مارأيكم في قصة زواج أخي

[الحاج لخضر]

مارأيكم : لا أطيل عليكم أحب أن أسمع رأيكم في قصة أخي : " البارحة "ذهبت أمي لتخطب لأخي فتاة هو رشحها لأمي بنت فاميليا وهي عا ملة إستقبلوا أمي إستقبالا جيدا و قالت لها أم البنت نحن لا نطلب شيئا غير الهنا ء وراناعطيلكم لكن لكن لكن لكن ؟؟؟؟؟؟؟؟؟؟؟؟؟؟؟؟ لازم سكن وحدها ...........

سؤالي ............. هل أصبح السكن شرط من شروط الأهل حتى يزوجوا إبنتهم ؟؟؟؟؟؟


أرجو أن تعطوني رأيكم في هذا الموضوع هل أنتم مؤيدين أم لا لهذا الشرط


صح صيامكم

[مشطوب]

شيء عجيب

وأنتوما علاه تزوجوا أولادكم

لمثل هذا النوع

راهم كاينين السوريات

وكاينيين التركيات

ويقبلوا بكل شيء

أنتموا لي غالطين

مانش في زمان للمرأة تتكبر فيه

[فـرح]

عادي تطلب السكن وحدها
لانه مهما كانت العجوزة والعروسة ناس ملاح رايحين يصراو المشاكل بسبب الحساسية اللي بيناتهم
ورانا نشوفو في المشاكل اللي راهي تصرا بين العجوزة والعروسة
مالا تقطع الشر من الاول وتسكن وحدها
انا نسكن وحدي والحمد لله علاقتي مع اهل زوجي رائعة الله يبارك ربي يدومها
وكي نقول لراجلي هيا نسكنو معاهم يقولي تحوسي على المشاكل

[بسمة تحدي]

ما المانع ان تسكن الفتاة مع اهل زوجها

كاين بعض الناس يصعبوها الله المستعان من المفروض يقسو على الاخلاق على تربية الشاب

ماشي على دار وحدها لازم الواحد يسهل على الاخر

خاصة انو فى وقتنا تلقى شاب في 30 سنة هذا وين قال بسم الله وبدا حياتو

مين راح يجيب السكن ............ يارب يكفي يعيشها بك

منكذبش عليك انا منقدرش نتجرأ ونقول سكن وحدي

[الزبرجد]

التفسير بسيط جدا

بالنسبة لكونها عاملة فشيء جد عادي ان تطلب سكن مستقل

وجود كنة عاملة مستحيل ما يجلبش المشاكل و وجع الراس للجميع

حاجة ثانية يجب ان يعلمها الناس : المطامح دائما تقابلها تنازلات

حاجة ثالثة : لما يكون الخلق و الدين هو الثابت و باقي الامور عوارض ....بقدرة الله عز وجل تلقى روحك راضي

أما غير هذا ....فتجد العائلتين يحفرو لبعضاهم ....و الله المستعان

تقبل الله منا و منكم

[ma douce]

اختي
مشي ضروري ان تطلب السكن وحدها علاه تقعد مع عجوزتها الا ادا كانت العجوزة لاتحبها

[(الانسان الوفي)]

السلام عليكم....أولا أخي شرعا وقانونا يحق للزوجة طلب سكن خصوصي ...ولا أحد يقول لها لماذا أو كيف ...والمؤمنون عند شروطهم وهذه أكيد عائلة محترمة لأنها طلبت هذا في البداية ...

ثانيا من المفروض هو الذي يسارع في السكن لوحده وليست هي لأنها عاملة ....فيجب أن يقدر وضع أمه وأخواته وهم يرون كنتهم كل يوم تخرج للعمل وهن يمكثن في البيت يجهزن أكلها ؟؟؟

شكرا اخي

[leila ben]

حنا عندنا هاذ الشرط عيب لأنو الفتاة لما تشرط السكن المستقل معنتها رافضة من البداية أهل الزوج بصح كي نشوفو من جهة أخرى الوحدة تحط هاذ الشرط من البداية وعلى الرجل القبول أو الرفض يعني مضرباتوش على يدو وقاتلو أقبل بالسيف خير من وحدة تولي تقزب وتقول نعيش مع داركم وتلعبها تحب المعيشة معاهم على عكس اللي في قلبها من بعد تزوج وتولي تصك وتنوض القرون وتولي في حل وربط ومشاكل كبار خاصة إذا لم يتمكن الزوج من توفير البيت المستقل .
منقولش أني منحبش البيت المستقل ومكانش بنت تقول أنها متتمناهش تكون فيه بعيدة على المشاكل وتكون ديما عزيزة وتطيب وتلبس كيما تحب ............................... بصح منشرطوهش وحتى الرجال كاين اللي يحب يعيش وحدو ماشي غير البنات.
بالنسبة للأخ تاعك إذا كان قادر على هاذ الشرط يتكل على ربي وميخليهش عائق خاصة إذا كانت بنت أصل وعاجباتو كيما راك تقول

[sali-sali]

السلام عليكم
ممكن في البداية تسكن مع اهل الزوج و مع الوقت يوفرها سكن ان شاء الله..لانو صعيب تبقا في بيت العايلة خاصة ادا كانوا خوته متواجدين..لانها لن تجد راحتها

[leila ben]

بالنسبة لكونها عاملة فشيء جد عادي ان تطلب سكن مستقل

وجود كنة عاملة مستحيل ما يجلبش المشاكل و وجع الراس للجميع

معك حق يا أخي حنا أغلب العاملات يسكنو وحدهم والعجوزة هي اللي متقبلش تعيش معاهم بطيبة خاطر خاصة إذا كانت عندها كنة أخرى ماكثة في البيت تقول أنو يكون بينهم حساسية وتان ميتفاهموش على شغل الدار
وأحيانا يرفضوها يقولو ماشي هي تخدم وترد لجيبها وحنا نتبونشو عليها

[SKYALGERIA]

إخواني الكرام السكن المستقل بالزوجين فيه فوائد أكثر من السلبيات و هذا المطلب صعب جدا جدا بالنسبة لشاب يريد أن يتزوج و يستعفف أم أنكم حسبتم أننا في بلد أوروبي فيها السكن من الكماليات و سهل الحصول عليه ؟؟؟ هيهات ثم هيهات و هذه القصة تنطبق علي بالذات و لم أجد حلا سوى بالسكن مع عائلتي مؤقتا ريثما أحصل على السكن الحلم و أعرف تمام المعرفة بأنه أهم عائق لكل الشباب . لا أريد أن أطيل عليكم بسرد ايجابيات السكن المستقل لكن أرجو من الفتيات اللواتي يردن بناء عش الزوجية التعقل و تخفيف شروطهن حتى يتكمن من إتمام نصف دينهن . بالله عليكم أين ستجدون شاب أقل من سن ٣٠ يملك سكن خاص به أو قطعةأرض فقط نادرا للطبقة الغنية أو أصحاب العقارات الموروثة من طرف آباءهم و إذا أراد أي شاب سكن لوحده قبجب عليه الإنتظار كأقل تقدير و في أحسن الحالات ٥ سنوات بل هناك من بقي ينتظر ٢٠ سنة لكي يحصل على مراده و منهم من جاوز سن الشيخوخة و توفي و لم يحصل عليه و السبب معروف . نحن في بلاد المحاباة و الرشوة فمن أراد أن يسلك طريق الحرام فالوجهة معروفة و من منكم يرضى أن يسكن في مسكن أتى من حرام و العياذ بالله فأين ستنزل عليه البركة ؟؟؟ عذرا على الإطالة لأن هذه المشكلة أرقتني كثيرا و أنا دائم التفكير فيها و ندعو لأولياء أمورنا بالهداية و أن يتقوا الله في أبناءنا و بناتنا و سيسؤلون يوم الحساب عن رعيتهم و السلام عليكم .

[الحاج لخضر]

شكرا على هذه الأراء و إن إختلفت فهي كلها تنم على صدقكم وطيبة قلوبكم

[ام نسمة]

مرحبا قرءت كل الردود قبل ان ابدي اي رءي
ردود بين مؤيد ومعارض
عن نفسي ارى ان العائلة التي تشترط على العريس منزل مستقل لابنتهم قبل ان يخسر اي فلس من مصاريف على العروس من هدايا ومهر ووووو ارها عائلة راقية فعلا
لان الكثير من الناس كما نقولو يتمسكنو حتى يتمكنو يعني النهار الاول تسمع منهم غير كلمة ساهل ساهل وكي تلحق بنتهم عندكم يشعلو النار في داركم ويخربوها لكم ويخسرو بينكم وبين ولدكم ويخلو حتى تحمل بنتهم باش يلولكم ذراعكم
يا اخي العاملة ان قبل زوجها عملها من الافضل ان يسكنا في بيت مستقل حتى لا يزعجا اي احد
مش معقول هي تبكر تخدم وكي ترجع تلقى كل شي واجد وامك وخواتتك مشنفين علاش راهم يخدمو عليها وهي تلقى روحها مجبورة من العمل مباشرة تبدل حوايجها وطريق الى شغل البيت ؟لا يعقل تحب تريح شوية داركم يزعفو الوغ في دارها وحدها تدير نظام يساعدها ويساعد زوجها تخدم وترجع وتريح بلاما يحاسبها حتى واحد وتنوض المشاكل
اذن اخي كما يقولو اللي اولو شرط اخرو نور انا نستعرف بهاذ العايلة بزاف شرطهم قالوه النهار الاول
وهنا الامر والقرار الاول والاخير راح يقررو خوك هذا ان لمس منكم انكم تبحثون عن سعادته ولن تعترضو ان سكن وحده اكيد راح يمضي في زواجه وان انتم ابديتم الاستياء والرفض اكيد مش راح يزعلكم ويبطل
يعني تاكد يا اخي ان قرار اخوك مرتبط بكم انتم فقط ى
لذا ان كان بوسعه فتح يت وكانت الطفلة لاباس بيها خلوه يسهل ويتوكل على ربي وعسى كنة ساكنة وحدها فيها الخير الكثير على كنة ساكنة معاكم
ربي يوفقه

[بسمة تحدي]

لازم البنات تع ضوك يقدرو ضروف تع الشباب

وش فيها اذا صبرت ووبلعقل ربي يرزقها بدار وحدها

وخاصة واذا كان الشاب انسان ملتزم ويخاف ربي

لا لشروط التعجيزية

ربي يهدينا يارب

[(الانسان الوفي)]

المشاركة الأصلية كتبت بواسطة بسمة تحدي

لازم البنات تع ضوك يقدرو ضروف تع الشباب

وش فيها اذا صبرت ووبلعقل ربي يرزقها بدار وحدها

وخاصة واذا كان الشاب انسان ملتزم ويخاف ربي

ربي يهدينا يارب

السلام عليكم ...بارك الله فيك اختي كلام وجيه ....لكن أحيانا السكن الفردي أحسن ولو بعد سنة من الزواج ...يعني السكن الفردي لابد منه ولو بعد حين ...خصوصا ان كانت الزوجة عاملة ...