قصيدتى الاولى اليكم واتمنى ان تنال اعجابكم (بالعامية المصرية)
مش قلت لك....
مقلوبة حالك يا بلد ..
نزرع في قلبك .... كام أمل
يطرح ترابك .. كام شيطان....!!
*****
وشك يا بلدى بكام لسان
صوتك بيرجع ... يرعبك
ساعة الادان
خوفك بيغلى ..فى جتتك
قلبك يا بلدى خلاص تعب.. وبيتعبك
*****
بصرخ وأقول ....يا مسلمين..
وتفيد بأيه ألآه ف ناس ..
لو ميتين .. !!
هترجّع القلب ال مات ..!!
وترجّع العمر ال فات ..!!
*****
عايشين ف دنيا مزيفة...متلونة
زى القبور دايما تبان من شكلها
يسكنها موت ... كان يوم بشر
يحكم ويؤمر ... بس جاه أجله .. اندثر ..
والدنيا نازلة شقلبة..
بتلف بينا بخبثها
والناس غواها اللف ...نشّف ريقها ...
نشّف قلبها...
سارقة العقول ... سارقة النفوس ..
بقت البشر بتساوى كام ....
حبة الفلوس ...!!
*****
حتى الضمير .. أصبح صنم
ما بقاش لنا الراعى ولا ...
..... صرنا الغنم
فينا ال راكع يعبده
فينا ال قتله ... موته
اما الكتير من وسطنا ... صار لعبته
ساعة يشيله وساعة تانية ... يكسره...
*****
وتفيد بأيه ألآه ف ناس .. متشقلبين.. !!
ماشيين على إيديهم وراسهم ...
تحت طين .. متحنطين!!
تايهين ولا هم دريانين... أو ميتين
هو ال مات يقدر ويعرف ... هو مين ..؟؟
فين الطريق يا مسلمين..؟
شمال ..؟؟ يمين..؟؟
*****
الحق ظلم ف شرعنا
والظلم حق ف قلبنا
والجهل له مليون لسان
والعلم سارح ف الجنان
والخوف غطانا وفرشنا
وشجاعة هربت مننا
وبقينا بس نشوف هوانا وحلمنا..
أما ال ساكن جنبنا.. أو بعدنا .. أو قبلنا
ما عدش واحد مننا
ما يخصنا ...
ولا عمرنا نشوفه ولا يوم نعرفه ..
حتى البلد...
ما بقتش عايشة وسطنا
وف قلبنا..
صبحت غريبة عننا..
هىّ ف سكة .. وإحنا سكة ...
تحتنا..
مش حتى ماشية جنبنا ..
*****
بقت الحياة ..عند البشر ...
... هى ّ أنا ...
أو لما تكبر حبتين...
تصبح يا دوب...
أمي .. وأبويا... وكام ولد
لما هيكبر راح تقول... ليه إتولد...؟؟
وعشان كدا ... عايشين صغار
ويمر بينا العمر واحنا ....يادوب نصير ..
أطفال كبار ...
*****
قلبك يا بلدى خلاص تعب.. وبيتعبك
قلبك بينبض نبض ناس
مستأجرين
قلبك بيحلم حلم ناس.. مستأسدين
قلبك خلاص مابقاش عرين..
مابقاش بينبض نبض قلب...المخلصين
*****
علشان ولادك يا بلد .. ناس طيبين
نسيوا الجراح..
ماشيين على نفس الطريق .. ال اتردم
راجعين وناويين يزرعوه .... ويطهروه
لكن وراهم كام صنم
بيلف حواليه البجم ...وبيعبدوه
عايزين يعيشوا في قبرهم ... مستانسين..
عايزين عبادة وهمهم .. بيه مؤمنين
لكن ولادك طيبين
حالفين ما هيسيبوا الطريق ..
الا وهمّا بحلمهم ... مستمتعين
ويرشوا بزرة حبهم .. من قلبهم
ع المجروحين
راح يزرعوا من عمرهم ...
سكة سنين
للمحرومين
*****
جمال نصير فى مارس 2013
( تقرير عن مشاركة سيئة )، و الموجودة أسفل كل مشاركة .
2013-04-08, 09:45
مش قلت لك...!!
العرض العادي
