بليييييييييز جاوبوني

ام نسمة · 2013-05-23, 10:45

مرحبا ...................علاش حقرتوني وماجاوبتونيش مع انكن كلككن مشاء الله مبدعات لكن ما حبيتوش تكسبو فيا اجر وتعلموني ماعندي حتى وحدة توريلي من غيركم بليز علموني وجاوبوني على اسئلتي

رحيق الايمان · 2013-05-23, 10:48

رانا في الهواء سواء عزيزتي انا تاني نستنى في الرد
قوليلي انت واش احتجتي؟

لينا11 · 2013-05-23, 11:18

واش خصك حنونةة راني هنا ان شاء الله

ام نسمة · 2013-05-23, 11:23

واخيرا ...........................

-1 ماهو اسم ملون الغذائي الخاص بالحلويات امن النوع الفاخر وكم ثمنه وهل لمزج بين عدة الوان منه يخلق الوان جديدة والاسعار ان وجدت
-2 اريد طريقة صنع عجينة اللوز الحقيقية في البيت اريد مقادير لكمية قليلة جدا فقط من اجل التجربة
3- بالنسبة لطهي الحلويات ماهي درجة الحرارة المناسبة وهل يجب ان يكون الفرن سخون بزاف ولا شوية
4- بخصوص القلاصاج ماهي انجح طريقة
5- كيفية تذويب الشكولاتة المخصصة للقلاصاج وماهو احسن نوع يعني الاسم
بالنسبة للقريوش انا كي كنت صغيرة كانت عندي وصفة رائعة وضيغتها لكن اتذكر جيدا انه كانت فيها رشة خميرة خبز و خل من تعرف الوصفة تقولها لي انا مجربتها من قبل ما اتزوج لكن نسيتها
6- كيف اضبط حجم كويرات العقدة حتى تكون نفس الوزن والحجم في حالة ماعنديش ميزان وهل الميزان انجح من اي طريقة اخرى
اذا تذكرت شيئ اخر راح اعيد طرحه ياريت تعطوني معلومات ونصائح حتى اتدرب جيدا واطور من عملي للحلويات . ونرجع شاطرة كيفكم

tong2 · 2013-05-23, 11:37

https://www.djelfa.info/vb/showthread.php?t=1110568

لينا11 · 2013-05-23, 12:09

اقتباس:

المشاركة الأصلية كتبت بواسطة زهورالفل

واخيرا ...........................

-1 ماهو اسم ملون الغذائي الخاص بالحلويات امن النوع الفاخر وكم ثمنه وهل لمزج بين عدة الوان منه يخلق الوان جديدة والاسعار ان وجدت

نعم بالنسبة للالوان غذائية كاين بودرة وكاين سائل وكي تمزجي الالوان تتحصلي على الوان اخرى
الثمن صراحة كل بلاصة وسومة الي يبيعو فيها

-2 اريد طريقة صنع عجينة اللوز الحقيقية في البيت اريد مقادير لكمية قليلة جدا فقط من اجل التجربة

3- بالنسبة لطهي الحلويات ماهي درجة الحرارة المناسبة وهل يجب ان يكون الفرن سخون بزاف ولا شوية
كل حلوة ودرجة حرارة تاعها كاين الي لازم تخليها ترتاح 06سوايع باش طيبيها باش تحافظ على شكلها كيما مشكلة ومخبز ومدتهم على الاكثر 10دقايق على درجة حرارة 180 وكاين الحلويات العادية درجة 180دائما مدة 30 او 35على الاكثر وكاين حلويات كيما قلب لوز لازملو ساعة ودرجة هابطة خلاص

4- بخصوص القلاصاج ماهي انجح طريقة
طريقتي الي مانبدلهاش ابدا هو انك تديري بياض بيضة واحدة +03مغارف كبيرة زيت و03مغارف كبار ماء زهر او ماء ورد+03م ك عصير ليمون حطيهم كامل في صحن غامق وضربيهم بالفرشيطة وبداي زيدي عليهم سكر قلاص مغربل 03مرات
5- كيفية تذويب الشكولاتة المخصصة للقلاصاج وماهو احسن نوع يعني الاسم
كاين وكاين حنونة انا ساعات نستعمل امباسدور سوداء نذوبها على حمام مائي ونزيد لها شوية قهوة تاع براس كحلة ونقلاصي بيها وكاين تاع مورسوات ماركة الي جربتها ونجحتلي هي بوبوس

بالنسبة للقريوش انا كي كنت صغيرة كانت عندي وصفة رائعة وضيغتها لكن اتذكر جيدا انه كانت فيها رشة خميرة خبز و خل من تعرف الوصفة تقولها لي انا مجربتها من قبل ما اتزوج لكن نسيتها
انا الي نستعملها مافيهاش خميرة خبز وتجي مورقة ممممم حوسي في مواضيعي تلقايها

6- كيف اضبط حجم كويرات العقدة حتى تكون نفس الوزن والحجم في حالة ماعنديش ميزان وهل الميزان انجح من اي طريقة اخرى
هزي بوشون تاع قرعة ماء فارغ وعمريهم
اذا تذكرت شيئ اخر راح اعيد طرحه ياريت تعطوني معلومات ونصائح حتى اتدرب جيدا واطور من عملي للحلويات . ونرجع شاطرة كيفكم

من بعد نكملك عسولة

ام نسمة · 2013-05-23, 12:15

ماشي عجينة السكر عجينة اللوز الاصلية

ام نسمة · 2013-05-23, 12:27

اقتباس:

المشاركة الأصلية كتبت بواسطة لينا11

من بعد نكملك عسولة

راح استناك مشكوووووووووووووووووووووووورة جدا

هجيرة1 · 2013-05-23, 12:56

اقتباس:

المشاركة الأصلية كتبت بواسطة زهورالفل

ماشي عجينة السكر عجينة اللوز الاصلية

الصفحة رقم 15

عجينة اللوز
دفتر مطبخي ركن خاص لمستمعي اسرار مطبخ دليلة** ملتقى حراير الجلفة **

هجيرة1 · 2013-05-23, 12:58

بخصوص القلاصاج ماهي انجح طريقة
الصفحة رقم 2
قلاساج بالسيروو

دفتر مطبخي ركن خاص لمستمعي اسرار مطبخ دليلة** ملتقى حراير الجلفة **

هجيرة1 · 2013-05-23, 13:03

قريوش

دفتر مطبخي ركن خاص لمستمعي اسرار مطبخ دليلة** ملتقى حراير الجلفة **

هجيرة1 · 2013-05-23, 13:08

اقتباس:

المشاركة الأصلية كتبت بواسطة زهورالفل

واخيرا ...........................

6- كيف اضبط حجم كويرات العقدة حتى تكون نفس الوزن والحجم في حالة ماعنديش ميزان وهل الميزان انجح من اي طريقة اخرى
اذا تذكرت شيئ اخر راح اعيد طرحه ياريت تعطوني معلومات ونصائح حتى اتدرب جيدا واطور من عملي للحلويات . ونرجع شاطرة كيفكم

نشكلوه باستعمال غطاءقارورة عطر ديدغو باش يجوكامل قد قد

ام نسمة · 2013-05-23, 13:20

صحيتي بزاف حنونتي هجيرة 1 ربي يعطيك ما تتمناي هايلة سيرتو العفسة تاع غطاء الديدوغون فور

ladymillion · 2013-05-23, 13:23

اقتباس:

المشاركة الأصلية كتبت بواسطة زهورالفل

واخيرا ...........................

أول حاجة أنا مشفتش الموضوع نتاعك دورك برك وين شفتو ونحب نفيد الناس بالخبرة البسيطة لي عندي راح نجاوبك بواش نعرف

-1 ماهو اسم ملون الغذائي الخاص بالحلويات امن النوع الفاخر وكم ثمنه وهل لمزج بين عدة الوان منه يخلق الوان جديدة والاسعار ان وجدت
أنا نستعمل الملون الغذائي البودرة يتباع في ساشيات صغار البودرة احسن من السائل الماركة المليحة {نرجس}

-2 اريد طريقة صنع عجينة اللوز الحقيقية في البيت اريد مقادير لكمية قليلة جدا فقط من اجل التجربة

راح نعطيلك عجينة اللوز الاصلية وحاولي تجربيها وانشاء الله تخرجلك مليحة أختي
مقادير: 250جرام من اللوز الحلو المقشر مرحي رطب كي الفرينة
- 200 غ سكر عادي
-100غ سكر ناعم
- 2 بياض بيض
- ملعقة ما ء زهر
نصف ورقة جيلاتين { الجيلاتين استعملي نتاع الورق و انقعيه بنصف ساعة قبل في الماء البارد جدا }
طريقة : انخلي السكر مع اللوز الرطب وخليهم على جنب - اخفقي بياض البيض مع قرصة ملح حتى يرجع كي الثلج - الان في طاوة حطي السكر العادي مع نصف كاس ماء وخليهم يغليو حتي يتبدل اللون نتاعو شوي ومن بعد ضيفيلهم هذاك الجيلاتين وحركي حتان يذوب وضيفي السكر والجيلاتين لهذاك البياض وكملي الخفق بالخلاط حتان يزيد يطلع ويكون متماسك مليييح - أضيفي اللوز والسكر النخولين على البياض وخلطي الان بملعقة برك كي يتخلط مليح حطي في الثلاجة نصف ساعة وجبديها شكليها كيما تحبي قادرة تكون تلصق شوي لكن ساعدي يديك بالسكر الناعم

3- بالنسبة لطهي الحلويات ماهي درجة الحرارة المناسبة وهل يجب ان يكون الفرن سخون بزاف ولا شوية
والله يا أختي كل حلوى وكيفاه كيما العرايش والتشاراك والمشكلة وهاذ الانواع لي فيهم عجينة وحشوة اللوز لازم الفرن يكون سخون بـ20د قبل وحطيهم في الوسط في 180° حتان يحمارو من تحت ------ أما الغريبية لازملها 150° والفرن يكون سخون ملييح وطلعيها لفوق وطيب على مهلها حوالي ساعة --------- أما للقواطو الجافين الباقيين الفرن يكون سخون بنصف ساعة قبل 180° والطياب يكون حوالي نصف ساعة اذا كشما عندك تحبي تسكسي على قاطو معين تفضلي راني هنا هههه

4- بخصوص القلاصاج ماهي انجح طريقة

أنجح طريقة للكلاصاج نديرو ومضمونة { 700غ سكر ناعم ، بياض بيضة واحدة ، فاني، ماء زهر ، عصير نصف حبة ليمون } في كاصرونة حطي السكر + الفاني + عصير الليمون + بياض البيضة وحكي بيديك ملييييح مليييح حتلن يتخلط البياض هذاك مع السكر من بعد أضيفي الماء زهر بشوي وأعجني بيديك ودخليه في بعضاه وزيدي ماء زهر حتان تشوفي قوامو مليح ماهو ثقيل ماهو خفيف وحكي بيديك مليح حتان يبياض الكلاصاج نتاعك في الاخير تحبي ديريلو ملون ديريلو

5- كيفية تذويب الشكولاتة المخصصة للقلاصاج وماهو احسن نوع يعني الاسم

استعملي شوكولا {منى، mina} راني كتبتهالك بالفرنسية والعربية هاذي أحسن شوكولا للاكلاصاج ذوبيها في حمام مائي عادي كي تذوب زيديلها شوي ماء باش تكون سائلة وزيديلها ساشي صغير نيسكافي وصفار بيضة 600غ شوكولا ديري صفار بيضة وخلطيها مليح أنا هاذا هو كلاصاجي نتا الشوكولا

بالنسبة للقريوش انا كي كنت صغيرة كانت عندي وصفة رائعة وضيغتها لكن اتذكر جيدا انه كانت فيها رشة خميرة خبز و خل من تعرف الوصفة تقولها لي انا مجربتها من قبل ما اتزوج لكن نسيتها
اليك المقادير : كيلو فرينة +2 بيضات+ كاس زبدة نقصي منه 1سم ديريه زيت + مغرف خل + باكي خميرة الحلويات+ ملح + ماء زهر تلمي بيه العجينة ومن بعد ما تلميها خليها ترتاح ساعة

6- كيف اضبط حجم كويرات العقدة حتى تكون نفس الوزن والحجم في حالة ماعنديش ميزان وهل الميزان انجح من اي طريقة اخرى
ديريي بالبوشون نتاع أي قرعة نتاع الماء أو عصير

اذا تذكرت شيئ اخر راح اعيد طرحه ياريت تعطوني معلومات ونصائح حتى اتدرب جيدا واطور من عملي للحلويات . ونرجع شاطرة كيفكم

اختي اذا جربتي أي حاجة من لي قولتهملك أدعيلي بالخير و لوالديا وانشاء الله نكون أفدتك واي حاجة تجي تجربيها أبداي ب بسم الله الرحمن الرحيم وبه نستعين

ام نسمة · 2013-05-23, 13:26

ما عرفتش نحوس فيه ياريت تحطيهم هنا مباشرة الوصفة اعمليلها كوبي كولي وحطيها لي لهنا واكون جد ممنونة