رثائية الأم الشهيرة للشيخ امحمدي محمد القـــلاّسه رحمه الله

[abou hithem]

هذه القصيدة للشاعر الكبير امحمدي محمد القلاّسه رحمه الله من حاسي بحبح يرثي فيها امّه وكان معروفا رحمه الله بشدة حبّه وتعلقه بها حيث معظم قصائده تقيبا تدور حولها .

أتمنى ان تنال اعجابكم ، مع تحيات :ABOU HITHEM

بسم الله ياخــــــالقي ناشي لرواح °° يامــــولاي الحق كنز الاكواني

راني نطلب فيك كل مسا وصباح °° تغفرلي للوالــده يا سلطــــــاني

حده بنت عيسى لي كانـت مفتاح °° زهّاية عمري على شاو زْماني

ربّايتني ع الطــهارة و الصلاح °° حمّارت وجهي الضيف اذا جاني

اصبر ياقلبي العــــــز علينا راح °° ما عـــدنا نـــراه قرّت لعْـــياني

رحــــنا ليها للقــبر يوم التّصباح °° نابيناها قـــاع لا من نابـــــــاني

لعزيزة برد الحسوم عليّ طـــاح °° يتنسّم من كل جيهة قـــــــــوّاني

ما نرقدش الليل هاضولي لجراح °° والكبدة والقلب لهبو دخـــــلاني

وفراقك خلّى رْقادي ع الصـفّاح °° يعذرني من صارلو كـــيما راني

شوم غيابك راه خـــــلاّني مدّاح °° سهرني عُقْب الليالي بكّــــــــاني

جرح الام صحيح فايت كل جراح°° خــــــلاّني مثل الجايح عرياني

ودموعي سالوعلى خدّي تكفاح °° واش يصبر خاطري يا تشـطاني

هذا المعنى ليك يا ســـابق للماح °° ونْهـــــنّي في خاطري ما هنّاني

عز الوالـــــدين كنز لا يتـــلاح °° واللي فرّط فيه يـــــــبقى جيعاني

ماجيتِ بالمال ندفع ســـبع لقاح °° ويجوني لحباب جمــــــلة بالفاني

دِيّة وفْدية تكـــون على صلاح °° نسلـــّكها خدمة على طول زْماني

ما جيتِ بجهاد ونجيب السِلاح °° نلقى من لبطال ياسر عُــــــــوّاني

نْخيّر من العرب فرسان صحاح°° ويردّوك قْبـــــال لقصى والداني

البارود ينين من عند الكـــُسّاح °° واللّي مفهــــــومين ضد العدياني

الله غالب جا الامر لا يتــــناح °° ما ينفع لا مـــــال ولا عُــــــوّاني

ما خلّى حيدار وصْحاب الكفاح °° ما خلّى نـــــبيك طه العــــدلاني

والدنيا جاتو تلاقي بالتـــــبراح °° ذي مهـــــدية ليك بأذن الرحمانِ

قاللْها ما فيك عُقبة لا صـــــلاح °° يوم ان نزْهى بيك نـــمسى للفاني

عمري تفنى والقبر ليّ بــــرّاح °° وَلو نا ننــــساه هو ما ينــــــساني

الصّفة اللي كانت مْليحة تقــباح °° ويطيحو لضراس مْع الاسْــــناني

روحي من عندي وسالي عالجِيّاح°° حواســين عليك ظهر وخفياني

اذا حضر الاجل مافيـــه التبراح°° ما ينـــفع المــــال ولا عُـــــوّاني

مايبقى من كــثير مالو والتسراح °° ما يـــــــبقى قليل يمشي حفياني

مايبقى لا طـــــايرة ولا زحزاح °° مايـــبقى زحّاف ولا عـــــمياني

ما يبقى من شد لحكام ولـــفراح °° لابدّ يأتــــيه يـــوم الاحــــــزاني

ويلاقي مولاه في حالات قْــباح °° بيه الرشوة والفرايض نســــياني

وين اللي دارو صريّات التسطاح °° داروها توزاق بـــــر ودخلاني

وين لي كسبو ذهب غالي وضاح °° ولاّ من خُــــدّام حُر ووصفاني

وين اللي ربطو ازوايـــج فـــلاح °° اذا جات النعمة يعيشو زهواني

وين اللي ركبومحاصن من لقراح °° والعودات يشلوشو نظر عْياني

هذا المذكورين جملة عاش وراح °° سُكنتهم تحت اللّحود وصفياني

والقــــلاّسه للخــلاّيق هُو نصّاح °° من الدنيا ندّو قْطَيْعتْ لكــــــْفاني

وقْريعة ريحة يديروها تَكْــــفاح °° مافيها لا ديــــــــن ولا عصياني

ربي وصانا بأمــــر اللي يوضاح °° وتْهـــلاّ في الدين ولا نســـياني

واللّي فرّط فيه راه من الجِيـــّاح °° لا فـــَرْقَ بينُو وبين الحـــــيْواني

ذا أمر وأكيد ســـابق في للــواح °° من آدم حتّى لآخــــر زَمــــــاني

ما ينفع غير الصبر والدين مــلاح °° الصبر المَتين يمحي لحــزاني

ذكر الله هو اللي فيه الفــــــjـلاح °° يا من شوّق فيه يمحي الاحزاني

محمد جـــيناه بالنـــــاس الصلاح °° يطلب في الاله عـالي الغفراني

ياربي بجاه طــــــه بولربـــاح °° نجّنا من حَــــر صهد النـــــيراني

الشاعر الكبير: الشيخ القُــــــــــــــــــــــــلاسهّ