ياللي سالتني عالحـــــــــــــب

[hamida zidani]

ياللي سالتني عن الحب........و قلتلي بالله خويا و علاه
ماتجاولش كشما تكتــب........و تقولي برك وين نلقاه
عييت نقلب شرق و غرب.......وين يقولولي نستناه
لقيتو كامل كدب في كدب.........ماتلاقيتو ماعرفت معناه
لا قريب و لا صاحـــــب..........و لا حبيب تعيش معاه
حياتي كامل و انا نجرب...........واحد مالقيتو يسواه
مانيش فاهمة هاد القلــب...........و كأنوا ضد مولاه
يحب يشقى يحب يتعذب...........يحب الواحد اللي ينساه
و ساعات تلقاني نحب............اللي يكرهني نجري موراه
و اللي يحبني و ليا يقرب.........نهرب عليه مافهمتش علاه
حاول خويا كاش ما تكتب.........الجواب راني نستناه
لله احكيلي على الحب.......و قولي برك وين نلقاه
راح نحاول باش نجاوب........كفاش انا نشوف معناه
و ديرك في بالاك هاد الحب......مراكش وحدك حاصل معاه
شحال من واحد راه يتعدب......و الحل ديالو مزال مالقاه
ما يفيدوش معاه تجارب..........مايفيد ملك و الا جاه
اذا فات سكن في القلب......يولي يسير في مولاه
شحال طوع من محارب........و حسرة شحال من فارس ابكاه
شحال من سلطان عشى مذبذب........سمح في ملكو و راح معاه
شحال من بيت عشى رايب.......دخل فرق ناسو و خلاه
و حصرا شحال من واحد هرب.......و خلى ولادوا يبكو موراه
شحال من شاب شحال من شايب.....شحال من واحد الحب عماه
لحق حتى ولا يضرب.....ولادو,زوجتو ,و يمــــــــــــــــــــــــــاه
ياللي سالني عالحب...........على ما نظن و العلم لله
قلبك هو اللي راه مخرب.....و ماراكش عارف حتى وين راه
دير في بالك ذاك الحب......اللي يهرب و تجري موراه
و لما يجري أنت تهرب.......عمرك ماراح تتلاقى معاه
على خاطر هذاك لعب....مديور للي يتبع هـــــــــــــــــــواه
ما تنال منو غير التعب.....ديرو كيما خيالك و انساه
فرغ قلبك و عاود رتب......و خلي عقلك يخدم معاه
و قبل ما تحب لازم تحسب....باش كي تمدو تمدو لمولاه
هيا نبداو من أول حب........أول حـــــــــــب هو الله
اللي عطاك هداك القلب.....اللي راك تحوس باش تملاه
ولو كان برك ليه تقرب......أقرب منك رايح تلقاه
كلما تحصل قولو يا رب......و هو يقولك راني الاه
و بعدو يجي ثاني حب......هو حبيبنا و حبيب الله
عليه الصلاة و السلام تعب.....باش صفى قلبك و نقاه
حبو عليا و عليك واجب ....سعدو الواحد اللي بغاه
يحشر المرء مع من احب....تخيل روحك قاعد معاه
و من بعدو يجي ثالث حب.....أنه الواحد يحب يماه
تسع شهور و هو يتقلب ......و هي مسكينة تتقلب معاه
سنين و سنين و هي تتعذب.......وين يطيح يلقاها حداه
حتى نهار يولي شايب......يبقى طفل في عيون يماه
و من بعدها يجي رابع حب .....أنو الواحد يحب باباه
لأنه خرج من بين الصلب...و الترائب اللي جـــــــــــواه
شحال شقى و شحال تعذب ....باش كبر و باش رباه
ابن ادم و كل ما كسب ...هو و مالو ملك لــــــــــــــه
و من بعد خامس حب.....هو الشريك اللي تعيش معاه
دير في بالك نهار تتحاسب ........نصف الدين هو تلقاه
تعيش معاه باللي كتب ........و تتقاسمو كل شي انت واياه
و تتعاشروا و معاه تنجب .....طفل صغير لعقايب تلـــــــقاه