طريقتي في حفظ الطماطم

[بيزة الشاوية]

طريقتي في حفظ الطماطم : هذي الطريقة أخذتها من صديقتي كي كنا في الجامعة الله يذكرها بخير
نأخذ الطماطم قد ما قدرتي رطل أو كيلو أو أكثر كل قدير و قدرو كيما يقولوا و نفورها حت تترخف من المستحسن الطماطم تكون كامل حمراء مافيهاش الصفورة ومن بعد نرحيها بالرحا اليد أو بالبرا أو بالميكسور ونحطها في قطعة قماش تكون نظيفة و نربطها ـ أنا نستعمل قماش التيلو ـ ونتركها تتقطر حتي تحبس التقطار ممكن نهار أو نهار وليلة بعدما تتقطر نحطها في بلاطو مايكونش اينوكس أو حديد و نتركها عند الشمس تجف كل مانشوف عملت طبقة جافة من الفوق نقلب و هكذا حتى نحس انها جفت تماما ثم نزيدلها الفلفل أكحل و الزيت والثوم مرحي ونحط في بلارات معقمة يعني مغلية في الماء وممسوحة بقطعة قماش نظيفة و نحطها في الثلاجة و الطبخ بيها ما عندي مانقلكم هايل إن شاء الله تجربوهم و بصحتكم