عمر وراما !!!

[الأمير النبيل]

حبيت عمر كتير كتير ...انا كنت سنه أولى أدب عربي وهو ملازم اول ، صدفت اكتر من مرة طلعنا بنفس السرفيس وأنا راجعه عند العصر من الجامعة لبيتي ببلدة من بلدات الغوطة الشرقية ، اول مرة انتبهت انو عم يطلع علي حسيت انو وجي صار سخن كتير ودقات قلبي صارت تركض ركض يومها عرفت أني حبيت، وانحبيت، طلعنا بالسرفيس كل أربعاء بنفس الوقت ولا مرة حكينا مجرد انو هو يطلع علي وأنا اسرق النظر عليه سرقه واعمل حالي من دون قصد حتى اجى يوم كان عجلة كتير وطلع سبقني وحجزلي كرسي بجنبو ناح الشباك قعدت وكلي خجل متلبكة كتير مباشرة قلي :انا عمر من دير بعلبة بحمص.
انا ما عرفت شو احكي ضليت ساكتة لحظات وبعدها سألني!!!
هو: وإنتي؟؟؟
انا: راما.
هو : اي ساعه بوكرة طالعة من الجامعه.
يا الله شو فرحت بالسؤال أحلى سؤال مر بحياتي.... وهيك صرنا نتلاقى مرة او اكتر بالاسبوع ونحكي كتير وأخد رقم جوالي وأنا كمان. مرة قلي كنت مفكر بنات حمص أحلى بنات بسورية بس بنات الغوطة طلعوا أحلى مشان هيك عم فكر أتزوج اربع بنات من الغوطة ،،،، ضحكت كتير وفرحت يومها لان هو ما كان يعرف يغازل او حتى يقلي انا بحبك ،،، كان يكتبلي إياها على صفحة من صفحات كتاب انا احملو يومها ضلني طول الليل وأنا عم أتأمل الكلمة وفكر فيه لحبيبي عمر، كنت مفتونه فيه كتير كنت شوفو أحلى شب بالعالم وأرجل الرجال كنت شوفو كلو شهامه ومروءة كان وكان وكان كان ملاك كان نبي كان كل شي بهل الدنيه.. اجى يوم ١٥ آذار وبعدو ١٨ آذار وصار يكتر الهمس عنا بالبلدة وشفت عمر بهل الفترة وسألني: شو صاير ، شو عم تسمعي؟؟؟
انا: ما بعرف بس رفيء اخي اجى من درعا وقال معتقلين ١٥ طفل كتبوا على الحيطان يسقط النظام (يا ويلي قلتها وأنا مرعوبة وبصوت واطي كتير وعم أتلفت يمين وشمال) وقال عاطف نجيب سب الجاهة ووسخ معون بالحكي.
عمر: بوكرة المسا بدي أجي اطلب أيدك وإذا وافقوا اهلك مباشرة بجيب أهلي لا اليوم المسا راح دق بابكم .
انا: ليش هيك بسرعه ما صارلنا تلات شهور منعرف بعض .
عمر: ما بعرف بس في شي جواتي عم يقلي لازم نكتب الكتاب اليوم قبل بوكرة.
واجى عمر لبيتنا الساعه ٨ المسا وبنفس اليوم ، وطلبني من ابي وأبي بكل هدوء وادب ولطف رفض:: يا ابني والنعم منك بس والله ما منجوز بناتنا لغرب هيك عاداتنا. طلع عمر من بيتنا مكسور الخاطر وأنا ضليت ببيتنا مكسورة القلب اتصل اتصل ما يرد عمر ،،، حسيت يومها انو حمص بغير دولة وحسيت انو نحن ناس بلا دين وعنا العادات أقوى من كل الدين. اجى يوم الجمعة وأول مرة بصير عنا شهداء وابن الجيران كان واحد منون،، بكيت كتير يومها اتصل عمر : شبيك حبيبتي .
انا: ابن الجيران استشهد.
عمر: انا بدرعا صرت ماعاد اقدر كتير اتصل فيكي .. بحبك .... لا تزعلي الشهيد يا نيالو.
بس اخود إجازة راح اطلبك مرة تانيه.
الجمعه يلي بعدها....
عمر: كيفك حبيبتي .
انا: عنا قناص ..
عمر : لا تخافوا لا تخافوا ديري بالك منيح.
وبعدها بلشت التغريبه وبلشنا نهرب يوم ونرجع كم يوم مافي خطوط ما اقدر احكي مع عمر صرت فكر معو حق ابي ما وافق بس أحسن لو اجل...
يوم بأسبوع....
عمر: كيفك حبيببتي.
انا: استشهد اخي مبارح.
يوم بأسبوع
عمر: كيفك حبيبتي.
انا: الحمدلله وانت؟؟
عمر : استشهد اخي... ليكي راح اعمل متل وليد .
انا: مين وليد؟؟؟
استوعبت بعد بفترة انو القصد متل وليد القشمعي.
يوم من أيام سنة ٢.١١ شهر كانون الأول.
عمر : مشي الحال.
انا: بحبك.
اول مرة بقلو بحبك حسيت قلبي وقلبو ضموا بعض ، هو ضحك من قلبو.
وماعاد قدرت احكي معو من يومها مافي خطوط ونحن عم نهرب من مكان لتاني. كل تفكيري وهمي انو عمر يكون بخير انو كل شب حر يكون بخير ، تدمرت بلدتنا وماعاد في مجال نعيش فيها أبدا الميغ فوقنا وإدارة المركبات عم تقصفنا.
أهلي قرروا يسافروا للأردن وأنا اول مرة بتحداهم وبئلون ما بدي ضربني ابي ألتلو بدي ضل هون مع اخي وأختي وزوجها.
بصعوبة كبيرة ابي وأمي وأخواتي الأصغر تركوني مع اخي يلي بالجيش الحر وأختي المتزوجة من طبيب بيشتغل بمشفى ميداني ... وصرت ممرضة لاء دكتورة وصرت اعمل عمليات بسيطة طلع رصاصه اي اي صرت اعرف طلع رصاصه وخيط جرح وووو كتير شغلات. أختي تطبخ وأخي على الجبهة وزوج أختي طبيب المنطقة قسما بالله نبكي نبكي ونبكي على الشي يلي نشوفو. وأنا بكل لحظة ادعي لأخي ولعمر الله يحميون كل الأحرار ربنا يحميهم. بكل لحظة تنفس اطلع على الجوال من شهور عمر ما حاكاني وأنا اتصل يطلع مغلق ... يوم عن يوم قلبي يفور أكتر وأكتر وصرت لوم ابي لو انو وافق على عمر كنت بهل اللحظات بجنبو او على القليلة اعرف وينو ... ان شاء الله يكون قدر يمر للأردن.
بسرعه بسرعه راما بسرعه يا شباب ١٥ شب حالتهم خطرة بسرعه الشاش خيطان بدي ضو حدا يمسكلي الضو،،، راما فكي قميص الشب بسرعه بسرعه خلي يقدر يتنفس.
يا ويلي يا ويلي شو بيشبه عمر هاد عمر اي عمر والله العظيم عمر ..... عمر حبيبي صرت صرخ وأنا عم وعيه عمر مشان الله اصحى لك عمر .. صرت اضربوا على على خدودوه مغطايه بدقن طويله .... الله يخليك يا حبيبي اصحى مشان الله عيش .... الدم كان مغطي كل جسمو قدر يمسكلي ايدي وشهد بالله وابتسم بوجي وراح .......
انا ما راح أخجل أقول أني حبيت اشجع رجال بالعالم لو ابي ما رفض يمكن كان عندي طفل من عمر بس قدر الله وماشاء فعل. انا خسرت شرف كون زوجة الشهيد ، انا فقط حبيبة شهيد اي حبيبة عمر انا الحرة حبيبة عمر ما راح أخجل أقولها أبدا ....
عمر بحبك بكل لحظة وبكل لحظة بترحم على روحك. ابن دير بعلبة الحر استشهد بالغوطة الشرقية ارض الرجال مشان يحمي البنت يلي بيحبها والبنت يلي بتحبو دفنت جسدو الطاهر مع قلبها تحت تراب الغوطة الابيه.
راما وعمر قصة ثورة قصة حب قصة رجولة قصة قصة حر وحرة قصة الحرية قصة كل سوري وسورية.