واش ذنبي ??

[مشكلتي]

السّلام عليكم
أنا بنت 15 سنة أدرس االاولى ثانوي ،ماعندي لا صديقة و لا حتى واحد نحكيلو راني لقيت وين نفرغ قلبي أنا ديما وحيدة عندي أب يخدم فالغربة و خويا ديما يضربني و هادا عامين وحنا منحكيوش مع بعدانا يضربني على حوايج تافهين و معندهم حتى معنى رغم أني فتاة خلوقة و متربية في الثانوية ديالي و ذلك بشهادة الأسرة التربوية كاملة ملتزمة بديني و حجابي لكن أتعرض للسخرية من طرف الزملاء اللي يقراو معايا بنات و لا ولاد يقولولي واش درتي في روحك مالقيتي ماديري تحجبتي هه فيقي يا الغافلة حنا في عام 2013 و مازالك تحوسي على رضاية الوالدين ازهاي ازهاي .... يدهشونني بهاد الكلام و مانلقا ما نقولهم غير نسكت و نقنع روحي باللي هوما الخاسرين على كل حال و أنا لازملي ما نديرش على هدرتهم و نعمل روحي كي شغل ماكان والو ديما نبتسم رغم واش راه صاري متفوقة في دراستي الحمد لله ، أدعيولي إن شاء الله يوجهوني علوم تجريبية لاني حابة ندير صيدلة وندير مستقبلي ان شاء الله و نوصل الهدف نتاعي لكن راني خايفة لانو الثانوية اللي نقرا فيها الاساتذة يظلمو وويوجهو بالمعارف و القهاوي .... المُهم يا اخواني و أخواتي كيما قتلكم عندي اب ديالي يخدم بعيد علينا واش نطلب منو يوفرلي و الحمد لله داير فيا ثقة عمياء وديما يقولي يا بنتي لعزيزة راني نخمملك ديما على مستقبلك كوني قد الثقة و علاقتي معاه منقدرش نوصفها لوكان كشما يصرالو نموت و منحملش فراقو بعيد الشر عليه و ربي يبعد علينا البلاء لكن... عندي ضيقة في نفسي.. خويا يضربني لكن قلبي صافي معاه مانيش حاملة الحقد تجاهو.. ماعنديش حتى واحد نحكيلو نحس روحي راني محتقرة من طرف الجميع لكن ماذنبي ... ما رانيش كيما لبنات و مانيش تاع لف و دوران أنا نحب الجدية و الإلتزام حابة نوصل لأبعد نقطة إن شاء الله وكي ندي الباك ديالي نكمل قرايتي فالخارج .. كاين شي بنات يضحكو عليّا كيفاش ماعنديش بورتابل و أنا في هاد السن لكن عايلتي ترفض ديرهولي علاخاطر يجيب غير المشاكل و البلاء و أنا راني مقتنعة ماعندي مندير بيه .. و كيفاش ماعنديش فيسبوك و تويتر و ***** ... و يوصفوني بالمتخلفة لاني جامي دخلت على هاد المواقع وذلك بسبب وعد مديتو لبابا كي قالي يا بنتي منحبش عليك ديري في بالك النيف و الكرامة اذا طاحو الموت خير من الحياة .... مانيش فاهة علاش راه يصرا معايا كل هاد الإحتقار ما فهمتش واش عملت للناس حتى يكون هادا مصيري ... أرشدوني ماني فاهمة والو