف خفيف ومايتشبعش، ان شاء الله تجربوه ويعجبكم

للعلم انا هاداوين راني نتعلم في الطياب بصح واش نقولكم تاكلو صباعكم من وراه
صحا فطوركم غالياتي

yara djoumana · 2013-07-15, 14:13

اامم يعطيك الصحة باين يجي بنين غير الصور ماظهرتش حاولي تحمليها

leilaz · 2013-07-15, 14:17

خرجلك روعة واكيد بنين نجربوا في اقرب وقت يعطيك الصحة
اختي التليتلي كي نزيدوه فوق الزبدة والفرماج يكون يابس وادا يابس يطيب مع الفرماج والزبدة

manou manal · 2013-07-15, 14:27

اقتباس:

المشاركة الأصلية كتبت بواسطة leilaz

خرجلك روعة واكيد بنين نجربوا في اقرب وقت يعطيك الصحة
اختي التليتلي كي نزيدوه فوق الزبدة والفرماج يكون يابس وادا يابس يطيب مع الفرماج والزبدة

شكرا على مرورك حنونه
بالنسبة للتليتلي تدي حوال 500 غ تحمصيها في مقله من بعد تغليه في الملح حتى يطيب تصفيه وتخليه يقطر من بعد تضيفيه كيما قلتلك
شهيه طيبه