قاطو القطايف

ange du paradis · 2012-02-09, 21:48

ســــــــــلام اليوم جبتلكم قاطو القطايف بصح اسمحولي عندي الصور النهائية ماعنديش الخطوات بالتفصيل ان شاء عن قريب كي نعاود نخدمو نجيبلكم الصور

المكونـــــــــــات :
1 كغ فرينة
500 غ ماغرين (فلوريال) 2 علب
1 خمارة
قرصة ملح
شوية سكر
ماء الزهر
عسل نونورس (1كغ)
للتزين حلوات فضية صغيرة
قطايف (120 دج) ساشي مغلوقة نستعمل نصفها مصنوعة في البليدة

الطــــــــــــــريقة :
خلطي المكونات الجافة الفرينة،خمارة،ملح،السكر بعد تخلطي بالمارغرين ذائبة وادلكي مليح حتى تدخل المكونات في بعض مليح تولي قريب عجينة بعد كملي بماء الزهر حتى تتحصلي على عجينة ملساء خليها ترتاح شوية
في حين حلي القطايف نصف الساشي تكفيك حليهم مليح وبشوية بعد ديريلهم شوية مارغرين ملي تخدمي بيها ملعقة او ملعقتين فقط
جيبي عجينتك ،كوري كويرات صغيرة الحجم بعد احكمي كل كرية ديريها حربوش ولصقيه حتى يدي شكل براسلي يولي دائري الشكل محفور من الوسط نقشيه بالنقاش دائريا وفي الوسط احكمي القطايف ودخليها مليح
طيبيه بعد خرجيه وعسليه بعسل نونورس
يشد شوية الوقت بصح والله هايل بنة وشكل ويقطع 60 حبة

مــــــــــلاحظة: العسل سخنيه في طاوة وديريلو شوية ماء الزهر وكي تكوني تعسلي اذا كان القاطو سخون لازم العسل بارد واذا القاطو بارد العسل سخون أنا دائما نخلي القاطو يبرد ونعسلو بالعسل سخون ديريه في الكيسات وحلوات فضية صغيرة من الفوق

وشهية طــــــــــــــــــــيبة

my lamis · 2012-02-09, 23:56

يسلمو إديك ختي و الله قاطو هاااااااااااايل و البنة راها باينة
حتى و محطيتيش الطريقة بالصور بصح راها مفهومة بارك الله فيك

ange du paradis · 2012-02-10, 00:47

اقتباس:

المشاركة الأصلية كتبت بواسطة my lamis

يسلمو إديك ختي و الله قاطو هاااااااااااايل و البنة راها باينة
حتى و محطيتيش الطريقة بالصور بصح راها مفهومة بارك الله فيك

وفيكي بركة ايه يجي يهبل أما الطريقة ملي خدمتو اخر مرة ماكنتش دايرة في بالي بلي نحطو وان شاء عن قريب نعاودو وبالتفصيل ،راني حاولت قد مانقدر شرح ان شاء الله نكون وصلت